ಸಂಪಾದಕೀಯ್:
ಫ್ಲೆಟಾಂಕ್ ಹಿತಲ್ ನಾ, ಮಾಗೀರ್ ಫುಲಾಂ ಖಂಯ್ಚಿಂ?
ಮೊಂತಿ ಮಾಯೆಚೆಂ ಫೆಸ್ತ್ ಧಾರ್ಮಿಕ್ ಆಚರಣ್ ಮ್ಹಣ್ಚ್ಯಾಕಯ್ ಸಾಂಸ್ಕೃತಿಕ್ ಆಚರಣ್ ಮ್ಹಣುಂಯೆತಾ. ಕ್ರಿಸ್ತಾಂವಾಂನಿ ಸಂಸ್ಕೃತಿಚೊ ಥೊಡೊ ತರೀ ಮೋಗ್ ದಾಕಂವ್ಚೊ ಉರ್ಲಾ ಜಾಲ್ಯಾರ್ ತೊ ಹ್ಯಾ ಫೆಸ್ತಾ ಮುಕಾಂತ್ರ್ ಮಾತ್ರ್. ಹ್ಯಾವೆಳಾ ಫುಲಾಂ ಆನಿ ರಾಂದ್ವಯೆವಿಶಿಂ ಆಮ್ಚಿಂ ಮನಾಂ ಸಂತೊಸಾನ್ ಫುಲ್ತಾತ್. ಆಮ್ಕಾಂ ಕುಡಿಕ್ ತಶೆಂ ಮತಿಕ್ ಸುಖ್ ದಿಂವ್ಚ್ಯಾ ಫುಲಾಂ-ತರ್ಕಾರಿಚೊ ಥೊಡೊ ತರೀ ಗುಂಡಾಯೆನ್ ಆಟೊವ್ ಕರುಂಕ್ ಹೊ ಏಕ್ ಆವ್ಕಾಸ್.
ಮನು ಬಾಹ್ರೇನಾನ್ ಹಾಂಗಾಸರ್ ಚಡಾವತ್ ಸರ್ವಯ್ ಫುಲಾಂಚೊ ಉಲ್ಲೇಕ್ ಕೆಲಾ. ಶಿಂವ್ತಿಂ, ಆಬೊಲಿಂ, ಧಸ್ಮಿ, ಡೇಲಿಯಾ, ಝೀನಿಯಾ, ಪಾಂಚ್ ಪಾಕ್ಳ್ಯೊ, ಜಿಡ್ಡೆ ಇತ್ಯಾದಿ ಇತ್ಯಾದಿ. ಆದಿಂ ಆಮಿ ಭುರ್ಗಿಂ ಹಿಂ ಫುಲಾಂ ಜೊಡ್ಚೆ ಖಾತೀರ್ ಹಿತ್ಲಾಂ, ಹಿತ್ಲಾಂ ಭೊಂವ್ತಲ್ಯಾಂವ್; ಜಳಾರಿಂಚೆ ಮಾರ್ ಖಾತಲ್ಯಾಂವ್. ಆತಾಂ ಫುಲಾಂಚೆ ಪೆಂಟೆಂತ್ಲಿಂ ಫುಲಾಂಚ್ ಯೆತಾತ್ ಜಾಂವ್ಕ್ ಪುರೊ. ಆಮಿ ಫ್ಲೆಟಾಂನಿ ರಾವ್ತಾಂವ್ ಜಾಲ್ಲ್ಯಾನ್ ಹಿತ್ಲಾಂವಿಶಿಂ ಚಿಂತ್ಚೆಂ ತರೀ ಕಶೆಂ?
