ಸಂಪಾದಕೀಯ್:
ದೆವಾಕ್ ಖಬಡ್ದಾರ್ ಕರ್ಚಿ ತಾಂಕ್ ಸರ್ವಾಂಕ್ ಆಸನಾ
ಪಾವ್ಸಾವಿಶಿಂ ಚಾಫ್ರಾನ್ ಬರಯಿಲ್ಲಿ ಅವ್ವಲ್ ಕವಿತಾ ಹಿ. ಹಾಂಗಾ ದೇವ್, ಪ್ರಕೃತಿ ಆನಿ ಮನೀಸ್ ಹಾಂಚೆ ಮಧ್ಲೊ ವಿವರಾಂವ್ಕ್ ಜಾಯ್ನಾತಲ್ಲೊ ಅಪ್ರೂಪ್ ಸಂಬಂಧ್ ಆನಿ ಮಾಗೀರ್ ಜ್ಯಾ ಸುತಾಚೆರ್ ಹೊ ಸಂಬಂಧ್ ಬಾಂದುನ್ ಹಾಡ್ಲಾ ತಾಚಿಂ ಖೆಳ್ಕುಳಾಂ ಜಾತಾನಾ, ಕವಿನ್ ದಿಂವ್ಚೆಂ ಫೈಸಲ್ ಆಸಾ.
ಚಾ.ಫ್ರಾ. ನ್ ಕೆದಳಾಯ್ ಆಪ್ಲ್ಯೊ ಕವಿತಾ ಖಂಯ್ಚ್ಯಾ ವರ್ಸಾಂನಿ ಬರಯಿಲ್ಲ್ಯೊ ಮ್ಹಣೊನ್ ದಾಖಲ್ ಕೆಲ್ಲೆಂ ನಾ. ಪುಣ್ ತ್ಯೊ ಪರ್ಗಟ್ ಜಾಲ್ಲ್ಯಾ ಪತ್ರಾಂಚಿ ತಾರೀಕ್ ಪಳೆವ್ನ್ ಎಕಾ ನಿರ್ಧಾರಾಕ್ ಯೇಂವ್ಕ್ ಜಾತಾ. ಹೆ ಕವಿತೆಕ್ ಚಡುಣೆ ಪಂಚ್ವೀಸ್ ವರ್ಸಾಂ ಭರ್ಲಿಂ.
ಚಾಫ್ರಾನ್ ಹಿ ಕವಿತಾ ವಾಚ್ತಾಸ್ತಾನಾ ಜಾಯ್ತೆ ಪಾವ್ಟಿಂ ಹಾಂವ್ ಹಾಜರ್ ಆಸಲ್ಲೊಂ. ಆನಿ ಹೆ ಕವಿತೆಚ್ಯೊ ನಿಮಾಣ್ಯೊ ವೊಳಿ ‘ಜಾಯ್ಜೆ ಜಾಯ್ಜೆ ತುಕಾ’ ಮ್ಹಣ್ತಾನಾ ಹಾಂವ್ ಹಾಸ್ಲಾಂ -ತಾಂತ್ಲ್ಯಾ ಹಾಸ್ಯಾಕ್ ನ್ಹಯ್, ಪುಣ್ ದೆವಾಕ್ ಖಬಡ್ದಾರ್ ಕರ್ಚೆ ತಾಚೆ ತಾಂಕಿಕ್ ಮೆಚ್ವೊನ್.
ಹೆ ಕವಿತೆ ಸಾಂಗಾತಾ ‘ನತಾಲಾಂಚಿ ಭೆಟ್’ ಆನಿ ‘ಉಮೊ’ ಅಶೆಂ ಚಾಫ್ರಾಚ್ಯೊ ದೋನ್ ಚಡ್ತಿಕ್ ಕವಿತಾ ಬೋನಸ್ ಜಾವ್ನ್ ದಿಲ್ಯಾತ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಸರ್ಗಾವಯ್ಲಿ ಪಿಂರ್ಗಣ್
ಜ್ಯೂನ್ ಜೂನ್ ಜಾತಾಸರಿ
ಪಾವ್ಸ್ ನಾತ್ಲೊ ಪೊರುಂ
ಫಾತರ್ ಜಾವ್ನ್ ಗೆಲ್ಲ್ಯೊ ಝರಿ
ತಾನೆತಾಲೆಂ ಗೊರುಂ
ಭುರ್ಗ್ಯಾ ಬಾಳಾಂಚೇಂಯ್ ರಡ್ಣೆಂ
ಸರ್ಗಾಕ್ ಕರಿ ವಿರಾರ್
ದಿವ್ಳಾಂತ್ ಆಸ್ಲೆಂ ಸದಾಂ ಮಾಗ್ಣೆಂ
ಖಂತಿ ತೊಂಡಾರ್ ರಜಾರ್
ಮಾಗೀರ್‍ಮುಂಗಾ ಪಾವ್ಸ್ ಆಯ್ಲೊ
ಪಯ್ಸ್ ಜಾಲಿಂ ಖರ್ಗಾಂ
ರೈತಾನ್ ರೊಕ್ಡೊ ರೊಂಪೊ ರೊಯ್ಲೊ
ಸರ್ಗಿಂ ದೆವಾಕ್ ಅರ್ಗಾಂ
ದೆವಾ! ತುಜೊ ಹಾತ್ ಪೊಟಾರ್
ತೃಪ್ತೆ ಹಾಸೊ ನಾಕಾ
ಧೆಂಕ್ ಖೆಳ್ಟಾ ತುಜ್ಯಾ ವೊಂಟಾರ್
ಆಯ್ಕತಾಲೊ ಮ್ಹಾಕಾ
ಜ್ಯೂನ್ ಕಾಂದ್ಯಾಂತ್ ಆಸ್ತಾಸ್ತಾನಾ
ಆಂವ್ದುಂ ಪಾವ್ಸ್ ಆಯ್ಲೊ
ದೇವ್ ಆಶೆನ್ ತಿಳ್ತಾಸ್ತಾನಾ
ದಿವ್ಳಾಂತ್ ಕೊಣಯ್ ನಾತ್ಲೊ
ಮಾಗ್ಣೆಂಯ್ ನಾ, ರಜಾರ್ ನಾ
ಖಂಯ್ಚ್ಯಾ ನರಾಕ್ ವರ್ಗತಾ?
ಅರ್ಗಾಂಯ್ ನಾ, ಕಾಂತಾರ್ ನಾ
ದೇವ್ ಸರ್ಗಾರ್ ಕರ್ಗತಾ
ಧರ್ಣಿರ್ ಹೆಣೆ ಪಾವ್ಸಾ ವ್ಹಾಳೊ
ಆಪ್ತಾಲಿಪ್ತಾ ಸುರ್ಯೊ
ಮನೀಸ್ ಜಾಲಾ ಪಾಕಿಸಾಳೊ
ದೆವಾ ತೊಂಡಾರ್ ಮಿರ್ಯೊ
ವೆಳಾರ್ ಪಾವ್ಸ್ ಧಾಡ್ಲೊ ಪಳೆ
ಆಯ್ಕತಾ ಖಂಯ್ ತುಕಾ?
ಮನೀಸ್ ಜಾತ್ ತಶೀಚ್ ಪಳೆ
ಜಾಯ್ಜೆ ಜಾಯ್ಜೆ ತುಕಾ!
-ಚಾ.ಫ್ರಾ. ದೆಕೊಸ್ತಾ