ಸಂಪಾದಕೀಯ್:
ಪಾವ್ಸಾಚ್ಯಾ ನಿಬಾನ್ ಪೆಂಟೆಚೆಂ ಗುಣ್‍ಗಾನ್ ಗಾವ್ಪಿ ಕವಿತಾ
ಬಿದ್ರ್ಯಾಂ ಪೆಂಟೆಂತ್ಲೊ ಪಾವ್ಸ್ ವರ್ಣಿತಾನಾ ಕವಿ ಜೊ ಸಿ ಸಿದ್ದಕಟ್ಟೆ ಗಾಂವ್ಚಿಂ ದರಬಸ್ತ್ ತಶೆಂ ಜಬರ್‌ದಸ್ತ್ ರೂಪಕಾಂ ವಾಪರ್‍ತಾ. ಹಿಂ ರೂಪಕಾಂ ಅಪ್ರೂಪ್ ತಶೆಂ ಆಪುರ್ಬಾಯೆಚಿಂ. ತ್ಯಾ ದೆಕುನ್ ಹಿ ಕವಿತಾ ತುಕಾ ಪೊಟ್ಲುನ್ ಧರುನ್ ರಾವ್ತಾ.
ಆನಿ ಹಿಂ ಕಸಲಿಂ ರೂಪಕಾಂ ಮ್ಹಣ್ಚಿಂ? ಚ್ಯಾರ್ ಮ್ಹಯ್ನೆ ಸರ್ಕಾರ್ ಚಲೊಂವ್ಚ್ಯಾ ರಾಜಕಾರಣಿಚೆಂ; ಆಟ್ರಾಂಚ್ಯಾ ಪೊಕ್ರಿ ಚೆಡ್ಯಾಂಚೆಂ; ದುಗ್ಗಪ್ಪಾಚ್ಯಾ ಕೊಡ್ಕ್ಯಾಂತ್ಲೆ ಸುರೆಚೆಂ. ಸಗ್ಳಿಂ ರೂಪಕಾಂ ಮಾತ್ರ್ ಬರೆಂ ಸಾಂಗಿನಾಂತ್. ಇಲ್ಲೆಂ ವಾಯ್ಟ್ ನ್ಹಯ್ ತರ್ ಉಲ್ಟೆಂ ಉಲಯ್ತಾತ್. ಬಿದ್ರ್ಯಾಂತ್ಲೊ ಪಾವ್ಸ್ ಅಸೊ ಕಾಂಯ್ ಕಸೊ?
ಸಗ್ಳೆ ಕವಿತೆಂತ್ ಹ್ಯಾ ಪಾವ್ಸಾ ನಿಮ್ತಿಂ ಕಾಪ್ಯೆ ಕೊಪಾಂತ್ ಉಟ್ಚೆಂ ವಾದಾಳ್ ಆನಿ ಭೊಂಗ್ಚಿ ನೀದ್ ಪ್ರಮುಖ್ ಆಸಾ. ಜೊ ಸಿ ನ್ ಹೆ ಕವಿತೆದ್ವಾರಿಂ ಆಮ್ಚ್ಯಾ ಮನಾಚೆರ್ ದಾಧೊಸ್ಕಾಯೆಚೊ ಪಾವ್ಸ್ ಶಿಂವ್ರಾಯ್ಲಾ. ಹೊ ಖುಶೆಚೊ ಪಾವ್ಸ್!
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಬಿದ್ರ್ಯಾಂ ಪೆಂಟೆಂತ್ಲೊ ಪಾವ್ಸ್
ರಿಮ್‌ಜಿಮ್ ರಿಮ್‌ಜಿಮ್ ನಾಚುಂಕ್ ಲಾಯ್ತಾ
ಬಿದ್ರ್ಯಾಂ ಪೆಂಟೆಂತ್ಲೊ ಪಾವ್ಸ್!
ಪಕ್ಕಾ ರಾಜ್‌ಕಾರಣಿ ಹೊ, ಪಾವ್ಸ್ ಪೆಂಟೆಂತ್ಲೊ
ಆನಿ ಚಾರ್ ಮ್ಹಯ್ನೆ ತೊಚ್ ಸರ್ಕಾರ್, ತಾಚೊಚ್ ದಳ್ಬಾರ್
ದೀಶ್ಟ್ ಆಮ್ಚಿ ಖೊವಂವ್ಕ್ ಲಾಯ್ತಾ ಥಂಯ್ಚ್ ಮೊಳ್ಭಾರ್
ಆಟ್ರಾಂಚೊ ಥೇಟ್ ಪೊಕ್ರಿ ಚೆಡೊ, ಪಾವ್ಸ್ ಪೆಂಟೆಂತ್ಲೊ
ಚೆಡುಂ ಸಾತೆಂ ಸೊಡಯ್ತಾ, ಹೊ ಹಾಸೊನ್ ಫಟಯ್ತಾ
ತೆಂ ಸಾತೆಂ ದೊಡಿತಾ, ಹೊ ಘಡ್ಯೆನ್ ಭಿಜಯ್ತಾ
ದುಗ್ಗಪ್ಪಾಚ್ಯಾ ಕೊಡ್ಕ್ಯಾಂತ್ಲಿ ಸುರ್ ಹೊ, ಪಾವ್ಸ್ ಪೆಂಟೆಂತ್ಲೊ
ಚೊಯ್ತಾಂ-ಚೊಯ್ತಾನಾಂಚ್ ಆಮಾಲ್ ಚಡಯ್ತಾ
ಮಾಗಿರ್‌ಯಿ ರಾವ್ಲ್ಯಾರ್ ರಿಣಾನ್ ಬುಡಯ್ತಾ
ಪಾಕ್ಯಾರ್ ನೆರಾಂವ್ಚ್ಯಾ ಕಾವ್ಳ್ಯಾಕೀ ಫಟಂವ್ಚೊ ಸಯ್ರೊ ಪಾವ್ಸ್ ಪೆಂಟೆಂತ್ಲೊ
ಕಾಪ್ಯೆ ಕೊಪಾಂತ್ ಅವ್ಚಿತ್ ವಾದಾಳ್ ಉಟಯ್ತಾ
ದಿಸ್ಪೊಡ್ತ್ಯಾ ವ್ಹಾಳ್ಯಾಂತ್ ಬುಡ್‌ಲ್ಲ್ಯಾಚಿ ನೀದ್ ಭೊಂಗಯ್ತಾ
ರಿಮ್‌ಜಿಮ್ ರಿಮ್‌ಜಿಮ್ ನಾಚುಂಕ್ ಲಾಯ್ತಾ
ಬಿದ್ರ್ಯಾಂ ಪೆಂಟೆಂತ್ಲೊ ಪಾವ್ಸ್!
- ಜೊ. ಸಿ. ಸಿದ್ದಕಟ್ಟೆ