ಸಂಪಾದಕೀಯ್:
ಭೃಮರಾಕ್ `ಏಡ್ಸ್' ಲಾಗನಾ ಮ್ಹಣೊನ್ ಮನ್ಶಾಕ್ ಕಶೆಂ ಕಳಿತ್?
ಮನು ಬಾಹ್ರೇನ್ ಎಕ್ಲೊ ಕಾದಂಬರಿಕಾರ್ ಜಾವ್ನ್ ಸಾಹಿತ್ಯ್ ವರ್ತುಲಾಂತ್ ವೊಳ್ಕಿಚೊ. ಅಪ್ರೂಪ್ ಕವಿತಾ ಲಿಖ್ತಾ. ತಾಚ್ಯೊ ಕವಿತಾ ಪ್ರಕೃತೆಚೆರಚ್ ವಿಣಲ್ಲ್ಯೊ ಆಸ್ತಾತ್. ಹಾಕಾ ಕಾಂಯ್, ಆಪ್ಲ್ಯಾ ಜಿವಿತಾಚ್ಯಾ ಗರ್ಜೆಚ್ಯಾ ಪಾಂವ್ಡ್ಯಾಂನಿ, ತಾಣೆಂ ಜಿಯೆಲ್ಲೊ ಭೊಂವಾರ್ ಕಾರಣ್ ಆಸೊಂಕ್ ಪುರೊ. ತೊ ಪ್ರಕೃತೆ ಥಂಯ್, ಸುಕ್ಣ್ಯಾ ಸಾವ್ಜಾಂ ಥಂಯ್ ವೊಡುನ್ ಗೆಲಾ ತೆಂ ತಾಣೆಂ ಅಪ್ರೂಪಾನ್ ಲಿಖ್ಚ್ಯೊ ಕವಿತಾ ಮಾತ್ರ್ ನ್ಹಯ್, ಕಾದಂಬರಿ ವಾಚ್ತಾನಾ ಸೈತ್ ಝಳ್ಕೆಕ್ ಯೆತಾ.
ಹಾಂಗಾಸರ್ ಭೃಮರಾವಿಶಿಂ ತೊ ಲಿಖ್ತಾ. ಆಮ್ಕಾಂ ಕಳಿತ್ ಆಸಲ್ಲೊ ವಿಷಯ್. ಪುಣ್ ಹಾಂಗಾ ದಿಲ್ಲೆ ಥೊಡೆ ವಿಚಾರ್ ವೆಗ್ಳೆ, ಅಪ್ರೂಪಾಚೆ.
ಮನ್ಶಾಂಕ್ `ಏಡ್ಸ್' ಲಾಗ್ತಾ ಮ್ಹಣೊನ್ ಭೃಮರಾಕ್ ತಿ ಲಾಗಜೆ ಮ್ಹಣೊನ್ ಆಸಾ? ತಿ ಲಾಗ್ತಾ ಜಾಂವ್ಕಯ್ ಪುರೊ. ಪುಣ್ ಕೊಣೇಂಯ್ ಸೊಧುನ್ ಕಾಡುಂಕ್ ನಾ ಆಸ್ಯೆತ್. ಭೃಮರಾಕ್, ಫುಲಾಂ ಶಿಣನಾಂತ್ ಮ್ಹಣೊನ್ ಮನ್ಶಾಕ್ ಕಶೆಂ ಕಳಿತ್? - ಹಿಂ ಸವಾಲಾಂ ವಾಜ್ಬಿ ಜಾವ್ನ್ ಧೊಸುಂಕ್ ಲಾಗ್ತಿತ್. ಹಿಂ ಸವಾಲಾಂ ಉಟಯಿಲ್ಲ್ಯಾ ಖಾತಿರಚ್, ಹಿ ಕವಿತಾ ವಾಚ್ಯಾಂ ಮ್ಹಣೊನ್ ಜಾತಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಭೃಮರ್
