ಸಂಪಾದಕೀಯ್:
ಜಿವಿತಾಚ್ಯಾ ಪಯ್ಣಾರ್ ಕಿತ್ಲೆಂ ಬರೆಂ ಮೆಳ್ತಾ?
ಜಲ್ಮ್ ಆನಿ ಮರ್ಣಾ ಮಧೆಂ ಜೆಂ ಜಿವಿತ್ ಆಸ್ತಾ, ತ್ಯಾ ಜಿವಿತಾಚ್ಯಾ ಪಯ್ಣಾಚಿ ಕವಿತಾ ಹಿ. ಹ್ಯಾ ಪಯ್ಣಾರ್ ಜಾಯ್ತ್ಯಾ ನಿಲ್ದಾಣಾಂನಿ ರಾವಜಾಯ್ ಪಡ್ತಾ, ಜಾಯ್ತ್ಯಾ ಅತರ್ವಣಾಂಚ್ಯಾ ತಳ್ಯಾಂನಿ ಉಪ್ಯೆಜಾಯ್ ಪಡ್ತಾ. `ವೊಂಪಲ್ಲೆಂಚ್ ಲುಂವ್ಚೆಂ' ಸೊಡ್ಲ್ಯಾರ್ ಹ್ಯಾ ಜಿವಿತಾಚೆ ಯಶಸ್ವೆಕ್ ದುಸ್ರಿ ವಾಟ್ ನಾ.
ಆಶಾ ಪಿಂಟೊಚ್ಯೊ ಕವಿತಾ ಸಭಾರ್ ತೆಂಪಾ ಆದಿಂ ಆಮಿ ಕವಿತಾ ಕುಳಾರಾಚೆರ್ ಪರ್ಗಟ್ ಕೆಲ್ಲ್ಯೊ. ಕವಿತಾ ಬರೊಂವ್ಚಿ ತಾಂಕ್ ತಿಕಾ ಜರೂರ್ ಆಸಾ. ಆಪುರ್ಬಾಯೆನ್ ವೊಳಿ ಮಾಂಡುನ್ ದವ್ರುಂಕ್ ತಿಕಾ ಕೊಣೇಂಯ್ ಶಿಕಯ್ಜಾಯ್ ಮ್ಹಣೊನ್ ನಾ. ಪುಣ್ `ಸದಾಂ ಆಯ್ಕೊಂಚ್ಯಾ' ತಶೆಂ `ಯೆದೊಳ್ ಆಯ್ಕನಾತಲ್ಲ್ಯಾ' ವಿಷಯಾಂ ಮಧೆಂ ಫರಕ್ ಕರುಂಕ್ ಕೆದಳಾ ತಿ ಸಕ್ತಲಿ, ತವಳ್ ಅವ್ವಲ್ ಕವಿತಾ ತಿ ಆಮ್ಕಾಂ ದೀಂವ್ಕ್ ಸಕ್ತಲಿ ಮ್ಹಣ್ಚ್ಯಾಂತ್ ಕಾಯಿಂಚ್ ದುಬಾವ್ ನಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಪಯ್ಣ್
ನೆಣಾ ಜಾಲಿ ಕಶಿ ಸುರ್ವಾತ್ ಹ್ಯಾ ಪಯ್ಣಾಚಿ
ಖಂಯ್ಚಿ ತಿ ಘಡಿ ಮ್ಹಾಕಾ ಗರ್ಭಾಕ್ ಪಾವಯ್ಲಲಿ
ಮುಟಿ ತೆದೆಂ ಕಾಳೀಜ್ ಸಾಂಗ್ತಾ "ತುಂ ಆಸಾಯ್"
"ಹಾಂವ್ ಆಸ್ತಾಂ ಪರ್ಯಾಂತ್ ತುಂ ಆಸ್ತಲೊಯ್"
ಜಶೆಂ ಆರಂಭ್ ತಶೆಂ ಅಂತ್ಯ್ ಕಳಿತ್ ರಚ್ನಾರಾಕ್ ಮಾತ್ರ್
ಹಾಂಚೆ ಮದ್ಲೆಂ ಪಯ್ಣ್ ಧಾಂವ್ಣಿ ನಿರಂತರ್.
