ಸಂಪಾದಕೀಯ್:
ಗಾಯ್ಚೊ ಪ್ರಸಂಗ್ ಆನಿ ಮನ್ಶಾಚಿಂ ಫಟ್ಟಿಂಗ್‌ಪಣಾಂ
ಇಗರ್ಜೆಂತ್ ಜಾವ್ಯೆತ್ ಜಾಲ್ಲೊ ಏಕ್ ಪ್ರಸಂಗ್ ಸಾಂಗೊಂಕ್ ವಚೊನ್ ಕ್ರಿಸ್ತಾಂವ್ ಸಮಾಜೆಚೆಂ ಪೊಕೊಳ್ ರೂಪ್ ಏಕ್ ಬೋವ್‌ಚ್ ಮಾರ್ಮಿಕ್ ರಿತಿನ್ ಕವಿನ್ ಹಾಂಗಾಸರ್ ಪಿಂತ್ರಾಯ್ಲಾಂ. ಗಾಯ್ಚ್ಯಾ ಪ್ರಸಂಗಾಂತ್ ಮನ್ಶಾಚಿಂ ಫಟ್ಟಿಂಗ್‌ಪಣಾಂ ಉಗ್ತಾಡಾಕ್ ಹಾಡ್ಚೆ ಹೆ ಕವಿತೆಂತ್ ಬಳ್ವಂತ್ ಠರಾವಣ್ (ಥೀಮ್) ಆಸಾ. ಕೊಯರಾಂ, ಲೀಜನಾಂ, ರೆತಿರೆಂಕ್ ಖಂಯ್ಚ್ಯಾ ನಮುನ್ಯಾಚಿ ಗಾಯ್ ಹಾಂಡುನ್ ಆಸಾ ಮ್ಹಣ್ ಏಕ್ ಘಡಿಭರ್ ಆಮಿ ನಿಯಾಳುಂಕ್ ಲಾಗ್ಲ್ಯಾರ್ ಹೆ ಕವಿತೆಚಿ ಗೊಡ್ಸಾಣ್ ಆಮ್ಕಾಂ ಕಳಿತ್ ಜಾತಲಿ. ನಾಂತರ್ ಧರ್ಮಾಚ್ಯಾ ನಾಂವಾಚಿಂ ಖಂವ್ಚಾಂ ಮಾಂಡ್‌ಲ್ಲ್ಯಾ ಕಾಳ್ಜಾಂಕ್ ಹಿ ಕವಿತಾ ಆಡೂಕ್ ಭೊಗುಂಕ್‌ಯ್ ಪುರೊ.
’ಫ್ರೀ ವೆರ್‍ಸಾಚೆರ್’ ಹಿ ಕವಿತಾ ಬರಯ್ಲ್ಯಾ ಜಾಲ್ಯಾರಿ ಹೆ ಕವಿತೆಂತ್ ಧಾರಾಳ್ ಪ್ರಾಸ್ ತಶೆಂ ಸಂಗೀತ್ ಗಣಾಂಚಿ ಝರ್ ಝಳ್ಕೆಕ್ ಯೆತಾ.
ದಿನೇಶ್ ಕೊರೆಯಾನ್ ಕವಿತಾ ಕುಳಾರ್ ಪಯ್ಲ್ಯಾ ಪಾಂವ್ಡ್ಯಾಂತ್ ಆಪ್ಲಿ ಕವಿತಾ ಸಾದರ್ ಕೆಲ್ಲ್ಯಾ ವೆಳಾರ್ ಹಾಂವೆಂ ವಿಶೇಸ್ ಭರ್‍ವಶ್ಯಾಚಿಂ ಉತ್ರಾಂ ಉಚಾರ್‌ಲ್ಲಿಂ. ಆತಾಂ ಮ್ಹಜ್ಯಾ ಭರ್‍ವಶ್ಯಾಕ್ ನಿರಾಶಾ ಕರಿನಾಸ್ತಾಂ ಹೊ ಕವಿ ತಳ್ಟ್ಯಾಭಾಶೆನ್ ವಾಡೊನ್ ಆಸಾ. ದಿನೇಶಾ ಬರಾಬರ್ ಆನಿಕ್‌ಯ್ ಹೆರ್ ಥೊಡೆ ವಾಡೊನ್ ಆಯ್ಲ್ಯಾತ್. ಕವಿತೆಚ್ಯಾ ಆಂಗ್ಣಾಂತ್ ಸದಾಂಚ್ ಪುನವ್ ದೆಖ್ಚೆ ದೀಸ್ ಲಾಗಿಂ ಪಾವ್ಲ್ಯಾತ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಇಗರ್ಜೆಂತ್ ಗಾಯ್ ಆಯ್ಲ್ಯಾ, ಧಾಂವ್ಡಾಯಾ
ಇಗರ್ಜೆಂತ್ ಗಾಯ್ ಆಯ್ಲ್ಯಾ ಧಾಂವ್ಡಾಯಾ!
