ಸಂಪಾದಕೀಯ್:

ಆಂಬ್ಯಾಚಿ ಪಾರ್ ಆನಿ ಮೊಗಾಚಿ ಊಬ್

ವಿಲ್ಫಿ  ರೆಬಿಂಬಸ್ ಗೀತ್‌ಕಾರ್ ಜಾವ್ನ್ ಆಮ್ಕಾಂ ಕಾಳ್ಜಾಕ್ ಲಾಗ್ಶಿಲೊ.  ತಾಚ್ಯಾ ಗಿತಾಂನಿ ಕವಿತೆಚೆ ಗೂಣ್ ಜಾಯ್ತೆ ಆಸಾತ್. ತ್ಯಾ ದೆಕುನ್ ಕವಿಂಚೆ ಪಂಗ್ತೆಂತ್ ತಾಕಾ ವಿಶೇಸ್ ಸ್ಥಾನ್ ಆಸಾ. ಸ್ವತಾ ವಿಲ್ಫಿ ರೆಬಿಂಬಸ್ ಆಪ್ಣಾಕ್ ಕವಿ ಸಾಂಗೊಂಕ್ ತಯಾರ್ ನಾತಲ್ಲೊ. ತಾಕಾ ಕೊಣೇಂಯ್ ಕವಿ ಮ್ಹಣೊನ್ ಉಲ್ಲೇಕ್ ಕರ್ತಾನಾ ತೊ ಆಪ್ಣಾಕಚ್ ಲ್ಹಾನ್ ಸಮ್ಜೊನ್ ದೊಡುನ್ ವೆತಾಲೊ.  ತಾಣೆ ಬರಯಿಲ್ಲ್ಯೊ ಥೊಡ್ಯೊ ಕವಿತಾ ಆನಿ ಗಿತಾಂ ಸಾಂಗಾತಾ ಘಾಲ್ನ್, ದೇವನಾಗರಿ ಲಿಪಿಂತ್, ‘ಗೀತ್ ಆನಿ ಕವಿತ್’ ಮ್ಹಳ್ಳ್ಯಾ ನಾಂವಾಖಾಲ್ ಯೆದೊಳಚ್ ಪುಸ್ತಕ್ ಪರ್ಗಟ್ ಜಾಲಾಂ. ಗೋವಾ ಕೊಂಕಣಿ ಅಕಾಡೆಮಿನ್ ಪರ್ಗಟ್ ಕೆಲ್ಲೆಂ ಹೆಂ ಪುಸ್ತಕ್ ಸಂಪಾದುಂಚೆಂ ಭಾಗ್ ಮ್ಹಾಕಾಚ್ ಫಾವೊ ಜಾಲ್ಲೆಂ.

ತಾಂತ್ಲಿ ಏಕ್ ಕವಿತಾ ಹಾಂಗಾಸರ್ ದಿಲ್ಯಾ. ಕವಿತಾ ಹಾಸೊ ಹಾಡಂವ್ಚಿ ಜಾಂವ್ಕ್ ಪುರೊ. ಕಾಳ್ಜಾಕ್ ಥಾಕಾಯ್ ದಿಂವ್ಚಿ ಜಾಂವ್ಕ್ ಪುರೊ. ಪುಣ್ ಹೆ ಕವಿತೆಂತ್ ಆಂಬ್ಯಾಚೆ ಪಾರೀಕ್ ಚಿಡ್ಕಲ್ಲೆಂ ರೊಸಾಳ್ ಮಾಸ್ ಖಾಂವ್ಚ್ಯಾಂತ್ ಮನ್ಶಾಕ್ ಆಸ್ಚಿ ಆಶಾ ಬೋವಚ್ ಆಪುರ್ಬಾಯೆನ್ ವ್ಯಕ್ತ್ ಜಾಲ್ಯಾ. ಮಾಗೀರ್ ಹ್ಯಾ ಎಕೆ ಆಶೆ ಪಾಟ್ಲ್ಯಾನ್ ಮೊಗಾಚಿ ಊಬ್ ಮಿಸ್ಳಲ್ಯಾ ಮ್ಹಣ್ತಾನಾ ತಿ ರೂಚ್ ದೊಡ್ತಿ ಜಾತಾ ತೆಂ ಖಂಡಿತ್.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಆಂಬ್ಯಾಚಿ ಪಾರ್

ಆಮ್ಚ್ಯಾ ರುಕಾರ್
ದಿಸಾಕ್ ಏಕಚ್ ಆಂಬೊ ಪಿಕ್ತಾ
ಕೆದ್ನಾಂ ಹಾಂವ್ ತೊ ಸೊಲುಂಕ್ ಲಾಗ್ತಾಂ
ತೆದ್ನಾಂ ಶೆಜ್ರಾಚೆಂ ಮ್ಹಜ್ಯಾ ಕಾಳ್ಜಾಂತ್ಲೆಂ ಚೆಡುಂ
ಭಿತರ್ ರಿಗ್ತಾ ಆನಿ ಪಾರ್ ಮಾಗ್ತಾ

ಬೊಟಾಂ ಮಧೆಂ ಚಿರ್ಡುನ್ ಧರುನ್
ಗೊಡ್ಶಾ ರೊಸಾಕ್ ಮಿಟಿಯೊ ಮಾರುನ್
ಪಾರಿಕ್ ಲೆಂವ್ಚೆ ನಾರೀಕ್ ದೆಖ್ತಾಂ
ಕಾಳೀಜ್ ಮ್ಹಜೆಂ ಮೊಗಾನ್ ಫುಗ್ತಾ

ಥೊಡ್ಯೊಚ್ ಘಡಿಯೊ
ಚಿಂವೊನ್ ಲೆಂವೊನ್ ಕಾಡಲ್ಲ್ಯಾ
ವಿಣ್ಗೆ ಪಾರೀಕ್ ಆಂಗ್ಣಾಂತ್ ಉಡವ್ನ್
ಚೆಡುಂ ಮ್ಹಜೆಂ ಚಲ್ತಚ್ ರಾವ್ತಾ
ಹಾಂವ್ ಖಂತಿನ್ ಭಾಗ್ತಾಂ

ದಾಳಿಂಬ್, ಪಣಸ್, ಕಾಳಿಂಗ್, ಪೊಪಾಯ್
ಇತ್ಲ್ಯೊ ಬಿಯೊ ನಾ ಕಾಯಿಂಚ್ ಅಪಾಯ್
ಆಂಬ್ಯಾಕ್ ಜರಿ, ಹಾಂಚೆ ಬರಿ
ಆಸಲ್ಲ್ಯೊ ತರ್ ತಿತ್ಲ್ಯೋಚ್ ಪಾರಿ
ಚೆಡ್ವಾಕ್ ಮ್ಹಜ್ಯಾ ಖಾವಯ್ತೊಂ
ಸಾಂಜೆ ಪಾಸುನ್ ರಾವಯ್ತೊಂ
ಅಶೆಂ ಭೊಗ್ತಾ

-ವಿಲ್ಫಿ ರೆಬಿಂಬಸ್