ಸಂಪಾದಕೀಯ್:

ಸೊಸ್ಣಿಕಾಯೆಚೆಂ ವೊಕತ್ ಖಂಯ್ಚೀಯ್ ಪಿಡಾ ಗೂಣ್ ಕರ್ತಾ

ಅವೇಳ್ ಮ್ಹಳ್ಯಾರ್ ಅವ್ಚಿತ್, ಯಾ ಅನುಚಿತ್ ವೇಳ್. ಜಿವಿತಾಂತ್ ಆಮಿ ಚಿಂತಲ್ಲೆಬರಿ ಥೊಡೆ ಪಾವ್ಟಿಂ ಘಡನಾ. ಕಸಲಿಗೀ ಆಮ್ಚ್ಯಾ ಚಿಂತ್ಪಾ ಭಾಯ್ಲಿ ಸಕತ್ ಏಕ್, ಆಮ್ಚ್ಯಾ ಬರೆಪಣಾಲಾಗಿಂ ಖೆಳ್ ಖೆಳ್ತಾ ಮ್ಹಣೊನ್ ತವಳ್ ಆಮಿ ಚಿಂತಾಂವ್.  ಆಮಿ ರಡ್ತಾಂವ್. ಆಮಿ ಬೋವ್ ಎಕ್ಸುರೆ/ಎಕ್ಸುರಿಂ ಉರ್ತಾಂವ್. ಆಮ್ಚೆಂ ಮನಾಧೈರ್ ಅಸ್ಕತ್ ಥಾರ್ತಾ ಹ್ಯಾ ಸಂದರ್ಭಾರ್.

ಅಸಲ್ಯಾ ಘಡಿತಾಂಚಿ ಏಕ್ ಕವಿತಾ ಸುಂದರ್ ರಿತಿನ್ ರೂಪಾಲಿ ಕೀರ್ತನಿನ್ ಬರಯ್ಲ್ಯಾ. ವಾಚ್ತಾನಾ ಮನ್ ಕಳ್ವಳ್ತಾ.

ಫಕತ್ ಸೊಸ್ಣಿಕಾಯೆಚೆಂ ವೊಕತ್ ಮಾತ್ರ್ ಅಸಲೆ ಪಿಡೆಕ್ ನಾಟ್ವತಾ ಶಿವಾಯ್ ದುಸ್ರೆಂ ಕಾಂಯಿಂಚ್ ನಾ!

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಅವೇಳ್

ಕೆನ್ನಾ ಕೆನ್ನಾಂಯ್ ದಿಸ್ತಾ ಮ್ಹಾಕಾ,
ಅಶೆಂ ಕಿತ್ಯಾಕ್ ಘಡ್ಟಾ?
ಫುಲ್ಚೆ ಪಯ್ಲೆಂಚ್ ಫುಲ್ ಅಶೆಂ
ಅಚ್ಕಿತ್ ಕಿತ್ಯಾಕ್ ಝಡ್ಟಾ?

ರೊಪಾರ್ ಆಪ್ಲ್ಯಾ ನವೆಚ್ ಕೊಮ್ರೆಕ್
ವಾರೊ ಕಿತ್ಯಾ ತೊಡ್ಟಾ?
ಝಾಡ್ ಧರ್‍ಚೆ ಪಯ್ಲಿಂಚ್ ರೋಂಪ್
ಹುಮ್ಟುನ್ ಕಿತ್ಯಾಕ್ ಪಡ್ಟಾ?

ನಿಕ್ತೆಚ್ ಧರ್ಪಿ ಫಳಾಕ್
ಭಿತರ್ ಕೀಡ್ ಕಿತ್ಯಾಕ್ ಲಾಗ್ತಾ?
ಕೋಮ್ ಯೆಂವ್ಚೆ ಪಯ್ಲಿಂಚ್ ಬೀ
ಕುಸೂನ್ ಕಿತ್ಯಾಕ್ ಸೊಂಪ್ತಾ?

ಖಾಂದ್ಯೆರ್ ಬಸುನ್ ಧೊಲ್ತಾನಾ
ಖಾಂದಿ ಕಿತ್ಯಾಕ್ ಮೊಡ್ಟಾ?
ಚಲ್ತಾಂ ಚಲ್ತಾಂ ವಾಂಗ್ಡಿ ಮಧೀಂಚ್
ಸಾಂಗಾತ್ ಕಿತ್ಯಾಕ್ ಸೊಡ್ಟಾ?

ಅವೆಳಾರ್ ಕೆನ್ನಾಂ ಕೆನ್ನಾಂಯ್
ಅಶೆಂ ಕಿತ್ಯಾಕ್ ಘಡ್ಟಾ?
ಹಾಂಸ್ಚ್ಯಾ, ಖೆಳ್ಚ್ಯಾ, ವಾಡ್ಚ್ಯಾ ವೆಳಾರ್
ಕಾಳ್ ಕಿತ್ಯಾಕ್ ವೊಡ್ಟಾ?
ಕಾಳ್ ಕಿತ್ಯಾಕ್ ವೊಡ್ಟಾ?

-ರೂಪಾಲಿ ಕೀರ್ತನಿ

संपादकीय:

सोसणिकायेचें वोकत खंयचीय पिडा गूण कर्ता

अवेळ म्हळयार अवचित, या अनुचित वेळ. जिवितांत आमी चिंतल्लेबरी थोडे पावटीं घडना. कसलिगी आमच्या चिंत्पा भायली सकत एक, आमच्या बरेपणालागीं खेळ खेळता म्हणोन तवळ आमी चिंतांव.  आमी रडतांव. आमी बोव एकसुरे/एकसुरीं उर्तांव. आमचें मनाधैर अस्कत थार्ता ह्या संदर्भार.

असल्या घडितांची एक कविता सुंदर रितिन रूपाली कीर्तनिन बरयल्या. वाचताना मन कळवळता.

फकत सोसणिकायेचें वोकत मात्र असले पिडेक नाटवता शिवाय दुस्रें कांयिंच ना!

-मेलविन रोडरिगस

कविता:

अवेळ

केन्ना केन्नांय दिस्ता म्हाका,
अशें कित्याक घडटा?
फुल्चे पयलेंच फुल अशें
अचकित कित्याक झडटा?

रोपार आपल्या नवेच कोम्रेक
वारो कित्या तोडटा?
झाड धर‍चे पयलिंच रोंप
हुमटुन कित्याक पडटा?

निक्तेच धर्पी फळाक
भितर कीड कित्याक लागता?
कोम येंवचे पयलिंच बी
कुसून कित्याक सोंप्ता?

खांद्येर बसुन धोल्ताना
खांदी कित्याक मोडटा?
चल्तां चल्तां वांगडी मधींच
सांगात कित्याक सोडटा?

अवेळार केन्नां केन्नांय
अशें कित्याक घडटा?
हांसच्या, खेळच्या, वाडच्या वेळार
काळ कित्याक वोडटा?
काळ कित्याक वोडटा?

-रूपाली कीर्तनी