ಸಂಪಾದಕೀಯ್:

ಕೊಂಕಣಿ ಕವಿತೆಚೊ ಫುಡಾರ್ ಓಸ್ಟಿನ್ ಡಿ'ಕುನ್ಹಾ

ಭುರ್ಗ್ಯಾಂ ಮಧೆಂ ಸಹಜ್ ಪ್ರತಿಭಾ ಆಸ್ತಾ. ಪುಣ್ ತಿ ಎಕೆ ಮಾಂಡಾವಳೆರ್ ಘಾಲುಂಕ್ ತಾಂಕಾಂ ಕಷ್ಟ್ ಮಾರ್ತಾತ್. ತವಳ್ ತಾಂಣಿ ಆಶೆಲ್ಲೆಬರಿ, ತೆ ಪ್ರತಿಭೆಕ್ ಆಕಾರ್ ದೀಂವ್ಕ್ ಸರ್ವಾಂಕ್ ಕಳಿತ್ ಜಾಯ್ನಾ. ಪುಣ್ ಹಾಂಗಾಸರ್ ಪುತಾಚ್ಯಾ ಪ್ರಯತ್ನಾಕ್ ಬಾಪಾಯ್ನ್ ಪೋಸ್ ಕೆಲಾ. ಓಸ್ಟಿನ್ ಡಿಕುನ್ಹಾ, ಕವಿ ಎಂಡ್ರ್ಯೂ ಡಿಕುನ್ಹಾಚೊ ಪೂತ್. ವರ್ಸ್, ದೋನ್ ವರ್ಸಾಂ ಥಾವ್ನ್ ಕವಿತೆ ಥಂಯ್ ತಾಕಾ ವೋಡ್ ಆಸಾ ಮ್ಹಳ್ಳೆಂ ಹಾಂವೆ ಆಯ್ಕಲ್ಲೆಂ. ಎಕೆ ಕವಿಗೋಷ್ಟಿಕ್ ಯೇವ್ನ್ ಬಾಪಾಯ್ಚಿ ಕವಿತಾ ತಾಣೆಂ ವಾಚಲ್ಲಿ ಸೈತ್.

ಆಯ್ಲೆವಾರ್, ಸುಂದರ್ ಆಲೊಚೆನ್ಯೊ ರೋಮಿ ಲಿಪಿಂತ್ ಬರೊವ್ನ್ ಮಾಂಡಾವಳೆರ್ ದವರ್‍ಚೆಂ ತಾಣೆಂ ಪ್ರೇತನ್ ಕೆಲ್ಲೆವಿಶಿಂ ಹಾಂವೆಂ ಆಯ್ಕಲ್ಲೆಂ. ಅಸಲಿ ಏಕ್ ಗಜಾಲ್, ಕವಿತಾ ಶೆತಾಂತ್ ವರ್ಸಾಂ ವರ್ಸಾಂ ಹೆಳಲ್ಲ್ಯಾ ಕವಿಂಕಯ್ ಕಷ್ಟಾಂಚಿ. ಪುಣ್ ಓಸ್ಟಿನಾಚೆಂ ಕಾವ್ಯಾಕ್ ಜಾಯ್ ಜಾಲ್ಲೆಂ ಚಿಂತಪ್, ತೆಂ ಅದ್ಭುತ್. ಅಸಲಿ ದೀಷ್ಟ್ ಫುಡಾರಾಂತ್ ತೊ ಏಕ್ ವ್ಹರ್ತೊ ಕವಿ ಜಾಂವ್ಚೆ ದಿಶೆನ್ ತಾಕಾ ವಾಟ್ ದಾಕಯ್ತಲಿ ಮ್ಹಳ್ಳೆಂ ಖಂಡಿತ್.

ಹಾಂವ್ ಖೂಬ್ ಸಂತೊಸ್ ಜಾಲಾಂ. ತಾಚೆ ಪ್ರಾಯೆಚ್ಯಾಕಯ್ ತಾಚೆಂ ಚಿಂತಪ್ ಎಕ್ದಮ್ ಜೂನ್ ಆಸಾ. ಎಕಾ ಭುರ್ಗ್ಯಾಕ್ ಜಾಯ್ ಆಸ್ಚಿ ಸವಾಲಾಂ ಘಾಲ್ಚಿ (ತಿಂ ಮತಿಂತ್ ಮಾತ್ರ್ ಉಬ್ಜೊಂಚೀಂಯ್ ಜಾವುಂಯೆತಾತ್) ಸಕತ್ ತಾಚೆ ಥಂಯ್ ಆಸಾ. ತಾಚೆ ಭೊಂವ್ತಣಿ ಕಿತೆಂ ಘಡ್ತಾ ತೆಂ ಪಳೆಂವ್ಚಿ ತಾಂಕ್ ತಾಕಾ ಆಸಾ. ಸಗ್ಳ್ಯಾಚ್ಯಾಕಯ್ ಎಕಾ ಭುರ್ಗ್ಯಾಚೆಂ ನೆಂಟೆಂ ಚಿಂತಪಯ್ ಹಾಂಗಾಸರ್ ಉಟೊನ್ ದಿಸ್ತಾ.

