ಸಂಪಾದಕೀಯ್:
ಸಮಾಜೆಂತ್ಲೆ ಪೊಕೊಳ್ ವೆವಸ್ಥೆಚೆರ್ ಬೋಟ್ ಜೊಕ್ಚಿ ಕವಿತಾ
ಆಯ್ಚೆ ಸಮಾಜೆಚೆ ಪೊಕೊಳ್ ವೆವೆಸ್ಥೆಚೆರ್ ಸವಾಲ್ ಕರ್‍ಚಿ ಏಕ್ ಉಚಾಂಬಳಿ ಕವಿತಾ ಹಾಂಗಾಸರ್ ಕವಿ ವಲ್ಲಿ ಕ್ವಾಡ್ರಸಾನ್ ಸಾದರ್ ಕೆಲ್ಯಾ. ಹೆರಾಂಚ್ಯಾ ನಾಂವಾಚೆರ್ ಖದ್ವಳ್ ಉಡವ್ನ್, ಸ್ವತಾ ನಾಂವ್ ಜೊಡುಂಕ್ ಪೆಚಾಡ್ಚಿ ಕಲಾ ಸರ್‍ವಾಂಕ್ ಆಪ್ಣಾಂವ್ಕ್ ಸಾಧ್ಯ್ ನಾ. ಥೊಡೆ ತಾಂತುಂ ಯಶಸ್ವಿ ಜೊಡ್ತಾತ್. ಆಯ್ಚೆ ಸಮಾಜೆಚಿ ಏಕ್ ವಿಕಾಳ್ ವೆವಸ್ಥಾ ಅಸಲ್ಯಾ ಕುತಂತ್ರ್ ಕಾಮಾಂಚಿ ಪಾಟ್ ಥಾಪುಡ್ತಾ ದೆಕುನ್ ಅಸಲೆ 'ಕಿಡೆ' ತಾಂಚೆ ಜಿಣಿಯೆಂತ್ ಯಶಸ್ವಿ ಜೊಡ್ತಾತ್. ಅಸಲ್ಯಾ ಕಿಡ್ಯಾಂ ಪಯ್ಕಿ ಆಪುಣ್‌ಯ್ ಎಕ್ಲೊ ಮ್ಹಣೊನ್ ಸಾಂಗೊಂಕ್ ಹೆ ಕವಿತೆಂತ್ಲೊ ನಾಯಕ್ ಪಾಟಿಂ ಸರನಾ. ಅಸಲೆಂ ಧೈರ್ ಹೆ ಕವಿತೆಚಿ ವ್ಹಡ್ವಿಕಾಯ್ ಗಾಜಯ್ತಾ.
ಕವಿ ವಲ್ಲಿ ಕ್ವಾಡ್ರಸ್ ಕವಿತಾಖಳಾಂತ್ ಸರಾಗ್ ಕೊಸುನ್ ಆಸ್ಚೊ ಮನೀಸ್. ಹ್ಯಾ ತಾಚ್ಯಾ ವಾವ್ರಾ ಮಾರಿಫಾತ್ ಕುವೈಟ್ ಶೆರಾಂತ್ ಕವಿತೆಚಿ ಏಕ್ ವೊಗಿ ಕ್ರಾಂತಿ ಜಾವ್ನ್ ಆಸಾ. ಆಶಾವಾದಿ ಪ್ರಕಾಶನಾದ್ವಾರಿಂ ಕೊಂಕಣಿ ಸಾಹಿತ್ಯಾಚೊ ಪೋಸ್ ಕರ್‍ಚೆಂ ತಾಚೆಂ ಸಾಧನ್ ವಾಖಣ್ಚೆ ತಸಲೆಂ.
