ಸಂಪಾದಕೀಯ್:
ಕಾಳೊಕ್ ಪಡ್ಲ್ಯಾ ಉಪ್ರಾಂತ್ ಘರಾ ವೆತಲ್ಯಾಂನೊ!
ಘರಾಥಾವ್ನ್ ಭಾಯ್ರ್ ವೆತಾನಾ, 'ಕಾಳೊಕ್ ಪಡ್ಚ್ಯಾ ಫುಡೆಂ ಘರಾ ಯೇ' ಮ್ಹಣೊನ್ ಜಿವಿತಾಚ್ಯಾ ವೆವೆಗ್ಳ್ಯಾ ಪಾಂವ್ಡ್ಯಾಂನಿ ಆಪ್ಲೆ ಆವಯ್ನ್ ಉಚಾರ್‌ಲ್ಲಿಂ ಉತ್ರಾಂ ವಿಂಚುನ್ ಕವಿನ್ ಹಿ ಕವಿತಾ ವಿಣ್ಲ್ಯಾ. ಕಾಳೊಕ್ ಅನಾಉತಾಂಚಿ ಕುರು. ಘರ್, ಹ್ಯಾ ಅನಾಉತಾಂ ಥಾವ್ನ್ ಮನ್ಶಾಕ್ ರಾಕಣ್ ದಿತಾ.
ಕಾಳೊಕ್ ದಿಸಾಚ್ಯಾ ಉಜ್ವಾಡಾ ಉಪ್ರಾಂತ್ಲೊ ಮಾತ್ರ್ ನ್ಹಯ್, ಹೆರ್ ಖಂಯ್ಚೋಯ್ ಜಾವ್ಯೆತಾ. ಕಾಂಯ್ ದುಸ್ಮಾನ್ ಜಾವ್ಯೆತಾ; ವೆವ್ಹಾರಾಂತ್ಲಿ ದಿವಾಳಿ ಜಾವ್ಯೆತಾ; ಜಿವಿತಾಂತ್ಲಿ ಉತ್ರೊನ್ ವೆಚಿ ಪ್ರಾಯ್ ಸಯ್ತ್ ಜಾವ್ಯೆತಾ. ಆನಿ ಹೆಂ ಘರ್ ಕುಡಿಕ್ ಮಾತ್ರ್ ನ್ಹಯ್, ಕಾಳ್ಜಾಕ್ ಮನಾಕ್ ಸುಶೆಗ್ ದಿಂವ್ಚಿ ಖಂಯ್ಚೀಯ್ ವಸ್ತ್ ಜಾಂವ್ಕ್ ಸಾಧ್ಯ್ ಆಸಾ! ರಚ್ನಾರಾಚೆಂ ಬಗಲ್ ಸಯ್ತ್!
ಪೇಜ್ ವಚೊನ್ ಮಡ್ಡಿ ಜಾಲ್ಯಾ ಉಪ್ರಾಂತ್ ಕಾಂಯ್ ಫಾಯ್ದೊ ನಾ, ತಶೆಂಚ್ ಕಾಳೊಕ್ ಪಡ್ಲ್ಯಾ ಉಪ್ರಾಂತ್ ಘರಾ ಭಿತರ್ ಸರ್‍ಚ್ಯಾಂತ್ ಕಾಂಯ್ ಅರ್ಥ್ ನಾ!
ವೆವೆಗ್ಳ್ಯೊ ಧಾಂಪ್ತ್ಯೊ ತಶೆಂ ಉಗ್ತ್ಯೊ ಪ್ರತಿಮಾ ವಾಪರುನ್ ಬೋವ್ ಸಾದೆ ಭಾಶೆನ್ ಕವಿನ್ ಹಿ ಕವಿತಾ ಲಿಖ್ಲ್ಯಾ. ರೊಬರ್ಟ್ ಉದ್ಯಾವರ್ ಕೊಂಕಣಿ ಕಾವ್ಯಶೆತಾಕ್ ಲಾಭ್‌ಲ್ಲಿ ಏಕ್ ವಿಶೇಸ್ ಭರ್‍ವಶ್ಯಾಚಿ ದೇಣ್ಗಿ!
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಕಾಳೊಕ್ ಪಡ್ಚ್ಯಾ ಫುಡೆಂ!
