ಸಂಪಾದಕೀಯ್:
ಆನಂದ್ ವರ್ಟಿ ಕರ್ನಾಟಕಾಚೊ ಕವಿ. ತೊ ಹುಬ್ಳಿಂತ್ ಜಲ್ಮಲ್ಲೊ. ಕೊಂಕಣಿ, ಕನ್ನಡ ಆನಿ ಮರಾಠಿಂತ್ ಬರಯ್ತಾಲೊ. ಬಾಕಿಬಾಬಾಚೊ ಭಕ್ತ್ ಜಾವ್ನಾಸಲ್ಲೊ. ಕ್ರಮೇಣ್ ತಾಚಿ ವಸ್ತಿ ಮುಂಬಯ್ ಶೆರಾಂತ್ ಜಾಲಿ. ಥಂಯಿಂಚ್ ಕಾಂಯ್ ವರ್ಸಾಂ ಆದಿಂ ಹೊ ಸಂಸಾರ್ ಸಾಂಡುನ್ ತೊ ಗೆಲ್ಲೊ. ತಾಚೆಂ ಏಕಚ್ ಕವಿತಾ ಪುಸ್ತಕ್ ಪರ್ಗಟ್ ಜಾಲಾಂ. ಅಕ್ಷಯ್‍ದಿವೊ ಹ್ಯಾ ಪುಸ್ತಕಾಚೆಂ ನಾಂವ್. ಹ್ಯಾ ಪುಸ್ತಕಾಂತ್ ಕಾಂಯ್ ಆಪುರ್ಬಾಯೆಚ್ಯೊ ಕವಿತಾ ಆಸಾತ್. ಹ್ಯೊ ಕವಿತಾ ಅಧ್ಯಾತ್ಮಿಕ್ ದಿಸ್ತಾತ್. ಕಾಂಯ್ ಥೊಡ್ಯಾ ಕವಿತೆಂನಿ ಜಿಣ್ಯೆವಯ್ಲಿ ಶೃದ್ಧಾ ಝಳ್ಕತಾ. ಪರ್ನೊ ಆಸೊನಯ್ ಅಧುನಿಕ್ ಕಾವ್ಯಾಚೆ ಧಾರಾಳ್ ಪ್ರಯೋಗ್ ತಾಂಣಿ ಕೆಲ್ಲೆ ಝಳ್ಕತಾತ್.
ಮನ್ಶಾಚ್ಯಾ ಹಾಶ್ಯಾ, ಸಂತೊಸಾ, ಸುಖಾ ಪಾಟ್ಲ್ಯಾನ್ ಖಂತಿಚಿ, ದುಖಾಚಿ, ವೊಳ್ವಳ್ಯಾಂಚಿ ಗುಪೀತ್ ಶಿರ್ ರೆವ್ಡಲ್ಲಿ ಆಸ್ತಾ. ತಿ ಸಂಸಾರಾಕ್ ದಿಸನಾ ಜಾಂವ್ಕ್ ಪುರೊ. ಹಾಂಗಾ ಕವಿ ಹೆ ಸಗ್ಳೆ ಹಾಂಶೆ ಮಾಯ್ಕ್ರೋಸ್ಕೊಪಾಚೆರ್ ದವರುನ್ ಪಳೆತಾ, ತಾಕಾ ಹ್ಯಾ ಗುಪೀತ್‍ಪಣಾಚಿಂ ಚಿತ್ರಾಂ ದಿಸ್ತಾತ್. ಸಗ್ಳೆ ಕವಿತೆಂತ್ ಬೋವ್ ಸುಂದರ್ ರಿತಿನ್ ಹೆಂ ಕವಿನ್ ಸಾಂಗ್ಲಾಂ.
