ಕವಿತಾ ಮುಕ್ತ್ ಛಂದಾಂತುಲಿ

ಸಂಪಾದಕೀಯ್:

ಮುಕ್ತ್ ಛಂದಾಚೆ ಕವಿತೆಚೆ ಸೊದ್ನೆರ್

ಅರುಣಾ ರಾವ್ ಕುಂದಾಜೆ ಆಪ್ಲೆ ಪ್ರಾಯೆ ತೆಕಿದ್ ಪ್ರಾಸಾಂಚ್ಯಾ ಕವಿತೆಂಕ್ ವೊಳ್ಸಲ್ಲಿ ಕವಯಿತ್ರಿ.  ಆಯ್ಲೆವಾರ್ ಮುಕ್ತ್ ಛಂದಾಚ್ಯೊ ಕವಿತಾ ಲೊಕಾಮೊಗಾಳ್ ಜಾವ್ನ್ ಯೆತಾನಾ ತಿ ಕಾಂಯ್ ಗುಸ್ಪಡ್ಲ್ಯಾ ಆಸ್ತಲಿ ಆನಿ ಆಪ್ಣಾಕಚ್ ಸವಾಲ್ ಕರ್ನ್ ಘೆವ್ನ್ ಜಾಪ್ ಸೊದ್ಚೆಂ ಪ್ರೇತನ್ ಕೆಲ್ಲೆಂ ಹಾಂಗಾಸರ್ ದಿಸ್ತಾ.

ಜಾಪ್ ಸೊಧುಂಕ್ ವಚೊನ್ ಕಿತೆಂ ಜಾತಾ? ಏಕ್ ಆಪುರ್ಬಾಯೆಚಿ ಕವಿತಾ, ಜಿ ಸಗ್ಳಿ ರೂಪಕಾಂನಿ ಭರ್‍ಲ್ಯಾ, ತಿ ಆಮ್ಕಾಂ ತಿಣೆಂ ದಿಲ್ಯಾ.

ಅರುಣಾ ರಾವಾಕ್ ಕವಿತಾ ಟ್ರಸ್ಟಾನ್ ದಿಂವ್ಚೊ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್ ತೀನ್ ವರ್ಸಾಂ ಆದಿಂ ಫಾವೊ ಜಾಲಾ. ಮುಂಬಂಯ್ತ್ ತಿ ವಸ್ತಿ ಕರ್‍ತಾ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಕವಿತಾ ಮುಕ್ತ್ ಛಂದಾಂತುಲಿ

ಕವಿತಾ ಮುಕ್ತ್ ಛಂದಾಂತುಲಿ ಕಶಿ ಆಸ್ತಾ?
ಸಮ್ಜನಾ, ಉಮ್ಜನಾ
ಕವಿತಾ ಮುಕ್ತ್ ಛಂದಾಂತುಲಿ ಕಶಿ ದಿಸ್ತಾ?
ಕಳ್ನಾ, ವಳ್ನಾ

ಆಕಾಶಾಂತು ಕ್ರೌಂಚ್ ಪಕ್ಷಾ ಮ್ಹಣ್ಕೆ ಉಬ್ತಲಿ?
ಶಬ್ದಾಂಕ್ ಪಾಕ್ಕಾಂ ಲ್ಹಾವ್ನು?
ಶ್ರಾವಣಾಂತ್ಲ್ಯಾ ಝೊಪಾಳ್ಯಾ ಮ್ಹಣ್ಕೆ ವಲ್ಲೆ ಹವೆಂತ್ ಹಿಂದೊಳ್ತಲಿ?
ವಾರ್‍ಯಾರ್ ಕಲ್ಪನಾ ಝುಳೊವ್ನು?
ಪಾಳ್ಣ್ಯಾಂತುಲ್ಯಾ ಬಾಳಾಕ್ ವಿಂದುಳ್ತಲಿ?
ಶಬ್ದ್ ಸಂಥ್ ಸ್ವರಾಂತು ಉಚ್ಚಾರುನು?
ಮೊಗ್ರೆಂ ಫುಲ್ಲೆಲ್ ಮ್ಹಣ್ಕೆ ಫುಲ್ತಲಿ?
ಅಕ್ಷರಾಂ ಪೂರ್ಣ್ ಫುಲ್ಲೊವ್ನು?
ತಳ್ಯಾರ್ ಪೊಂವ್ತಲ್ಯಾ ಪಾನ್ನಾವರಿ ಪೊಂವ್ತಲಿ?
ಮುಕ್ತ್ ಲಯಿಂತು?
ಸಾಂವರಿ ಕಾಪ್ಸಾವರಿ ಹವೆಂತು ತರಂಗ್ತಲಿ?
ಅಕ್ಷರಾಂ ಸುಟ್ಟೋವ್ನು?
ಕೀ ನೃತ್ಯಾಂಗನೆಚ್ಯಾ ಪಾಂಯ್ಜಣಾಂಚ್ಯಾ ಪಾವ್ಲಾಂ ಮ್ಹಣ್ಕೆ ಋಣ್‍ಝುಣ್ತಲಿ?
ಲಯಬದ್ಧ್ ಜಾವ್ನು?

ಕವಿತಾ ಮುಕ್ತ್ ಛಂದಾಂತುಲಿ ಕಶಿ ಆಸ್ತಾ?
ಸಮ್ಜನಾ, ಉಮ್ಜನಾ

-ಆರುಣಾ ರಾವ್, ಕುಂದಾಜೆ