ಸಂಪಾದಕೀಯ್:
ಮ್ಹೆಳೆಂ ಚಡಿತ್ ವ್ಹಾಳ್ಳಾಂ. ಥರ್ಥರ್‍ಯಾಂಚಿಂ ಕುಪಾಂ ಮಾಂಡ್ಲ್ಯಾಂತ್
ಹೆ ಶಿಂಕ್ಳೆಂತ್ಲಿ ಪಾಂಚ್ವಿ ಕವಿತಾ. ಪಾಂಚ್ ದಿಸಾಂನಿ ಪಾಂಚ್ ಕವಿತಾ. ಆಮ್ಚೆ ಕವಿ ಜಾಗೃತ್ ಜಾಲ್ಯಾತ್ ಮ್ಹಳ್ಳ್ಯಾಕ್ ಏಕ್ ಗೊವಾಯ್ ಹಿ.
ಏಕ್ ತಾಂಡವ್ ನೃತ್ಯ್ ಜಾಲಾ ಕೊಡಿಯಾಳಾಂತ್. ಹ್ಯಾ ನಾಚಾ ವೆಳಾರ್ ಖೊಟೆಂ ಚಡಿತ್ ಘಡ್ಲಾಂ. ಮ್ಹೆಳೆಂ ಚಡಿತ್ ವ್ಹಾಳ್ಳಾಂ. ಧೈರ್ ಸಗ್ಳೆಂ ಮಾಯಾಗ್ ಜಾವ್ನ್ ಥರ್ಥರ್‍ಯಾಂಚಿಂ ಕುಪಾಂ ಸಗ್ಳ್ಯಾಂನಿ ಮಾಂಡ್ಲ್ಯಾಂತ್. ಆನಿ ಆತಾಂ ಪಾವ್ಸ್ ವೊತುಂಕ್ ಸುರು ಜಾಲಾ. ಹೊ ಪಾವ್ಸ್ ರಾವೊಂಕ್ ನಜೊ.
ಕೊಣಯ್ ಕಶ್ಯೋಯ್ ಪ್ರತಿಕ್ರಿಯಾ ದೀಂವ್. ಆಮಿ ಕವಿ, ಕವಿತೆ ಮಾರಿಫಾತ್ ದಿವ್ಯಾಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಹ್ಯಾ ನೀಚ್ ಬೊಲ್ಪ್ಯಾಂಕ್ ನಿದಾಯ್ತಾ ಕೋಣ್?
ಭೃಮರಾಂನಿ ಸ್ಪರ್ಶ್ ಕರ್‍ಚ್ಯಾ ಫುಲಾಂಕ್
ಬೊಲ್ಪ್ಯಾಂನಿ ಪಾಪ್ಸುನ್ ಘಾಲಾಂ
ಅಸಲೆ ಗಲೀಜ್ ನಾಲಿಸಾಯೆಕ್
ಕೊಡಿಯಾಳ್ ವಳಗ್ ಜಾಲಾಂ.
ಭಾರತ್ ಮಾತೆಚಿ ಸುಸಂಸ್ಕೃತಿ ರಾಕೊಂಕ್
ಮುಕ್ಲೆ ಪಿಳ್ಗೆಕ್ ದೇಖ್ ದಾಖಂವ್ಕ್
ಅಸಭ್ಯತೆಚೊ ಸಂಹಾರ್ ಜಾಲಾ
ಜಯ್ ಹೋ!
ತಾನ್ ಮ್ಹೆಳ್ಯಾ ಮ್ಹೆಳ್ಯಾ ರಗ್ತಾಚಿ
ರಾಕೊಂಕ್ ಮರ್ಯಾದ್ ದೆಶಾಚಿ
ಏಕ್ ತಾಂಡವ್ ನೃತ್ಯ್ ಜಾಲಾ!
ಜಯ್ ಹೋ!
ರಾಮಾ ರಾಜ್ಯ್
ಕಾಮಾ ರಾಜ್ಯ್
ಕಶೆಂ ಜಾಲೆಂ?
ಮೊನೆ ಜಾಲ್ಲ್ಯಾ ಅತ್ಮ್ಯಾಂಕ್
ಕಿಂಡೆಲ್ಲ್ಯಾ ಕಾಳ್ಜಾಂಕ್
ಸುಕ್ಲೆಲ್ಯಾ ದೊಳ್ಯಾಂಕ್
ಭುಜಯ್ತಾ ಕೋಣ್?
ಹ್ಯಾ ನೀಚ್ ಬೊಲ್ಪ್ಯಾಂಕ್ ನಿದಾಯ್ತಾ ಕೋಣ್?
ಹ್ಯಾ ನೀಚ್ ಬೊಲ್ಪ್ಯಾಂಕ್ ನಿದಾಯ್ತಾ ಕೋಣ್?
-ಜೆರಿ ರಾಸ್ಕಿಞ್, ಆಂಜೆಲೊರ್.