ತುಮಿ ಏಕ್ ಪಾವ್ಟಿಂ ನ್ಹಯ್, ದೋನ್ ತೀನ್ ಧಾ ಪಾವ್ಟಿಂ ತರೀ ವಾಚ್ಚಿ. ಆನಿ ಹೆ ಕವಿತೆಚೊ ಆನಂದ್ ಜೊಡ್ಚೊ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮಾಯ್ಕ್ರೋಸ್ಕೋಪ್
ಮನಾಚ್ಯಾ ಮಾಯ್ಕ್ರೋಸ್ಕೊಪಾಮುಳಾಂತ್
ದವರುನ್ ಪಳೆಯ್ಲೊ ಹಾಂವೆಂ ಹಾಸೊ
ಖುಶಿ ಖುಶಿಚೊ ವೊತುನ್ ವಚ್ಪಾಚೊ
ಪೊಟಾಂತ್ಲ್ಯಾನ್ ಖತ್ಖತೂನ್ ಯೆವ್ಪಾಚೊ
ಸಾಂಗ್ಲೆಂ ಲೊಕಾಂನಿ ಹಾಂಸತ್ ಮ್ಹಾಕಾ
ಆಜ್ ಮ್ಹಾಕಾ ಚಲೊ ಜಾಲೊ
ಮ್ಹಜೆ ಚಲಿಯೆಕ್ ಘೊವ್ ಮೆಳ್ಳೊ
ಕೊಣ್ ಶಾಳೆಂತ್ ಆಯ್ಲೊ ಪಯ್ಲೊ
ಕೊಣ್ ರೇಶಿಂತ್ ಬರೊ ಖೆಳ್ಳೊ
ಕೊಣಾ ನೋಕ್ರೆ ಕೊಲ್ ಆಯ್ಲೊ
ಇಲೆಕ್ಷನಾಂತ್ ಸೊಡ್ಲೊ ಜಿಕ್ಲೊ
ಕೊಣಾ ಪ್ರಮೋಶನ್ ಖೋಸ್
ಚಲಿಯೆಕ್ ಪಳೆವ್ನ್ ಚಲೊ ಧಾದೋಸ್
ಸಗ್ಳೆ ಹಾಂಶೆ ಲಾವ್ನ್ ಸ್ಲಾಯ್ಡಾರ್
ಪಳತಚ್ ದೊಳ್ಯಾಂತ್ ದಿಸ್ಲೆ
ಆಜ್ಮೆರೆನ್ ದಿಸನಾಶಿಲ್ಲೆಂ
ಹ್ಯಾ ಭಿಂಗಾನ್ ರಂಗ್ ಲೆಗೀತ್
ಭಂಯ್ ಜಾವ್ನ್ ಕಿರ್ಣಾಂ ಜಾಲಿಂ
ತಾಂಚ್ಯಾ ಉಜ್ವಾಡಾ ಪೊಂದಾಂತ್
ಖರಿ ಮಳ್‌ಮಳ್ ವೊಳ್ವಳ್ತಾಲಿ
ಚಲೊ ಜಾಲೊ ಖಾವ್ಪಾ ಏಕ್ ತೊಂಡ್ ವಾಡ್ಲೆಂ
ಚಲಿಯೆಚೆಂ ಮ್ಹಜೆಂ ಲಗ್ಣ್ ಜಮ್ಲೆಂ ಪಯ್ಶೆಂ ಕಶೆ ಹಾಡ್ಚೆ ಪಡ್ಲೆ
ಪಯ್ಲೊ ಆಯ್ಲೊ ಆತಾಂ ಫುಡೆಂ ಕರ್ಚೆಂ ಕಿತೆಂ
ರೇಶಿ ಪಯ್ಶೆ ರಿಣಾಂತ್ ಗೆಲೆ ಖಿಶೆ ತಶೆಂಚ್ ಪುರ್ತೆ ರಿತೆ
ನೋಕ್ರಿ ಮೆಳ್ಳಿ ಟೆಂಪರರಿ, ಫುಡಾರ್ಯಾಕ್ ಗರ್ವ್ ಭಾರಿ
ಪ್ರಮೋಶನಾಚ್ಯಾ ಖೋಶಿ ಪಾಟ್ಲ್ಯಾನ್ ಲೊಂಚ್ ದಿಲ್ಲಿ ಶರಮ್ ಯೆತಾ
ಚಲಿಯೆಕ್ ಪಳೆವ್ನ್ ಧಾದೊಸ್ ಜಾತಲೊ ತಿಚ್ಯಾ ಬಾಪಾಯ್ಕ್ ಕಿತ್ಲೊ ಭಿತಾ
ದಿಸನಾಶಿಲ್ಲೆಂ ದೊಳ್ಯಾಂಕ್ ದಿಸೂಂಕ್
ಮಧೆಂ ಲಾಗ್ತಾ ಮಾಯ್ಕ್ರೋಸ್ಕೊಪ್
ತೆನ್ನಾ ಕಳ್ತಾ ನಕ್ಲಿ ಕಿತೆಂ
ಕಿತ್ಯಾಕ್ ದಿಲಾ ಕಸಲೊ ವೋಪ್!
