ಮಾಕಾ ದೇವ್ ಪ್ರಕಟ್ ಜಾಲೊ

ಸಂಪಾದಕೀಯ್:

ದೆವಾಚೊ ಅರ್ಥ್ ವೆಗ್ಳೆ ರಿತಿನ್ ಬರೊಂವ್ಕ್ ಕವಿಂಕ್ ಮಾತ್ರ್ ಕಳ್ತಾ

ಅರುಣಾ ರಾವ್ ಕುಂದಾಜೆಕ್ 83 ವರ್ಸಾಂ ಜಾಲಿಂ. ಹೆ ಪ್ರಾಯೆರಯ್ ತಿಚಿ ಉರ್ಬಾ, ಹುಮೆದ್ ಪಳೆವ್ನ್ ಹಾಂವ್ ಮಾತ್ರ್ ಶೆರ್ಮೆತಾಂ. ಆಜೂನಯ್ ತಿ ಕವಿತಾ ಬರೊವ್ನ್ ಆಸಾ. ವಿಶೇಸ್ ಕಿತೆಂಗೀ ಮ್ಹಳ್ಯಾರ್ ತಿಚ್ಯೊ ಉತ್ತೀಮ್ ಕವಿತಾ ಅಯ್ಶಿಂ ಸಂಪ್ಲ್ಯಾ ಮಾಗೀರಚ್ ಆಯ್ಲ್ಯಾತ್. ಮ್ಹಣ್ತಾನಾ ಪ್ರಾಯ್ ಕಸಲೇಂಯ್ ಕರ್ನ್ ದಾಕೊಂವ್ಚ್ಯಾಕ್ ಏಕ್ ಆಡ್ಕಳ್ ಬಿಲ್ಕುಲ್ ನ್ಹಯ್. ಅರುಣಾ ರಾವಾಚೆಂ ನವೆಂ ಕವಿತಾ ಪುಸ್ತಕ್ ‘ಸಾಕ್ಷಾತ್ಕಾರ್’ ಆಯ್ಲೆವಾರ್ ಕವಿತಾ ಫೆಸ್ತ್ ಸಂದರ್ಭಾರ್ ಡೊ ಕಿರಣ್ ಬುಡ್ಕುಲೆನ್ ಮೊಕ್ಳೀಕ್ ಕೆಲಾಂ.

ದೇವ್ ಪ್ರಕಟ್ ಜಾಲೊ - ಕವಿತೆಂತ್ ದಿಸನಾತಲ್ಲ್ಯಾ ದೆವಾಕ್ ಭೊಗ್ಚೆವಿಶಿಂ ಕವಯಿತ್ರಿನ್ ಬರಯ್ಲಾಂ.  ದೆವಾವಿಶಿಂತ್ಲಿ ತಿಚಿ ಕಲ್ಪನಾ ಹಾಂಗಾಸರ್ ಆಸಾ ತಿ ಸಾಮಾನ್ಯ್ ಜಣಾಂಚಿ ನ್ಹಯ್. ತಿ ಕಲ್ಪನಾ ಕವಿಕುಳಾಚಿ. ತಿಣೆ ಹೆ ಕವಿತೆ ಮಾರಿಫಾತ್ ದೆವಾಚೊ ಅರ್ಥ್ ವೆಗ್ಳೊಚ್ ಕರುನ್ ಬರಯ್ಲಾ. ಸೊಭಿತ್ ಕರುನ್ ದಿಲಾ.

ಬಾಯ್ ಅರುಣಾ, ಮುಂಬಂಯ್ತ್ ವಸ್ತಿ ಕರ್ತಾ ಜಾಲ್ಯಾರಿ ಆಜೂನಯ್ ಮ್ಹಯ್ನ್ಯಾಕ್ ಏಕ್ ಪಾವ್ಟಿಂ ತರೀ ಫೊನ್ ಕರುನ್ ಮ್ಹಜೆಲಾಗಿಂ ಸಂಪರ್ಕ್ ದವ್ರುನ್ ಆಸಾ. ಆಮ್ಚೊ ಕವಿಂಚೊ ಹೊ ಖಂಯ್ಚ್ಯಾ ಜಲ್ಮಾಚೊ ಸಂಬಂಧ್ ಮ್ಹಣ್ಚೊ!

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಮಾಕಾ ದೇವ್ ಪ್ರಕಟ್ ಜಾಲೊ

ಮಾಕಾ ದೇವ್ ಪ್ರಕಟ್ ಜಾಲೊ
ಪ್ರತ್ಯಕ್ಷ್ ನ್ಹಹಿಂ, ಸಪ್ಣಾಂತೂಯ್ ನ್ಹಹಿಂ

ಹ್ಯಾ ನಕ್ಲಿ ಶಹರಾಂತು ಆಜ್‌ಬಾಜೂಕ್
ಬನಾವಟ್ ವೈಭವ್ ಭರಲಲೆಂ ದಿಸುನಯ್
ಸೀಮೆಂಟ್-ರೆವೆಂಚ್ಯಾ ರಾಶಿರಿ ನಿರ್ಧಾಸ್ತ್ ಖೆಳ್ತಲ್ಯಾ
ತ್ಯಾ ಗರೀಬ್ ಪೊರಾಂಗೆಲ್ಯಾ ಪ್ರಸನ್ನ್ ಹಾಶ್ಯಾಂತು..
ಮಾಕಾ ದೇವ್ ದಿಸ್ಲೊ

ಮಾಕಾ ದೇವ್ ದಿಸ್ಲೊ
ಗಳ್ಯಾಕ್ ಬಾಂದಿಲಿ ದೊರಿ ಥುಂಟೊವ್ನು ಘೆವ್ನು
ಪಾನ್ಹೆ ಚೀವ್ನು ತೃಪ್ತ್ ರಾಬಿಲ್ಯಾ ವಾಸ್ರಾಲೆ ವಲ್ಲೆ ವೊಂಟಾಂತು..

ಆನಿ...
ಎಕಾ ಅನಾಥ್ ಅಶಕ್ತ್ ಮನುಶ್ಯಾಕ್
ಖಾವೊನು, ಪಿವೊನು ನಿದಾಯ್ನಾ ಫುಡೆ
ಮದರ್ ತೆರೆಜಾಲ್ಯಾ ದಯಾಳ್ ದೊಳ್ಯಾಂತು
ಮಾಕಾ ದೇವ್ ಪ್ರಕಟ್ ಜಾಲೊ

-ಅರುಣಾ ರಾವ್ ಕುಂದಾಜೆ