ಸಂಪಾದಕೀಯ್:
ಕಾಳೊಕಾಂತ್ ಲಿಪೊನ್ ವೆಚೆ ಅತ್ತ್ಯಾಚಾರ್
ಹಿಂದು ಜಾಗರಣ್ ವೇದಿಕೆನ್ ಮಂಗ್ಳುರ್ ಪಡೀಲಾಂತ್ ಚಲಯಿಲ್ಲ್ಯಾ ಹಲ್ಲ್ಯಾ ಉಪ್ರಾಂತ್ ಜಾಗೃತ್ ಜಾಲ್ಲ್ಯಾ ಕೊಂಕಣಿ ಕವಿಂ ಪಯ್ಕಿ ಆಂಡ್ರ್ಯೂ ಡಿಕುನ್ಹಾ ಎಕ್ಲೊ. ಚಲಿಯಾಂಚೆರ್ ದಾದ್ಲ್ಯಾಂಚಿ ದೀಷ್ಟ್ ಕಿತ್ಯಾಕ್ ಅಶಿ? ಆಮ್ಚ್ಯಾ ಗಾಂವಾಂತ್ ಲ್ಹಾನ್ ಸಾನ್ ಭುರ್ಗ್ಯಾಂಚೆರ್ ಕಾಮುಕಿ ಅತ್ತ್ಯಾಚಾರ್ ಜಾತಾತ್. ಆನಿ ಹೆ ಕಾಮುಕಿ ಥೊಡೆ ಪಾವ್ಟಿಂ ಕುಟ್ಮಾ ಭಿತರ್‍ಲೆಚ್ ಆಸ್ತಾತ್ - ಬಾಪ್ಲ್ಯೊ, ಮಾವ್ಳೊ, ಭಾವ್ ಆನಿ ಹಾ, ಬಾಪಯ್ ಸೈತ್!
ಹಿಂ ಘಡಿತಾಂ ಜಾಹೀರ್‌ಚ್ ಜಾಯ್ನಾಂತ್. ಕೊಣಾಯ್ಕಿ ಹ್ಯಾ ಕರಾಳ್ ಘಡಿತಾಂಚಿ ಖಬರ್ ಆಸನಾ. ಕಾಳೆ ಚಿಮ್ಣೆಬರಿ ಹಿಂ ಘಡಿತಾಂ ಉಜ್ವಾಡಾಂತ್ ಘಡೊನಯ್, ಕಾಳೊಕಾಂತ್ ಉರ್‍ತಾತ್ - ಸಾಸ್ಣಾಕ್!
ಹಾಂಗಾಚೊ ಕವಿ ಅಸಲ್ಯಾ ಅಸ್ಕತ್, ದುಬ್ಳ್ಯಾ ತಾಳ್ಯಾಂಚೊ ತಾಳೊ ಜಾಲಾ ಆಪ್ಲೆ ಕವಿತೆ ಮುಕಾಂತ್ರ್. ತಶೆಂ ಕರ್‍ತಾನಾ ಪಡೀಲ್ಚ್ಯಾ ಪ್ರಕರಣಾಂತ್ಲ್ಯಾ ದೋಷಿಂಕ್ ಸೈತ್ ತಾಣೆಂ ಲಜೆಕ್ ಘಾಲಾಂ! (ತಾಂಕಾಂ ಕಸಲಿ ಲಜ್ ಆಸಾ ಮ್ಹಣ್ಚಿ?)
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಹೋಮ್ ಸ್ಟೇ ಆನಿ ಥೊಡಿಂ ಸತಾಂ...
ಹಾಂಗಾ ಕೊಣೀ ಯೇನಾಂತ್
ನಾ ರಿಪೊರ್ಟರ್
ನಾ ಕೆಮರಾ
ದಿಸ್ತಾ ಫಕತ್
ಸೊರ್‍ಯಾ ಬೊಟಲ್
ಆನಿ ಘಾಣ್ಕುಟೆಂ ಮುಸ್ಕರ್
ದಾರ್ಬೆ ನಾಕ್ಶಾಂಚೆ ಹಾತ್
ಮ್ಹಜಿಂ ಅಂಗಾಂಗಾಂ
ಚಿಡ್ಡುನ್ ಮುಡ್ದುನ್ ಪಾಪ್ಸುನ್
ತೊ ಥಕ್ತಾನಾ
ಹಾಂವ್ ಪಿರ್‍ಗತಾಂ
ದುಕಿನ್
ಪೆಟೊನ್ ಆಸಲ್ಲಿ ಚಿಮ್ಣಿಯ್
ಪಾಲ್ವತಾ ತೆದ್ನಾಂ...