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ನಮಾನ್ ಮೊಂತಿ ಮಾಯೆ
ಹಾಂವೆಂ ಗುಂತ್ಲೊ ಫುಲಾಂಚೊ ಝೆಲೊ
ಮೊಂತಿ ಮಾಯೆಕ್ ಸಹಜ್ ಜಾಲ್ಲೊ
ಶಿಂವ್ತಿಂ, ಆಬೊಲಿಂ, ಜಿಡ್ಡ್ಯಾಂ ಮಧೆಂ ಗುಲೊಬ್ ಫುಲಲ್ಲೊ
ಧಸ್ಮಿ, ಡೇಲಿಯಾ, ಗೊಂಡ್ಯಾಂಚೊ ಸುವಾದ್ ಆಯ್ಲೊ!
ಧಾಂವ್ಲಿಂ ಹಾಂವ್ ಹಿತ್ಲಾಂನಿ, ಶೆಜಾರ್‍ಚ್ಯಾ ಘರಾಂನಿ
ವಿಂಚ್ಲಿಂ ಫುಲಾಂ, ಪಾಂಚ್ ಪಾಕ್ಲ್ಯೊ, ವಾಗಾ ನಾಕ್ಷಾಂನಿ
ಪಾವ್ಲಾಂ ಘಾಲಿಂ, ಉಡ್ಡೊನ್ ಖುಂಟ್ಲಿಂ, ಕಾಂಟಿಯೆ ಬೊಲ್ಯಾಂನಿ
ವೋಂಯ್ ದೆಗೆನ್ ಫುಲ್ಲ್ಯಾಂತ್ ಚಾಂಫಿಂ ಪರ್ಮಳಾಂನಿ
ಘರಾ ಆಂಗ್ಣಾಂತ್ ಫುಲ್ಲಾಂ `ಸುಗಂಧಿ' ಸಂತೊಸಾನ್
ಆಪ್ಣಾಕಯ್ ವ್ಹರ್ತಾತ್ ಕರುಂಕ್ ಮರಿಯೆಕ್ ಮಾನ್
ಮಿಟಾಯ್ ಫುಲಾಂ, ಚಿಕೊಳಿಂ, ಉಂದ್ರಾಕಾನ್
`ಝೀನಿಯಾ' ಮ್ಹಣ್ತಾ ಆಪುಣಯ್ ಯೆತಾಂ ತುಮ್ಚ್ಯಾ ಸಾಂಗಾತಾನ್
ಕೆದಾಂತ್ಲೆಂ `ಸಾಳಕ್' ಆಶೆತಾ ರೂಪ್ ಪಳೆಂವ್ಕ್ ಮರಿಯೆಚೆಂ
ಮ್ಹಾಕಾಯ್ `ಖುಂಟಾ' ಫುಲ್ ಹಾಂವ್ ಭಾರತ್ ರಾಷ್ಟ್ರಾಚೆಂ
ಆಯ್ಕಲೆಂ ರುದಾನ್ ಕೊಂಬ್ಯಾ ಶೆಂಕಾರ್‍ಯಾಚೆಂ
ಬಶಿಯೆಂತ್ ತುಮ್ಚ್ಯಾ ಪಯ್ಲೆಂ ಸ್ಥಾನ್ ಆಸೊಂದಿ ಮ್ಹಜೆಂ
ಗಾವ್ಯಾಂ ಆಮಿ ಸಕ್ಕಡ್ ಸಾಂಗಾತಾ ಮೆಳೊನ್
ಪೃಥ್ವಿ ಸೊಭ್ತಾ ಪಾಚ್ವೆಂ ಕಾಪಡ್ ನ್ಹೆಸೊನ್
ಕಣ್ಶಿ ಫುಟ್ಲ್ಯಾ, ಭಿಂಗಾರಿ ಫುಲ್ಲ್ಯಾ ವ್ಹಡಾ ಸಂತೊಸಾನ್
ವಂದನ್ ಕರ್‍ತಾಂ ಮೊಂತಿ ಮಾಯೆ ತುಕಾ ಸರ್ಪಡೊನ್
-ಮನು ಬಾಹ್ರೇನ್