ಹುರ್ರ್... ಪುರ್ರ್....
ಧಾಂವ್ಡಾಯಾ, ಗಾಯ್ಕ್ ಧಾಂವ್ಡಾಯಾ!
ಫಾದರ್, ಬ್ರದರ್
ಮಿರ್ನಿ, ಸಿಸ್ಟರ್
ದೆವಾಚೆ- ಮೊಗಾಚೆ ಚಾಕೊರ್ -
ಸಗ್ಳೆ ಕಾನ್ ದೀವ್ನ್ ಆಯ್ಕಯಾ:
ಹಿ ಪವಿತ್ರ್ ಆಲ್ತಾರ್, ಓ ಥಂಯ್ ಉಮ್ಕಳ್ತಾ ಖುರ್ಸಾರ್
ಬೊಲ್ಕಾಂವಾಂತ್ ಆಸಾ ದೆವಾಚೆಂ ಉತರ್
ಹಾಂಗಾ ಸಗ್ಳೆಂ ಪವಿತ್ರ್ ಪವಿತ್ರ್ -
(... ದೆವಾಚೆ ಚಾಕೊರ್ ಜಾವ್ನಾಂತ್ ಕಾಜಾರ್!)
ಆಮಿಂಚ್ ದೆವಾಚೆ ಖರೆ ಸೈನಿಕ್...
ದೆಕುನ್ ಸಾಂಗಾತಾ ಮೆಳ್ಯಾಂ ಧಾಂವ್ಡಾಂವ್ಕ್ ಗಾಯ್ಕ್,
ಶೆಣ್ ಘಾಲುನ್ ಆಲ್ತಾರ್ ಕರಿತ್ ಭಶ್ಟ್
ಜಾತಿತ್ ದೆವಾಕ್ ಚಡ್ ಕಷ್ಟ್!
ಇಗರ್ಜೆಂತ್ ಗಾಯ್ ಆಯ್ಲ್ಯಾ ಧಾಂವ್ಡಾಯಾ!
ಹಯ್... ಹವ್....
ಧಾಂವ್ಡಾಯಾ, ಗಾಯ್ಕ್ ಧಾಂವ್ಡಾಯಾ!
ಲಾದ್ರಾಬ್, ಪೆದ್ರಾಬ್
ಉಟೊಂಕ್ ತಾಂಕ್ಚೆ ಸಗ್ಳೆ ಆಬ್ -
ಯೆಯಾ ಗಾ ಸಗ್ಳೆ, ಪುನೆಗೆಲ್ಲೆ
ಫೊಂಡಾಕ್ ಲಾಗಿಂ ಜಾಲ್ಲೆ ಸಗ್ಳೆ
ಥೊಂಟೆ ಆಂದ್ಳೆ
ಗಿರೇಸ್ತ್ ದುಬ್ಳೆ -
ಆಮಿ ಕ್ರಿಸ್ತಾಂವಾಂ, ದೆವಾಚಿಂ ಬಂದ್ವಾಂ
ಗಾಯೆಕ್ ಮಾಂದ್ತಾತ್ ಫಕತ್ತ್ ಹಿಂದ್ವಾಂ!
ಧಾಂವ್ಡಾಯಾಂ ಧಾಂವಾ,
ಚಾನ್ಸ್ ಮೆಳ್ಳ್ಯಾರ್, ಗೊಮ್ಟಿ ಲುಂವಾ!