ಕುಡಿಚ್ಯಾ ಸಂದಾ ಸಂದಾಚಿ
ಹಿ ದೂಕ್
ಸದಾಂಚಿ
ರಡ್ಚ್ಯಾ ಅತ್ಮ್ಯಾಚಿ ದೂಕ್
ಸಾಸ್ಣಾಚಿ..
ಮ್ಹಜೊ ಅಣ್ಣಾ..
ಜೊ ಘರಾ ರಾವನಾ
(ರಾಂವ್ಚೆಂಯ್ ನಾಕಾ...)
ಹಾಂಗಾ ಸಕ್ಕಡ್ ತಾಕಾ ಪಾಡಾರಿ ಮ್ಹಣ್ತಾತ್
ತೊ ಗಾಂವಾಕ್ ಆಯ್ಲ್ಯಾರ್
ಬಿಡಿ ಬಾಂದ್ಚಿಂ ಧಾಕ್ಟಿಂ ಚೆಡ್ವಾಂ ಸಯ್ತ್
ಧಾಂವೊನ್ ಲಿಪೊನ್ ರಾವ್ತಾತ್..
ತೊ ಶೆರಾಂತ್
ಖಾಕಿ ನ್ಹೆಸನಾತಲ್ಲೊ
ಪೊಲಿಸ್ ಖಂಯ್
ತಾಕಾ ಖಾಕಿ ಪೊಲಿಸ್
ಧರ್‍ತಾತ್ ಆನಿ ಸೊಡ್ತಾತ್
ಆನಿ ಕಣ್ಣು ಮುಚ್ಚಾಲೆ ಖೆಳ್ತಾತ್...
ಪುಣ್ ಹೊ....ಹಾಂಗಾಚ್ ರಾಂವೊನ್
ದೀಸ್ ರಾತ್..ಸೊರೊ ಪಿಯೆವ್ನ್
ಮ್ಹಜೆ ಕುಡಿಲಾಗಿಂ ಖೆಳ್ಚೊ..
ಮ್ಹಜ್ಯಾ ಅತ್ಮ್ಯಾಕ್ ವೊಳ್ವಳಾಂವ್ಚೊ...
ಖಂಯ್ಚ್ಯಾಯ್ ದಳ...ಸೇನೆ..ವೇದಿಕೆಂತ್ಲೊ ನ್ಹಯ್
ಮ್ಹಜಿ, ಕೂಲಿ ಕಾಮಾಚಿ ಆವಯ್ ಮ್ಹಣ್ತಾ
ತೊ ಮ್ಹಜೊ "ಅಪ್ಪಾ"..
ಮ್ಹಜಿ ಕೂಡ್ ಚೆಂಚ್ತಾನಾ
"ಅಪ್ಪಾ..." ಮ್ಹಣ್ ಹಾತ್ ಜೋಡ್ನ್
ತಾಚ್ಯಾ ಪಾಂಯಾಂಕ್ ಪಡ್ತಾನಾ
ಹೊ ರಾಕ್ಕೊಸ್
ಮ್ಹಜ್ಯಾ ಕಾನ್ಸುಲಾಕ್ ಮಾರ್‍ನ್ ಮ್ಹಣ್ತಾ
"ಸೂ...
ತುಜೊ ಆನಿ ತುಜ್ಯಾ ತ್ಯಾ ಬೇವಾರ್‍ಶಿ ಭಾವಾಚೊ
ಅಪ್ಪಾ ಹಾಂವ್ ನ್ಹಯ್ಹಿಂ..."
ಹಾಂಗಾ ಕೊಣೀ ಯೇನಾಂತ್
ನಾ ರಿಪೊರ್ಟರ್
ನಾ ಕೆಮರಾ
ನಿಮಾಣೆಂ ನಾ ಪೊಲಿಸ್
ನಾಂಚ್ ನಾ ದೇವ್..
ಆಸಾ ಫಕತ್ ಪಾಲ್ವಲ್ಲಿ
ಕಾಳಿ ಕಾಳಿ ಚಿಮ್ಣಿ...
-ಆಂಡ್ರ್ಯೂ ಎಲ್. ಡಿಕುನ್ಹಾ