ಭುರ್ಗ್ಯಾಪಣಿ ಜರೀ ಹಾಂವ್
ಸಾಂಜೆವೆಳಾರ್ ಶೆಜ್ರಾತೆವ್ಶಿಂ
ಭೊಂವ್ಡೆ ನಿಬಾನ್ ಭಾಯ್ರ್ ಸರನ್
ಮಾಂಯ್ ಮ್ಹಜಿ ಮೊಗಾನ್ ಸಾಂಗಿ
ಪುತಾ ಕಾಳೊಕ್ ಪಡ್ಚ್ಯಾ ಫುಡೆಂ ಯೇ ಪಾಟಿಂ
ವ್ಹಡ್ ಜಾಲಾಂ, ಸುಟಿಯೆ ದಿಸಾಂನಿ
ಖೆಳಾಂಗ್ಣಾಂತ್ ಖೆಳೊಂಕ್ ಧಾಂವ್ತಾಂ
ಇಷ್ಟಾಂಕ್ ಮ್ಹಜ್ಯಾ ಮೆಳೊಂಕ್ ಪಾವ್ತಾಂ
ಗಿನ್ಯಾನ್ ಮ್ಹಜೆಂ ಜಾಗಯ್ತ್ ಆಸಾ
ಕಾಳೊಕ್ ಪಡ್ಚ್ಯಾ ಫುಡೆಂ ವಚೊಂಕ್ ಪಾಟಿಂ
ದಾಟೊ-ಮೊಟೊ ತರ್ನಾಟೊ ಹಾಂವ್
ಪೆಂಟೆ ಕುಶಿನ್ ಚಮ್ಕತಾಂ
ವೇಳ್ ಸಾರುಂಕ್ ಭೊಂವ್ಡಿ ಮಾರುಂಕ್
ಮಾಂಯ್ಚಿಂ ಉತ್ರಾಂ ಮತಿಕ್ ಯೆತಾತ್
ಕಾಳೊಕ್ ಪಡ್ಚ್ಯಾ ಫುಡೆಂ ಯೇ ಪಾಟಿಂ
ಘರ್-ದಾರ್ ಗಾಂವ್ ಸೊಡುನ್
ಪರ್ಗಾಂವಾಕ್ ಹಾಂವ್ ಪಾವ್ಲಾಂ
ಮಾಂಯ್-ಪಪ್ಪಾ ಜಾಲ್ಯಾಂತ್ ಜಾಂಟಿಂ
ತಾಳೊ ಆಪಯ್ತಾಶೆಂ ಭೊಗ್ತಾ
ಕಾಳೊಕ್ ಪಡ್ಚ್ಯಾ ಫುಡೆಂ ಘರಾ ಪಾಟಿಂ
ಘರಾ ಥಾವ್ನ್ ಪಯ್ಸ್ ಪಾವ್‌ಲ್ಲೊ
ಘೊಂಟೆರ್ ಸೊಡ್‌ಲ್ಲ್ಯಾ ಸುಕ್ಣ್ಯಾಭಾಶೆನ್
ಸಾಂಜ್ ಜಾತಚ್ ಸುಕ್ಣ್ಯಾನ್ ಆಪ್ಲ್ಯಾ
ಘೊಂಟೆರಾತೆವ್ಶಿಂ ಉಬಜಾಯಿಚ್
ಪ್ರಸಾರ್‍ಚ್ಯಾ ಫುಡೆಂ ಕಾಳೊಕ್ ಮೊಳ್ಬಾರ್
ಸುರ್ಯಾನ್ ಆದೇವ್ಸ್ ಸಾಂಗ್ಚ್ಯಾ ಆದಿಂ
ದಿಸಾ-ಉಜ್ವಾಡ್ ಭೊಗುಂಕ್ ಆಸಾ
ಉಪ್ಕಾರ್ ವ್ಹಡ್ ಆಟಂವ್ಕ್ ಆಸಾ
ಕಾಳೊಕ್ ವೆಗ್ಗಿಂ ಜಾಯ್ನಾ ಜಾಂವ್
ಜಾಂವ್ಚ್ಯಾ ಫುಡೆಂಚ್ ಮಾರ್‍ತಾಂ ಧಾಂವ್
- ರೊಬರ್ಟ್ ಫೆರ್ನಾಂಡಿಸ್, ಉದ್ಯಾವರ್ (ದುಬಾಯ್)