ಸಂಪಾದಕೀಯ್ / संपादकीय:

ಆಯ್ಚೊ ದೇವ್ ಮನ್ಶಾ ಜಿವಿತಾ ಥಾವ್ನ್ ವೆಗ್ಳೊ ನ್ಹಯ್

ಕವಿ ಜಿವಿತಾಚ್ಯಾ ಅನ್ಬೋಗಾನ್ ಖೂಬ್ ನ್ಹಾಲಾ. ತ್ಯಾ ದೆಕುನ್ ಅಸಲಿಂ ಉತ್ರಾಂ ಬರೊಂವ್ಕ್ ತಾಕಾ ತಾಂಕ್ ಯೆತಾ. ಘರ್ ಬಾಂದೂನ್ ದೆವಾ ಭಾಶೆನ್ ರಾವ್ಲ್ಯಾರ್ ಘರ್ ಆಪ್ಶೆಂ ದೆವೂಳ್ ಜಾತೆಂ - ಮ್ಹಣ್ಪಾಚೆಂ ಉತರ್ ಜರ್ ತರ್ ತೊ ಮ್ಹಣ್ತಾ, ತರ್ ತಾಚಿ ತಾಂಕ್ ಕಿತ್ಲಿ ಮ್ಹಳ್ಳೆಂ ತುಮಿಂಚ್ ಪಾರ್ಕಿಯಾ.

ವಿಜ್ಞಾನ್ ಆಜ್ ಜಾಯ್ತೆಂ ಮುಕಾರ್ ಪಾವ್ಲಾಂ. ಆಯ್ಚೊ ದೇವ್ ಮನ್ಶಾ ಜಿವಿತಾ ಥಾವ್ನ್ ವೆಗ್ಳೊ ನ್ಹಯ್. ತಾಕಾ ಆಮಿ ಆಮ್ಚ್ಯಾ ಬರ್ಯಾ ಚಿಂತ್ಪಾನ್, ಬರೆ ಕರ್ನೆನ್ ತವಳ್ ತವಳ್ ಸೃಷ್ಟಿ ಕರ್ತಾಂವ್. ಇತ್ಲೆಂ ಆಸೊನಯ್, ಜಿವಿತಾ ಥಾವ್ನ್ ದೆವಾಕ್ ವೆಗ್ಳೊ ದೆಖ್ಚೆ ಮನೀಸ್ ಆಜೂನಯ್ ಆಮ್ಚೆ ಮಧೆಂ ಜಾಯ್ತೆ ಆಸಾತ್. ತೆ ರಸ್ತ್ಯಾರ್ ನಿದೊನ್ ದೆವ್ಳಾಂತ್ಲ್ಯಾ ದೆವಾಚಿ ಪುಜಾ ಕರ್ತಲೆ ಮನೀಸ್.

ಹಾಂಚೆವಿಶಿಂ ಕವಿನ್ ಹಿ ಕವಿತಾ ರಚ್ಲ್ಯಾ. ಆರ್. ರಾಮನಾಥ್ ಪಯ್ಲೆ ಪಾವ್ಟಿಂ ಕವಿತಾ ಕುಳಾರಾಕ್ ಪಾವ್ಲಾ. ತಾಕಾ ಆಮಿಂ ಯೆವ್ಕಾರ್ ದಿತಾಂವ್.

-ಮೆಲ್ವಿನ್ ರೊಡ್ರಿಗಸ್ / मेल्विन रोड्रीगस

ಕವಿತಾ / कविता

ಘರಾಚಿ ಬುನ್ಯಾದ್ ಮಾರ್ತಾನಾ

ಘರಾಚಿ ಬುನ್ಯಾದ್ ಮಾರ್ತಾನಾ
ತಾಕಾ ಕಾಂಯ್ ದೆವ್ಳಾಚ್ಯೊ ವಸ್ತು ಮೆಳ್ಳ್ಯೊ
ಆದ್ಲ್ಯಾ ತೆಂಪಾರ್ ಘಡ್ಯೆ ಥಂಯ್ ದೆವೂಳ್ ಆಸುಂಯೆತ್
ಮ್ಹಣ್ ತಾಣೆಂ ಉತ್ಖನ್ನ್ ಕೆಲೆಂ
ಪೂಣ್ ತಾಕಾ ಥಂಯ್ ಆನೀಕ್ ಕಾಂಯಿಂಚ್ ಮೆಳ್ಳೆಂ ನಾ
ಹಾಂವ್ ಮ್ಹಣ್ಟಾಂ
ಉತ್ಖನ್ನ್ ಕರ್ಪಾ ವಾಟ್ಯಾ
ತಾಣೆಂ ಥಂಯ್ ಬರೆಂ ಘರ್ ಬಾಂದ್ಪಾಚೆಂ
ಆನಿ ತಾಂತುಂತ್ ದೆವಾಭಾಶೆನ್ ರಾವ್ಪಾಚೊ
ಘರ್ ಆಪ್ಶೀಂಚ್ ದೆವೂಳ್ ಜಾತಲೆಂ ಆಶಿಲ್ಲೆಂ...!

ಆತಾಂ ತೊ ಕಪಲಾರ್ ಹಾತ್ ದವರೂನ್ ಬಸ್ಲಾ... ಬೇಘರ್!