'ಚ್ಯಾರ್ ಮುಖಾಂ' ಪುಸ್ತಕಾ ಉಪ್ರಾಂತ್ ಕವಿತೆಚೆಂ ತಾಚೆಂ ದುಸ್ರೆಂ ಪುಸ್ತಕ್ 'ಕಟ್‌ಪುತ್ಳಿ' ಹ್ಯಾಚ್ ವರ್‍ಸಾ ಜನೆರಾಂತ್ ಪರ್ಗಟ್ ಜಾಲಾಂ. ಹ್ಯಾ ತಾಚ್ಯಾ ಪುಸ್ತಕಾಕ್ ಸುರ್‍ವಿಲಿಂ ಉತ್ರಾಂ ಬರಯಿಲ್ಲ್ಯಾ 'ಎಚ್ಚೆಮ್ಮಾ'ನ್ ಸಾಂಗ್ಚೆಬರಿ ವಲ್ಲಿ ಕ್ವಾಡ್ರಸಾಚ್ಯಾ ಕವಿತೆಂತ್ಲ್ಯಾ ನಾಯಕಾಂನಿ ಸಮಾಜೆಕ್ ಅಣ್ಕುಂಚೆಂ, ತಶೆಂ ಕರುನ್ ಸಮಾಜೆಂತ್ಲಿ ಪೊಕೊಳ್ ವೆವಸ್ಥಾ ತಿದ್ವುಂಚೆಂ ಪ್ರೇತನ್ ಕೆಲಾಂ. ಹೀಯ್ ಕವಿತಾ ತೆಂಚ್ ಕರ್‍ತಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಕಿಡೆರೆ ಆಮಿ
ಏಕ್ ಮೂಟ್ ಮಾತಿಯೆಂತ್ ಜಲ್ಮಲ್ಲೆ
ಕೆನ್ನಾಂ ಶೆಣಾಂತ್ ಬುಡೊನ್
ಕೆನ್ನಾಂ ಮೆಣಾಂತ್ ಕಡೊನ್
ಮೊರೊನ್ ಮೊರೊನ್ ಜಿಯೆಂವ್ಚೆ
ಕಿಡೆರೆ ಆಮಿ ಕಿಡೆ
ಏಕ್ ಘಡಿ ಉಟೊಂಕ್ ಪಳೆಂವ್ಚೆ
ಕೆನ್ನಾಂ ಸೊದೊಮ್ ಗೊಮೊರ್
ಕೆನ್ನಾಂ ಸುನಾಮಿಚೆಂ ಲ್ಹಾರ್
ಭೊಗುನ್ ಭೊಗುನ್ ಜೆಮೆಂವ್ಚೆ
ಕಿಡೆರೆ ಆಮಿ ಕಿಡೆ
ಎಕೆ ಘಡಿಯೆಚ್ಯಾ ಸುಕಾಕ್ ದೆಖ್ಚೆ
ಕೆನ್ನಾಂ ಮಾಸಾಂ ಭೊಕಾವ್ನ್
ಕೆನ್ನಾಂ ರಗತ್ ಚಿಂವೊನ್
ಹೆರಾಂಚ್ಯಾ ರಗ್ತಾಂತ್ ನ್ಹಾಂವ್ಚೆ
ಕಿಡೆರೆ ಆಮಿ ಕಿಡೆ
ಎಕಾ ಜಿವಾಕ್ ರಾಕ್ಚೆ ಪಾಸತ್
ಕೆದ್ನಾಂ ವಯ್ರ್ ಉಡೊನ್
ಕೆನ್ನಾಂ ಸಕ್ಲಾ ಪಡೊನ್
ಹೆರಾಂಚ್ಯಾ ಮಾನಾಕ್ ಲುಟ್ಚೆ
ಕಿಡೆರೆ ಆಮಿ ಕಿಡೆ
ಏಕ್ ಕಿಡೊ ಹಾಂವ್, ಏಕ್ ತುಂ
ಕೆನ್ನಾಂ ಮುಕುಟ್ ಜೊಡ್ಚ್ಯಾಕ್
ಕೆನ್ನಾಂ ಮುಕುಟ್ ಮೊಡ್ಚ್ಯಾಕ್
ವೊಳೊನ್ ಲೊಳೊನ್ ಪಡ್ಚೆ
ಕಿಡೆರೆ ಆಮಿ ಕಿಡೆ
-ವಲ್ಲಿ ಕ್ವಾಡ್ರಸ್, ಅಜೆಕಾರ್