ಹ್ಯಾ ಮ್ಹಜೆ ಪಯ್ಣಾ ವಾಟೆರ್ ಕಿತ್ಲಿಂಶಿಂ ನಿಲ್ದಾಣಾಂ
ಚಡ್ಣ್ಯೊ ದೆಂವ್ಣ್ಯೊ ಘುಂವ್ಡ್ಯೊ ಮೆಟಾಂ ಮೆಟಾಂ
ಕಿತ್ಲಿಂಶಿಂ ತೊಂಡಾಂ ಕಿತ್ಲಿಂಶಿಂ ಕಾಳ್ಜಾಂ ಮನಾಂ
ಯೆತಾತ್ ದಿತಾತ್ ಸಾಂಗಾತ್ ಥೊಡ್ಯಾ ಕಾಳಾಕ್
ದೆಂವೊನ್ ಚಲ್ತಚ್ ರಾವ್ತಾತ್ ಮುಕ್ಲ್ಯಾ ನಾಕ್ಯಾರ್
ಶಿಂಪಡ್ಲಲ್ಯೊ ಯಾದಿ ಆರಾವ್ನ್ ಚಲತ್ ವೆತಾಂ.
ಹ್ಯಾ ಪಯ್ಣಾಚೆರ್ ಕಸಲಿಂ ಅತರ್ವಣಾಂ
ಬರ್‍ಯಾ ವಾಯ್ಟಾಚಿಂ ನಿರಂತರ್ ಝುಜಾಂ
ಆಶೆ ನಿರಾಶೆಚಿಂ ಕಾಳಿಂ ಧವಿಂ ಮೊಡಾಂ
ಜೀಕ್ ಸಲ್ವಣೆಚಿಂ ಲ್ಹಾನ್ ವ್ಹಡ್ ಅವ್ಘಡಾಂ
'ಮ್ಹಜಿಂ' ಆನಿ 'ತಾಂಚಿಂ' ಥರಾವಳ್ ಪಂಗಡಾಂ
ವಾಂಟ್ಯಾಕ್ ಆಯಿಲ್ಲೆಂ ಆರಾವ್ನ್ ಚಲತ್ ವೆತಾಂ.
ಕೆದೊ ವ್ಹಡ್ ಸಂಸಾರ್ ... ಕಿತ್ಲೊ ಗಿರೇಸ್ತ್
ಬರೆಂ ಆಸ್ಲೆಂ ಭರುಂ ಮ್ಹಜೆಚ್ ಪೊತಿಯೆಂತ್
ನಾ ಪರ್ವಾ ಕೊಣಾಯ್ಚಿ ರಚ್ನೆ ಯಾ ರಚ್ನಾರಾಚಿ
ಹಟ್ ಗರ್ವ್ ಹಂಕಾರ್ ಹಾತೆರಾಂ ಸಂಸಾರ್ ಜಿಕ್ಚಿಂ
ಸಕ್ಡಾಂ ಪ್ರಾಸ್ ಊಂಚ್ ಅವ್ವಲ್ ಹಾಂವಚ್ ಹಾಂಗಾ
ಕಾಂಟ್‍ಭರ್ ಸ್ವಾರ್ಥ್ ಆರಾವ್ನ್ ಚಲತ್ ವೆತಾಂ.
ಕಾಳ್ಜಾ ಉಡಿ ಜಾಲ್ಯಾ ಉಣಿಂ, ಕಾಳೀಜ್ ಜಾಲಾಂ ಅಸ್ಕತ್?
ಧಾಂವ್ಣೆ ವೇಗ್ ಜಾಲಾ ಉಣೊ ಮಾತ್ಶೆಂ ರಾವೊಂಕ್ ಜಾಯ್ತ್?
ರಾವೊನ್ ಪಳೆತಾಂ ಘುಂವೊನ್ ಚಲೊನ್ ಆಯಿಲ್ಲಿ ವಾಟ್
ಫುಲಾಂ ಭೋವ್ ಥೊಡಿಂ ಕಾಂಟೆ ಖುಂಟೆಚ್ ಚಡ್
"ವೊಂಪಲ್ಲೆಂಚ್ ಲುಂವ್ತಲೊಯ್" ಕೆದೆಂ ಸಾದೆಂ ಸತ್.
ಆರಾಯ್ಲೆಲೆಂ ಶಿಂಪಡ್ಲಾಂ ಪರತ್ ಭರುಂಕ್ ಜಾಯ್ತ್?
ರಿತೆ ಹಾತ್ ಹರ್ಧ್ಯಾರ್ ಜೊಡುನ್ ಸ್ತಬ್ದ್ ನಿದ್ಲಾಂ ಹಾಂವ್
ಜಿಣ್ಯೆ ಪಯ್ಣ್ ಗೆಲಾಂ ಸಂಪೊನ್ ಪರತ್ ಮೆಳತ್ ಜಲ್ಮ್?
-ಆಶಾ ಪಿಂಟೊ