ಸಂಪಾದಕೀಯ್:
ಸದಾಂ ಸಾದ್ ಘಾಲ್ಚೊ ಕೊಂಬೊ ಖಂಯ್ ಗೆಲಾ?
ಆಮ್ಚೆಂ ಜಿವಿತ್ ಸಗ್ಳೆಂ ತಾಂತ್ರಿಕ್. ಥೊಡ್ಯಾ ಸಂಗ್ತಿಂಚೆರ್ ಬಾಂಧುನ್ ಹಾಡಲ್ಲೆಂ ಆಸ್ತಾ. ಸುರ್ಯೊ ಅಸ್ತಮ್ಲ್ಯಾ ನಂತರ್ ನಿದ್ಚೆಂ, ಉದೆಲ್ಯಾ ಉಪ್ರಾಂತಚ್ ಉಟ್ಚೆಂ - ಆಮ್ಚಿ ಸವಯ್. ಸುರ್ಯೊಚ್ ಉದೆಲೊನಾ ತರ್, ಸಕಾಳಚ್ ಜಾಲಿನಾ ತರ್? ಹೆವಿಶಿಂ ಖಿಣಾಕ್ ತರೀ ಆಮಿ ಚಿಂತ್ಲಾಂ?
ಫಾಂತ್ಯಾಫಾರಾರ್ ಕೊಂಬ್ಯಾನ್ ಸಾದ್ ಘಾಲೊ ಮ್ಹಣ್ತಾನಾ ಎಕಾ ತೆಂಪಾರ್ ಆಮ್ಚೊ ಲೋಕ್ ಭಿಚಾಣ್ಯಾ ವಯ್ಲೊ ಉಟ್ತಾಲೊ. ತವಳ್ ಘಡಿಯಾಳಾಂ ನಾತಲ್ಲಿಂ. ಆಜೂನಯ್ ಘಡಿಯಾಳಾಂ ಆಸೊನಯ್ ಥೊಡ್ಯಾ ಗಾಂವಾಂನಿ ಸಕಾಳಿಂಚೆಂ ಎಲಾರ್ಮ್ ಮ್ಹಳ್ಯಾರ್ ಕೊಂಬ್ಯಾಚೊ ಸಾದ್.
ಹೆ ಕವಿತೆಂತಯ್ ಸದಾಂಚೊ ಕೊಂಬ್ಯಾಚೊ ಸಾದ್ ಸಾದನಾತ್ಲ್ಯಾ ವೆಳಾರ್ ಕಿತೆಂ ಜಾಲೆಂ ಮ್ಹಳ್ಳೆವಿಶಿಂ ಕವಿ ಆರ್ ಎಸ್ ಭಾಸ್ಕರನಾನ್ ವಿವರಾಯ್ಲಾಂ. ಕವಿತಾ ಸುಂದರ್ ಆಸಾ. ಕೊಚ್ಚಿನಚಿ ಶೈಲಿ ಆಸಾ ತಶಿ ದವರ್ಲ್ಯಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಆಂಗವ್ಣೆಚೆಂ ಕುಂಕಡ್
ಫಾಲ್‌ಫಾಲ್ಯಾರ್ ಸದಾಂ ಭಶೆನ್
ಕೊಂಬ್ಯಾ ಸಾದ್ ಆಯ್ಕೂಂಕ್ ನಾಶಿಲ್ಯಾನ್
ವಾಡ್ಯಾವೆಲ್ಯಾ ಲೊಕಾಂಕ್
ಉಟೊಂವ್ಕ್ ಆಜ್ ತಡವ್ ಜಾಲೊ
ವೇಳ್ ವಯ್ರ್ ಸರ್‍ಚೆ ಫುಡೆಂ
ಚಾಲಂತ್ ಜಾವ್ಪಿ ವಾಡೊ
ಆಜ್ ಪುಣ್
ನಿಷ್ಫಳ್ ಉರ್‍ಲಾ
ಧಾರ್ ಕಾಡ್ಪಿ
ಪಾವುಂಕ್ ನಾಶಿಲ್ಲ್ಯಾನ್
ಗೊಟ್ಯಾಂತ್ ಗೊರ್‍ವಾಂ
ವಾಟ್ ಪಳೇತ್ ರಾವ್ಲಿಂ
ಸಾಂತೆರೆಚೆ ಭಟ್
ಉಟುಂಕ್ ನಾಶಿಲ್ಯಾನ್
ದೇವೂಳ್ ಯೆದೊಳ್
ಉಗಡ್ಲೆಂಚ್ ನಾ
ವ್ಹಡೆಂಕಾರ್ ಬಾವ್ಡೊ
ನಿದುನ್ ಆಶಿಲ್ಲ್ಯಾನ್
ವ್ಹಡೆಂ ಆತಾಂ ಮೆರೆನ್
ಉದ್ಕಾಂತ್ ದೆವುಂಕ್ ನಾ
ಪತ್ರ್‌ವಾಲೊ ಚೆಡೊ
ಪಾವುಂಕ್ ನಾಶಿಲ್ಲ್ಯಾನ್
ಸಾಯ್ಕಲಾಚೆಂ ಘಾಂಟೆವಾಜನ್
ಕಾನಾರ್ ಪಡುಂನಾ
ಪಾವ್‌ವಾಲೊ ದಾದಾ
ಯೇಂವ್ಕ್ ನಾಶಿಲ್ಯಾನ್
ದರಾದರಾಂತ್ ಆಜ್
ಉಲ್ಲೊಮಾರ್ ನಾ
ನುಸ್ತೆಕಾರ್ನ್ ಬಾಈ
ಪಾಂವ್ಕ್ ನಾಶಿಲ್ಯಾನ್
ವೊಣಿ ತೊಂಡಾರ್ ಆಜ್
ಬೊವಾಳ್ ಸುರು ನಾ
ದುದ್ಕಾರ್ ಜಾಂವೊ
ಭಾಜಿವಾಲೊ ಜಾಂವೊ
ಕೇರಿಂತ್ ಆಜೂನಯ್
ಹಾಜಿರ್ ನಾಂತ್
ಸಕಾಳ್ ಪಾರಾರ್ ಆಜ್
ಕೊಂಬ್ಯಾನ್ ಸಾದ್ ಮಾರುಂ ನಾಶಿಲ್ಲ್ಯಾನ್
ವಾಡ್ಯಾವೆಲೆ ಲೋಕ್ ಕೋಣ್
ಆಜ್ ಜಾಗೆ ಜಾಂವ್ಕ್ ನಾ
ದೊಂಗ್ರಾವೆಲ್ಯಾ ದೆಂವ್ಚಾರಾಕ್
ಆಂಗವ್ಣ್ ಪಾವ್ಪಾಕ್ ಮ್ಹಣ್
ನ್ಹಯ್ ಅಪ್ರಾಧಿ ಕೊಂಬ್ಯಾಕ್
ಕಾಲ್ ರಾತಿ ಕಾಪುನ್ ದಿಲ್ಲೆಂ
- ಆರ್ ಎಸ್ ಭಾಸ್ಕರ್