ಕಿತ್ಯಾಕ್, ಜಿವಿತಾಚೆ ಸಾಂಜೆರ್ ಕಿತೆಂ ತರೀ
ಉಪ್ಕಾರಿ,
ಭಾಗೆವಂತ್ ಕಾಮ್ ಕೆಲೆಂ ಮ್ಹಳ್ಳೆಂ ಸಮಾಧಾನ್
ಮತಿಂತ್ ಘೆವ್ನ್ ಮಾತ್ಯೆ-ಸಾರೆಂ ಜಾಯಾ!
ಇಗರ್ಜೆಂತ್ ಗಾಯ್ ಆಯ್ಲ್ಯಾ ಧಾಂವ್ಡಾಯಾ!
ಹುಡಿ... ಹುಡಿ....
ಧಾಂವ್ಡಾಯಾ, ಗಾಯ್ಕ್ ಧಾಂವ್ಡಾಯಾ!
ಸ್ತ್ರೀಯೊ, ಚಲಿಯೊ
ಸುಕ್ಯೊ ಖೊಲಿಯೊ, ತರ್ನ್ಯೊ ಪಾಲಿಯೊ-
ಪಾಲಂವ್ ಖೊವವ್ನ್ ಶೆಂಡೊ ಬಾಂಧುನ್
ಲಜ್ ನಾತ್‌ಲ್ಲಿಂ ವೊಂಟಿ ಖೊವವ್ನ್
ಮುಕಾರ್ ಯೆಯಾ ಆಯ್ಲ್ಯಾ ಗಾಯ್
(ಕಿತ್ಲಿಂ ಕುಟ್ಟಿಂ ದೂಧ್ ದಿತಾಗಾಯ್?)
ಆಮ್ಚಿಂ ಸಗ್ಳಿಂ ಮೊವಾಳ್ ಮನಾಂ,
ಥೊಡೆ ಪಾನ್ಪಳೆ ಥೊಡಿಂ ಸನ್ನಾಂ,
ಬಾಕಿಚಿಂ ಥೊಡಿಂ ಗೆಂದಾಳಿಂ ಸೊಣ್ಣಾಂ!
ಸ್ತ್ರೀಯಾಂಕ್ ಮಾತ್ರ್ ಸಾಧ್ಯ್ ಆಂಬ್ಡುಂಕ್ -
ಕಳಿತ್ ಆಸಾ ತಾಂಕಾಂ ರಡುಂಕ್!
ಆಸ್ಚಿ ಸಕತ್ ಚಾ-ಚಾರ್ ಥೆಂಬ್ಯಾಂನಿ
ಆಸಾ ಖಂಯ್ಚ್ಯಾ ನ್ಯೂಕ್ಲಿಯರ್ ಬೊಮಾಂನಿ?
ಆಮ್ಚೆಂ ಬಳ್ ಆಮ್ಚೆಂ ದೆವಾಸ್ಪಣ್
ಪೊಟ್ಟಾ, ರೆತಿರ್, ಕೊಯರ್, ಲೀಜನ್!
ವ್ಹರಾ ಭಾಯ್ರ್ ಬಾಂಧುನ್ ಗಾಯೆಕ್...
ಅರ್ಗಾಂ ಹೊಗ್ಳಾಪ್ ಮರಿಯೆ ಮಾಯೆಕ್!
ಮೀಸ್ ರಾವ್ಲಾಂ, ರಾವ್ಲ್ಯಾ ಭೆಟವ್ಣಿ
ಉಡಾಸ್ ಆಸಾ ಕೊಣಾಕ್ ಪುಣಿ,
ಪರಾಧೀನ್ ಜಾಲ್ಲ್ಯಾಚ್ಯಾ ಕಷ್ಟಾಂಚಿ ಕಾಣಿ?
ಭಕ್ತೆ-ಮಧೆಂ ಗಾಯ್ಚೊ ಪ್ರಸಂಗ್.
ಗಾಯ್ ಆಸ್ಲ್ಯಾರ್ ಕಸಲೊ ಭಂಗ್...!
ಆಸಾ ಕೊಣಾಯ್‌ಕಡೆ, ತ್ಯಾ ದಿಸಾ
ಜೆಜುನ್ ವಾಪರ್‌ಲ್ಲಿ
ದೊರಿ?
ಬಾಂಧುನ್ ಘಾಲ್ಯೆತೆಂಮೂ ಥೊಡ್ಯಾಂಕ್ ತರೀ!
- ದಿನೇಶ್ ಕೊರೆಯಾ