ಏಕಯ್ ಹಾಸೊ ನಾಸ್ಲೊ ತಾಂತೂಂತ್
ಫುಲಾಂವರಿ ನಿವಳ್ ಖರೊ
ಪಾನಾಂ ಫಾಟ್ಲ್ಯಾನ್ ಲಿಪುನಯ್
ಫುಲುನ್ ದಿವ್ಪಿ ಗಂಧ್ ಬರೊ
ಮನಾಚ್ಯಾ ಮಾಯ್ಕ್ರೋಸ್ಕೊಪಾಮುಳಾಂತ್
ದವರುನ್ ಪಳೆಲೆಂ ಹಾಂವೆಂ ರಡೆಂ
ಹಂಸಾಹಂಶಿಚೆ, ಕಾಳೀಜ್ ಪಿಳ್ಪಾಚೆಂ
ಸುಖಾಸುಖಿ ದೊಳ್ಯಾ ಭರುನ್ ದುಖಾಂ ಸಕಲ್ ಗಳ್ಪಾಚೆಂ
ಸಾಂಗ್ಲೆಂ ಲೊಕಾಂನಿ ರಡತ್ ಮ್ಹಾಕಾ
ಆಜ್ ಘರ್ಕಾರ್ನ್ ಭಾಯ್ರ್ ಪಡ್ಲಿ
ಮ್ಹಜೆ ಚಲಿಯೆಚಿ ಸೊಯ್ರಿಕ್ ಮೊಡ್ಲಿ
ಕೊಣಾಚೊ ಚಲೊ ಜಾಲೊ ನಾಪಾಸ್
ಕೊಣಾಕ್ ಘಡ್ಟಾ ಸದಾ ಉಪಾಸ್
ಕೊಣಾಚೆ ಪಾಕಿಟ್ ಮಾರ್ಲೆಂ ಕೊಣೆಂ
ಕೊಣಾಕ್ ಖಂಯ್ ಸದಾಂಚೆಂ ದುಖ್ಣೆಂ
ಪಯ್ಸ್ ಖಂಯ್ ಪೂರ್ ಮ್ಹಣೂನ್ ಪಯ್ಶೆ ಮಾಗ್ಪಿ ದಾರೋದಾರ್
ಕೆಲೊ ಖಂಯ್ ಕೊಣೆ ಕೊಣಾರ್ ದಯಾಹೀನ್ ಬಲಾತ್ಕಾರ್
ಸಗ್ಳೆಂ ರಡೆಂ ಲಾವ್ನ್ ಸ್ಲಾಯ್ಡಾರ್
ಪಳೆತಕಚ್ ದೊಳ್ಯಾಂಕ್ ದಿಸ್ಲೆಂ
ಆಜ್ಮೆರೆನ್ ದಿಸನಾಶಿಲ್ಲೆಂ
ಹ್ಯಾ ಭಿಂಗಾನ್ ರಂಗ್ ಲೆಗೀತ್
ಭಂಯ್ ಪಾವ್ನ್ ಕಿರ್ಣಾಂ ಜಾಲಿಂ
ತಾಂಚ್ಯಾ ಉಜ್ವಾಡಾ ಪೊಂದಾಂತ್
ಖರಿ ಮಳ್‌ಮಳ್ ವೊಳ್ವಳ್ತಾಲಿ
ಭಾಯ್ರ್ ಪಡ್ಲಿ ಘರ್ಕಾರ್ನ್ ತರಿ ಏಕ್ ಮ್ಹಜಿ ಪಿಡಾ ಗೆಲಿ
ಬರೆಂ ಜಾಲೆಂ ಮೊಡ್ಲಿ ಸೊಯ್ರಿಕ್ ಚಲಿ ಬರಿ ಕಮಾಯ್ತಾಲಿ
ನಾಪಾಸ್ ಚಲ್ಯಾಕ್ ಲಾಯ್ನ್ ಧಂದ್ಯಾಕ್ ಶಿಕುನ್ ತರೀ ಕರ್ಮ್ ಕಿತೆಂ
ಸದಾ ಉಪಾಸ್ ಕಾಡ್ಲೆ ತರೀ ಆಜೂನಯ್ ಆಸಾತ್ ಜಿತೆ
ಪಯ್ಶೆ ಗೆಲೆ ತರೀ ಯೆತಲೆ ಜೀವ್ ಮೊಟೊ ವಾಂಚ್ಲೊ ಆಜ್
ಶೀಕ್‌ಪಣಾಂ ಗಾವ್ನ್ ಗಾಣೆಂ ದಯಾ ಮೆಳೊವ್ಚೊ ಹೊ ರಿವಾಜ್
ಖೊಟೆಂ ರಡ್ಪಿ ಫುಡಾರೀಯ್ ಭಿಕ್ ಮಾಗತ್ ಆಸ್ತಾನಾ
ಫೊಟೊ ಲೆಗೀತ್ ಯೆತಾ ಛಾಪುನ್ ದೊಳೆ ತಾಂಚೆ ಪುಸ್ತಾನಾ
ದಿಸನಾಶಿಲ್ಲೆಂ ದೊಳ್ಯಾಂಕ್ ದಿಸೂಂಕ್
ಮದೆಂ ಲಾಗ್ತಾ ಮಾಯ್ಕ್ರೋಸ್ಕೊಪ್
ತೆನ್ನಾ ಕಳ್ತಾ ನಕ್ಲಿ ಕಿತೆಂ
ಕಿತ್ಯಾಕ್ ದಿಲಾ ಕಸಲೊ ವೋಪ್!
