ಸಂಪಾದಕೀಯ್:
ಝುಜಾಂ ನಾಸ್ತಾನಾ ಹಾಂಗಾಸರ್ ಮೊಡಿಂ ಪಡ್ತಾತ್
ಮೊಗಾಂತ್ ಅಶೆಂಚ್ ಘಡ್ತಾ. ಝುಜಾಂವಿಣೆಂ ಮೊಡಿಂ ಪಡ್ತಾತ್. ಮೋರ್ನ್ ಕರುಂಕಯ್ ಗತ್ ಆಸನಾ. ತಶೆಂ ಜಾಲಾಂ ಹೆ ಕವಿತೆಂತ್! ಉಬೆಖಾತೀರ್ ಹೊ ಮನೀಸ್ ಆಶೆತಾ. ಮಾಗೀರ್ ಆಶೆಲ್ಲಿ ಊಬ್ ಮೆಳನಾತ್ಲ್ಯಾ ವೆಳಾರ್ ಸಿಗ್ರೆಟ್ ಜಳಯ್ತಾ. ಪುಣ್ ಸಿಗ್ರೆಟಿಚಿ ಊಬ್ ಪೊಪ್ಸಾಂ ಜಳಯ್ತಾ ಸೊಡ್ಲ್ಯಾರ್ ಮೊಗಾಚಿ ತಾನ್ ಖಂಯ್ ನಿಂವಯ್ತಾ?
ಪ್ರಸನ್ನ್ ನಿಡ್ಡೋಡಿ ಸಬಾರ್ ಕಾಳಾ ಉಪ್ರಾಂತ್ ಕವಿತಾ ಕುಳಾರಾಕ್ ಆಯ್ಲಾ. ತಾಚೆ ಕವಿತಾ ರಚ್ಣೆಂತ್ ಖೂಬ್ ಬದ್ಲಾವಣ್ ಜಾಲ್ಲಿ ದಿಸ್ತಾ. ಹಿಂ ಬರಿಂ ಲಕ್ಷಣಾಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ತಾನ್
ವೊತಾ ದಾವೆಚೆ ಉಬೆಂತ್
ಸುಕಲ್ಲ್ಯಾ ಗಳ್ಯಾಚೆ ಕರ್ಕಸ್ ಕೊನ್ಶೆ
ಶೆಳೆಕ್ ಲಾಲೆವ್ನ್ ಭಾಯ್ರ್ ತಿಳ್ತಾತ್
ತಾನ್ ಭಾಗಂವ್ಕ್...
ತಾನ್ ಮ್ಹಜಿ
ವಿಶೇಸ್ ಥರಾಚಿ.. ಆಂತರಿಕ್ ಭೊಗ್ಣಾಂಚಿ
ಮತಿ ಪಡ್ದೊ ಫುಟೊನ್
ಸಪ್ಣಾಂ ಋತುಂತ್ ಭಿಜೊನಯ್
ಕೆದ್ನಾಂಚ್ ಸಾರ್ಥಕ್ ಜಾಯ್ನಾತ್ಲಿ!
ತಾನ್, ತುಜೆ ಉಬೆಚಿ
ತುಜ್ಯಾ ಸಪ್ಣಾಂಚಿ
ತುಜೆ ವೆಂಗೆಚಿ
ತುಜ್ಯಾ ಉಗ್ಡಾಸಾಚಿ
ತುಜ್ಯಾಚ್ ಭೊಗ್ಣಾಂಚಿ
ತುಜ್ಯಾ ಮೊಗಾಚಿ
ಚಿಂತ್ನಾಂ ಸಾಗೊರಾಂತ್
ಹಜಾರ್ ಸಿಗ್ರೆಟ್ಯೊ ಜಳ್ಳ್ಯೊ
ಧುಂವೊರ್ ಸ್ವಾಸಾಂತ್ ಜಿರ್‍ಲೊ
ತರೀ,
ತಾನ್ ಭಾಗ್ಲಿನಾ
ಭೊಗ್ಣಾಂನಿ ಮಿಸ್ಳಲ್ಲ್ಯಾ
ಮ್ಹಜೆ ನಿರ್ಜೀವ್ ಕುಡಿಚೊ
ಅಂತಿಮ್ ಸಂಸ್ಕಾರ್ ಜಾಲೊಚ್ ನಾ
-ಪ್ರಸನ್ನ್, ನಿಡ್ಡೋಡಿ