ಸಭಾರ್ ಫುಲಾಂಚೆಂ
ಮ್ಹೊಂವ್ ಚಿಂವ್ಚ್ಯಾ ಏ ಭೃಮರಾ
ಫುಲಾ ಥಾವ್ನ್ ಫುಲಾಕ್ ಸಂಪರ್ಕ್ ಕರ್‍ಚ್ಯಾ ಸರ್ದಾರಾ
ತುಕಾ ಕೊಣೀ `ಅತ್ತ್ಯಾಚಾರಿ' ಮ್ಹಣನಾಂತ್
ತುಕಾ ಖಂಯ್ಚೀಂಯ್ ಫುಲಾಂ ಶಿಣನಾಂತ್
ತುಕಾ ಖಂಯ್ಚೀಯ್ ಪಿಡಾ ಲಾಗ್ಚಿ ನಾ
`ಏಡ್ಸ್' ತುಜೆಲಾಗಿಂ ಪಳೆಂವ್ಚಿ ನಾ
ತುಕಾ ಫುಲಾಂಚಿ ಜಾತ್ ಧರ್ಮ್ ಕಳಿತ್ ನಾ
`ಉಸ್ಟೊ' ತುಂ, ಅಬ್ಲೆಶಿ ತುಂ
ತುಂವೆಂ ಚಿಂವಲ್ಲ್ಯಾ ಮ್ಹೊಂವಾನ್ ಖಂಯ್ಚೀಂಯ್ ಫುಲಾಂ
`ವ್ಯಭಿಚಾರಿ' ಜಾಲ್ಲಿಂ ನಾಂತ್
ತುಜ್ಯಾ ಪಾಂಯಾಂನಿ ಗುಡ್ಡಾವ್ನ್ ಹಾಡಲ್ಲೆಂ
ಜೆಂ ಫುಲಾ ಥಾವ್ನ್ ಚಿಂವಲ್ಲೆಂ
ರಾಣಿಯೆಚೆ ಹುಕ್ಮೆಕ್ ಖಾಲ್ ಜಾಂವ್ಚೆಂ
ಕಾಮ್ ತುಜೆಂ ಗುಲಾಮಾಚೆಂ
ವಾವ್ರಾಡಿ ತುಂ ಪಾತ್ಯೆಣೆಚೊ
ದಾತಾರ್ ತುಂ ಪಿಡೆಸ್ತಾಂಚೊ
ಪುರಾಸಾಣ್ ನಾತಲ್ಲೊ ವಾವ್ರ್ ತುಜೊ
ಜೆಂ ಹಾಡ್ತಾಯ್ ತೆಂ ಫೊಳಿಯಾಂನಿ ಜಮೊಂವ್ಚೊ
ಶಿಕಪ್ ನಾತಲ್ಲೊ ತುಂ, ಇಜ್ನೆರಾಂಕ್ ಲಜೆಕ್ ಘಾಲ್ಚೊ
ರುಕಾಫಾಂಟ್ಯಾರ್ ಸಬಾರ್ ಕುಡಾಂಚೆಂ ಘರ್ ಬಾಂದ್ಚೊ
ಘಾತ್ಕ್ಯಾಂಚೊ ಹಾತ್ ಲಾಗ್ಲ್ಯಾರ್ ಚಾಬೊನ್ ಸೊಡ್ಚೊ
ರಾಣಿಯೆಕ್ ತುಜ್ಯಾ ಸಾಂಬಾಳ್ನ್ ವ್ಹರ್‍ಚೊ
ಜಮಯಿಲ್ಲೆಂ ಅಮೃತ್ ಮನ್ಶಾಂಕ್ ದಿಂವ್ಚೊ
ಜೀವ್ ತರೀ ದೀವ್ನ್, ರಾಣಿಯೆಕ್ ಬಚಾವ್ ಕರ್‍ಚೊ
ಭೃಮರ್ ತುಂ!
-ಮನು ಬಾಹ್ರೇನ್