ಓಸ್ಟಿನಾಕ್ ಪೊಟ್ಲುನ್ ಧರುನ್ ಆಮ್ಚೆ ಸರ್ವಾಂಚೆ ಉಲ್ಲಾಸ್. ಶಾಭಾಸ್, ಶಾಭಾಸ್ ಓಸ್ಟಿನ್!

-ಮೆಲ್ವಿನ್ ರೊಡ್ರಿಗಸ್
 
ಕವಿತಾ:

ಮ್ಹಾಕಾ ಗೊತ್ತುನಾ

1.

ಕಾಲ್
ಮ್ಹಜೊ ಡಾಡಾಯ್
ಅಣ್ಣಾ ಹಜಾರೆ ಜಾಲ್ಲೊ
 
ಮಮ್ಮಾನ್ ಚಾಪ್ಪೆ
ಪೇಜ್ ಕೆಲ್ಲ್ಯಾ ದಿಸಾಚ್
ಡಾಡಾ
ಆಣ್ಣಾ ಹಜಾರೆ ಕಿತ್ಯಾಕ್
ಜಾತಾ ತೆಂ ಮಾಕಾ
ಮ್ಹಾಕಾ ಗೊತ್ತುನಾ
 
 
2.
 
ಟೀಚರಿನ್ ಮಾಕಾ
ಬಾಬಾ ಆಮ್ಟೆಚೊ
ಡ್ರೆಸ್ಸ್ ಘಾಲ್ನ್
ನಟನ್ ಕರುಂಕ್ ಸಾಂಗ್ಲಾಂ
 
ಮಮ್ಮಾ
ಬಾಬಾ ಆಮ್ಟೆಚೆಂ
ಪಿಂಜ್‌ಲ್ಲೆಂ ಬನ್ಯಾನ್
ಹಾಡುಂಕ್
ಸಿಟಿ ಸೆಂಟರಾಕ್
ವೆತಾ ಖಂಯ್
 
ಸಿಟಿ ಸೆಂಟರಾಂತ್
ಪಿಂಜ್‌ಲ್ಲಿಂ
ಜೀನ್ಸ್ ಪೆಂಟಾಂ
ಹಾಂವೆಂ ಪಳೆಲ್ಯಾಂತ್.
ಬಾಬಾ ಆಮ್ಟೆಚೆಂ
ಪಿಂಜ್‌ಲ್ಲೆಂ
ಬನ್ಯಾನ್ ಮೆಳ್ತಾಗಿ
ಮ್ಹಾಕಾ ಗೊತ್ತುನಾ.
 
 
3.
 
ಮಮ್ಮಾ ಕುಮ್ಗಾರಾಚಿ
ದೊತೊರ್ನ್ ಶಿಕಯ್ತಾನಾ
ಸಾಂಗ್ಲೆಂ ಹಾಂವೆಂ
'ಜೆಜುಚಿ
ಹೇರ್ ಸ್ಟೈಲ್ ಮ್ಹಾಕಾ
ಮಸ್ತು ಲೈಕ್ ಮ್ಹಣ್'
ಎಕೆಕಾ ಫೊಟೊಂತ್
ನವಿ ನವಿ ಹೇರ್ ಸ್ಟೈಲ್
 
ಮಾಮ್ಮಾ ಮ್ಹಣಾಲಿ
ದೊತೊರ್ನಿಚಾ ಸಿಸ್ಟ್ರಾಕ್
ಸಾಂಗನಾಕಾ
ಕುಮ್ಗಾರ್ ಮೆಳ್ಚೊನಾ
 
ಜೆಜುನ್ ಹೇರ್ ಸ್ಟೈಲ್
ಮಸ್ತು ಪಾವ್ಟಿಂ ಕಿತ್ಯಾಕ್ ಬದ್ಲಿಲ್ಯಾ
ತೆಂ ಮಾಕಾ ಗೊತ್ತುನಾ
ಟೀಚರಿಕ್ ಸಾಂಗ್ಲ್ಯಾರ್
ಕುಮ್ಗಾರ್ ಕಿತ್ಯಾಕ್ ಮೆಳ್ನಾ
ತೇಂಯ್ ಮ್ಹಾಕಾ ಗೊತ್ತುನಾ.
 
4.
 
ಬೆಜೈ ಲೂರ್ಡ್ ಸೆಂಟ್ರಲ್ ಸ್ಕೂಲಾಚ್ಯಾ
ಮುಖಾರ್‌ಚ್ ಆಸ್ಚ್ಯಾ ಎಪಾರ್‍ಟ್‌ಮೆಂಟಾ ಥಾವ್ನ್
ಸ್ಕೂಲಾಕ್ ಚಲೊನ್ ವಚೊಂಕ್
ಪಾಂಚ್ ಮಿನುಟಾಂ ವಾಟ್
 
ಕಾರಾರ್ ಗೆಲ್ಯಾರ್ ಧಾ ಮಿನುಟಾಂ
 
ತರೀ ಮಸ್ತು ಭುರ್ಗಿಂ
ಕಾರಾರ್ ವಚೊನ್
ಲೇಟ್ ಕಿತ್ಯಾಕ್ ಪಾವ್ತಾತ್
ತೆಂ ಮ್ಹಾಕಾ ಗೊತ್ತುನಾ.
 
-ಓಸ್ಟಿನ್ ಡಿ'ಕುನ್ಹಾ