ಏಕಯ್ ರಡೆಂ ನಾಸ್ಲೆಂ ತಾಂತೂಂತ್
ಪಾವ್ಸಾವರಿ ಭಿಜಯ್ಲೆಂ
ಜಳ್ತಿ ಜಮೀನ್ ಶಾಂತ್ ಕರುನ್
ತಾಂತೂಂತ್ ಬೀ ರುಜಯ್ತಲೆಂ
ಮನಾಚ್ಯಾ ಮಾಯ್ಕ್ರೋಸ್ಕೊಪಾಮುಳಾಂತ್
ದವರುನ್ ಪಳೆಯ್ಲಿಂ ಹಾಂವೆಂ ಉತ್ರಾಂ
ಮೊಗಾಮಾಯೆಚಿಂ, ದುಧಾಸಾಯೆಚಿಂ
ಮ್ಹೊಂವಾ ಗೊಡೆಚಿ, ಆಂಬ್ಯಾ ಫೊಡಿಚಿ
ಸಗ್ಳಿಂ ಉತ್ರಾಂ ಲಾವ್ನ್ ಸ್ಲಾಯ್ಡಾರ್
ಪಳಯ್ತಚ್ ದೊಳ್ಯಾಂಕ್ ದಿಸ್ಲೆಂ
ಆಜ್ಮೆರೆನ್ ದಿಸನಾಶಿಲ್ಲೆಂ
ಮಾಯೆಮೊಗಾ ಫಾಟ್ಲ್ಯಾನ್ ಆಸ್ಲೆಂ
ಆಪ್ಲೆಂ ಸಾಧುನ್ ಘೆವಪ್ ಬರೆಂ
ದಾಖೊವ್ಪಾಚೆ ದಾಂತ್ ಖೊಟೆ
ಚಾಬ್ಚೆ ಮಾತ್ರ್ ಆಸ್ಲೆಂ ಖರೆಂ
ದುಧಾಸಾಯೆಮುಳಾಂತ್ ದಿಸ್ಲೆಂ
ಕರ್ಪುನ್ ಗೆಲ್ಲೆಂ ಕಾಳೀಜ್ ಕಾಳೆಂ
ದುಸ್ವಾಸಾಚ್ಯಾ ಜಾಳಾನ್ ಜಳುನ್
ಭಿತರ್ಲೆಭಿತರ್ ಕಳ್ಮಲೆಲೆಂ
ಮ್ಹೊಂವಿ ಗೋಡ್ ಉತ್ರಾಂ ಮ್ಹಾಕಾ
ಕಾನಾಕ್ ಲಾಗ್ಲಿಂ ಭೆಸ್ ಬರಿಂ
ಜಳ್ಲೆಂ ಮಾಗೀರ್ ಆಂಗ್ ಜೆನ್ನಾಂ
ಕಳ್ಳೆಂ ಚಾಬ್ತಾತ್ ವೊಂಬ್ಯಾವರಿ
ದಿಸನಾಶಿಲ್ಲೆಂ ದೊಳ್ಯಾಂಕ್ ದಿಸುಂಕ್
ಮದೆ ಲಾಗ್ತಾ ಮಾಯ್ಕ್ರೋಸ್ಕೊಪ್
ತೆನ್ನಾ ಕಳ್ತಾ ನಕ್ಲಿ ಕಿತೆಂ
ಕಿತ್ಯಾಕ್ ದಿಲಾ ಕಸಲೊ ವೋಪ್!
