ಸಂಪಾದಕೀಯ್:
ಖೊಟೆಪಣಾಚ್ಯಾ ಕೊಂಡಾಂತ್ಲೊ ಬರೊ ಕಿಡೊ
ಸಂಸಾರ್ ಸಗ್ಳೊ ಖೊಟೆಪಣಾಚ್ಯಾ ಕೊಂಡಾಂತ್ ಬುಡೊನ್ ಗೆಲಾ ಆಸ್ತಾಂ, ಖಂಯ್ಚೇಯ್ ವೆಕ್ತಿಕ್ ಬರೆಪಣಾಚ್ಯೊ ಕುರ್‍ವೊ ಝಳ್ಕೊಂಕ್ ಸಲೀಸಾಯೆನ್ ಸಾಧ್ಯ್ ನಾ. ತಸಲಿ ಏಕ್ ಗರ್ಜ್‌ಯ್ ಆಮ್ಕಾಂ ದಿಸನಾ. ಖೊಟೆಪಣಾಚ್ಯಾ ಕೊಂಡಾಂತ್ ಏಕ್ 'ಬರೊ ಕಿಡೊ' ಉದೆತ್ ತರ್ ತಾಕಾ ಕೊಣ್‌ಯ್ ತರೀ ಕಿತ್ಯಾಕ್ ಹುಂಗ್ತಲೊ?
ಬರೆಪಣಾಚ್ಯೊ ಸರ್‍ವಯ್ ಕುರ್‍ವೊ ದೊಳ್ಯಾಂ ಮುಕಾರ್ ಹಾಡುನ್ ಆಪ್ಣೇಂಯ್ ಬರೆಂ ಜಾಯ್ಜೆ ಮ್ಹಳ್ಳೆಂ ಏಕ್ ಬರೆಂ ಚಿಂತಪ್ ಹೆ ಕವಿತೆಂತ್ಲೊ ವೆಕ್ತಿ ಹುಜಿತ್ ಕರ್‍ತಾ. ಹಿ ಏಕ್ ಸುಫಳ್ ಜಾಂವ್ಕ್ ಸಾಧ್ಯ್ ನಾತ್‌ಲ್ಲಿ ಆಶಾ! ತರೀ ತಶೆಂ ಆಶೆವ್ನ್ ಖಿಣಾಕ್ ತರೀ - ಆಶೆಲ್ಲ್ಯಾ 'ಸಪ್ಣಾ ಸಂಸಾರಾಂತ್' ಲೊಳ್ಚಿ ತಾಕತ್ ಕವಿ ಆಪ್ಣಾಂವ್ಕ್ ಸಕ್ತಾತ್.
ಮಿಕ್‌ಮ್ಯಾಕ್ಸ್ - ನಾಟಕ್, ನವಲ್, ನವಲಿಕ್, ಲೇಖನಾಂ ಅಶೆಂ ಸಾಹಿತ್ಯಾಚ್ಯಾ ಹರ್ ಪ್ರಾಕಾರಾಂನಿ ಯಶಸ್ವೆನ್ ಪಾವ್ಲಾಂ ಕಾಡ್‌ಲ್ಲೊ ಸಾಹಿತಿ. ಗೀತ್‌ಕಾರ್ ಜಾವ್ನ್ ಜಾಯ್ತ್ಯಾ ಫಾಮಾದ್ ಪದಾಂಕ್ ತಾಣೆ ಉತ್ರಾಂ ದಿಲ್ಯಾಂತ್. ಹ್ಯಾ ವರ್ಸಾ 'ಸಂದೇಶ' ಕೊಂಕಣಿ ಸಾಹಿತ್ಯ ಪ್ರಶಸ್ತಿ ಆಪ್ಣಾಯಿಲ್ಲ್ಯಾ ತಾಕಾ, ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿನ್ ಏಕ್ ವಿಶೇಸ್ ಜವಾಬ್ದಾರಿ ದೀವ್ನ್, - ಆಪ್ಲೊ ಸಾಂದೊ ಜಾವ್ನ್ ಹ್ಯಾಚ್ ಮ್ಹಯ್ನ್ಯಾಂತ್ ನಮಿಯಾರ್‍ಲಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಭುರ್ಗೆಂಪಣ್
ಸುರ್ಯಾ,
ಉದೆವ್ ತುಜೊ ಹರ್ ದಿಸಾ
ಫಾಂಕವ್ನ್ ಕಿರ್ಣಾಂ ಹರ್ ದಿಶಾಂ
ಹೊಚ್ ಮ್ಹಜೊ, ಪರ್ಕಿ ಪೆಲೊ
ಪ್ರಕಾಸ್ ದಿತಾಯ್, ಕೊನ್ಶಾ-ಕೊನ್ಶಾಕ್
ಫುಲಾ,
ಫುಲ್ತಾಯ್ ತುಂ ಸರ್‍ತಚ್ ನಿಶಾ
ಸರ್ಗಿಂ ಸುವಾದ್, ಯೆವ್ಕಾರ್ ಉಷಾ
ನಾ ಭೇದ್, ನಾ ಜಾತ್, ನಾ ಧರಮ್
ತನ್-ಮನ್ ಭರಿ, ಹರ್ ಮನ್ಶಾ
ಉದ್‌ಕಾ
ಧರಣಿ ಗರ್ಭಾಂತೂನ್, ಭಾಯ್ರ್ ತಿಳುನ್
ಮೇಲ್-ಕೀಳ್, ನಾಂಚ್ ಚಿಂತುನ್
ಸರ್ವಾಂಚಿ ತಾನ್ ಭಾಗವ್ನ್ ಅಶಿ
ಧಾಂವ್ ತುಜಿ ಸಾಗೊರಾ ದಿಶಿಂ
ಭುರ್ಗ್ಯಾ,
ಆಂಜಾಳ್ ವದನ್, ಮಾಸೂಮ್ ಚಿಂತನ್
ಸಗ್ಳೆ ಆಪ್ಲೆಚ್, ಜೊ ಲಾಗಿಂ ಬಸೊಂ
ನಾಂಚ್ ಫಿಕಿರ್, ಹೊ ಸಂಸಾರ್ ಅಸೊ
ಉತಳ್ ಮತ್, ನಿತಳ್ ಹಾಸೊ
ದೆವಾ-
ತುಂವೆ ಮ್ಹಾಕಾ ಸುರ್ಯೊ ಕೆಲೊನಾ
ಪರ್ವಾನಾ.
ಫುಲ್ ಜಾಲೊಂನಾ.
ಚಿಂತಾ ನಾ.
ಉದಕ್ ಕೆಲೆಂನಾಂಯ್
ದುರ್ಸಾ ನಾ.
ದಿಲ್ಲೆಂ ಏಕ್ ಭುರ್ಗೆಂಪಣ್
ಕಿತ್ಯಾ ಶಾಸ್ವಿತ್ ಜಾಲೆಂನಾ?
-ಮಿಕ್‌ಮ್ಯಾಕ್ಸ್