ಏಕಯ್ ಉತರ್ ನಾಶಿಲ್ಲೆಂ ತಾಂತುಂತ್
ದೊಂಗ್ರಾವರಿ ಧೀರ್ ದಿವ್ಪಿ
ಅಚಳ್ ಸ್ತಬ್ದ್ ಊಂಚ್ ಮಾಥ್ಯಾನ್
ಗಗನಾಕಯ್ ತೊಲೂನ್ ಘೆವ್ಪಿ
ಮನಾಚ್ಯಾ ಮಾಯ್ಕ್ರೋಸ್ಕೊಪಾಮುಳಾಂತ್
ದವರುನ್ ಪಳೆಯ್ಲಿ ಹಾಂವೆಂ ನಾತಿಂ
ಲಾಗ್ಚಿಂ ತಶೆಂಚ್ ಪೈಸಾಲ್ಲೆಲಿ
ರಗ್ತಾನ್ ಬಾಂದುನ್ ಘಟ್ಟ್ ಜಾಲ್ಲಿ
ಸಗ್ಳಿಂ ನಾತಿಂ ಲಾವ್ನ್ ಸ್ಲಾಯ್ಡಾರ್
ಪಳೆಯ್ತಚ್ ದೊಳ್ಯಾಂಕ್ ದಿಸ್ಲೆಂ
ಆಜ್ಮೆರೆನ್ ದಿಸನಾಶಿಲ್ಲೆಂ
ಹ್ಯಾ ನಾತ್ಯಾಚೆ ಧಾಗೆದೊರೆ
ವಿಸ್ವವಿಶೀತ್ ಸುಟಿಲ್ಲಿಂ ಸುತಾಂ
ಪೀಳ್ ಖಂಯಚ್ ನಾಶಿಲ್ಲೊ ತಾಂತೂಂತ್
ವಾರೊ ಆಯ್ಲ್ಯಾರ್ ಹುಬೂನ್ ಘೆತಾಂ
ಸುತಾಕ್ ಸುಯೆರ್ ಸಣಾಸುದೀಕ್
ನಾತೆಗೊತೆ ದಾಯ್ಜಿಪಣ್
ಪಾತಳ್ತೆರ್ ವಂಶ್‍ವಾಲ್ ಸುಕೂನ್ ವತಾ ಮುಳಾಪಾಸೂನ್
ಈಷ್ಟ್ ಜಾತಾತ್ ಕಷ್ಟ್ ದಿವ್ಪಿ
ದಿಷ್ಟಿಆಡ್ ಖೊದಪ್ ತಾಂಚೆಂ
ಈಷ್ಟ್ ಕಶೆಂ ದಿಸ್ಲೆಂ ಭಿಂಗಾನ್
ಕೊಣಾಚೆಂ ರೂಪ್ ಕಸಲೆಂ ಖಂಯ್ಚೆಂ
ದಿಸನಾಶಿಲ್ಲೆಂ ದೊಳ್ಯಾಂಕ್ ದಿಸೂಂಕ್
ಮಧೆಂ ಲಾಗ್ತಾ ಮಾಯ್ಕ್ರೋಸ್ಕೊಪ್
ತೆನ್ನಾ ಕಳ್ತಾ ನಕ್ಲಿ ಕಿತೆಂ
ಕಿತ್ಯಾಕ್ ದಿಲಾ ಕಸಲೊ ವೋಪ್!
ಏಕಯ್ ನಾತೆಂ ನಾಶಿಲ್ಲೆಂ ತಾಂತೂಂತ್
ವ್ಹಾಳಾವರಿ ವ್ಹಾಂವೂನ್ ಯೆವ್ಪಿ
ಕಾಂಟ್ಯಾಂತ್ಲ್ಯಾನ್ ಮಾಗ್ ಕಾಡೀತ್
ನದೀಕ್ ವೆಗಾನ್ ವೇಂಗ್ ಮಾರ್ಪಿ
ಮನಾಚ್ಯಾ ಮಾಯ್ಕ್ರೋಸ್ಕೊಪಾಮುಳಾಂತ್
ಲಾಯ್ಲೆಂ ಆಮ್ಚೆಂ ಆಯ್ಚೆಂ ಜಿಣೆಂ
ಲಾಯ್ಲಿ ನ್ಯಾಯ್-ನೀತ್ ಸ್ಲಾಯ್ಡಾರ್
ಸಮಾಜಾಂತ್ಲೆಂ ಚಡ್ ಉಣೆಂ
ಪಳಯ್ತಚ್ ದೊಳ್ಯಾಂಕ್ ದಿಸ್ಲೆಂ
ಆಜ್ಮೆರೆನ್ ದಿಸನಾಶಿಲ್ಲೆಂ
ಅಶೆಂ ಜಾವ್ಪಾಕ್ ಕಿತೆಂ ಜಾಲ್ಲೆಂ
ಭಿತರ್ಲೆ ದೊಳೆ ಉಘಡ್ಲೆ!
-ಆನಂದ್ ವರ್ಟಿ