ಸಂಪಾದಕೀಯ್:
ಹೆ ಮನೀಸ್ ಖಂಯ್ಚ್ಯಾ ವರ್ಗಾಚೆ?
ಹಿ ಭಿರಾಂತ್ ಉಬ್ಜಂವ್ಚೊ, ಸ್ತ್ರೀಯಾಂಚೆ ಕುಡಿಚೆರ್ ಆಬ್ಳಾಯೆಚಿ ದೀಷ್ಟ್ ಲಾಂವ್ಚೊ, ತಿಕಾ ಆಪ್ಲ್ಯಾ ಹಾತಾಂತ್ಲೆಂ ಬಾವ್ಲೆಂ ಕಶೆಂ ಸಮ್ಜೊಂಚೊ ಹೊ ಮನೀಸ್ ಕಸೊ ಆಸ್ತಾಗಾಯ್? ತಾಚೆವಿಶಿಂ ಅವ್ವಲ್, ಸುಂದರ್ (ಸುಂದರ್ ಮ್ಹಣ್ಚೇಂಯ್ ಪಾಪ್ ಕೊಣ್ಣಾ) ವಿವರಣ್ ಹಾಂಗಾಸರ್ ಕವಿನ್ ದಿಲಾಂ. ಹೊ ಸಂಸ್ಕಾರ್ ಕೊಣೆ ಕೆದಳಾ ಹಾಂಕಾಂ ದಿಲ್ಲೊ?
ಮನ್ಶಾಂ ಮಧೆಂ ಅಸಲ್ಯಾ ಚಿಂತ್ಪಾಚೆ ಮನೀಸ್ ಆಸಾತ್ ಮ್ಹಣೊನ್ ಚಿಂತುಂಕ್ ಕಷ್ಟ್ ಜಾತಾ. ಹೆ ಮನೀಸ್ ಮೊನ್ಜಾತಿಂಚ್ಯಾಕಯ್ ಪಾಸ್ಟ್. ತ್ಯಾ ವರ್ಗಾಚೇಯ್ ನ್ಹಯ್.
ಮ್ಯಾಕ್ಸಿಮ್ ಲೋಬೊನ್ ಬೋವ್ ಆಪುರ್ಬಾಯೆನ್ ಹ್ಯಾ ವರ್ಗಾಚ್ಯಾ ಮನ್ಶಾಂಚೆಂ ಮೊಲ್ ಬಾಂದ್ಲಾಂ!
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಸಂಹಾರ್
ಭುಂಯ್ ಪಡ್‌ಲ್ಲೆ ಥಾವ್ನಚ್
ಹಾಂವ್ ಮುಟಿ ಅಂರ್‍ದುನ್ ಆಸಾಂ,
ದಾಂತ್ ಕಿರ್‍ಲುನ್ ಆಸಾಂ,
ತಾಚೊ ಸಂಹಾರ್ ಕರುಂಕ್
ಘುಟ್ಮಳ್ ಕರೀತ್ ಆಸಾಂ...
ಸುರ್‍ವೆರ್,
ಅಂತ್ ನಾತ್‌ಲ್ಲ್ಯಾ ದಿಸಾಂ ಆನಿ ಭಯಾನಕ್ ರಾತಿಂನಿ
ತಿಚಾ ಘಾಯೆಲ್ಲೆ ಕುಡಿಚಿ ವೀದ್‌ವಾವ್ಳಿ
ಮೊನೆ ಮೊನೆ ಆಕ್ಲಾಸ್, ಕೆನ್ನಾಂ ಗುಪಿತ್ ಸುಸ್ಕಾರ್...
ಉಪ್ರಾಂತ್,
ತಾಚೆ ಪಿಳ್ಗೆಚಿ ಧಾರುಣ್ ದಾವ್ಲಿ
ನೀಚ್ ಗಾಳ್ ತಶೆಂ ಅಡಾರಾಂನಿ ನಿಸ್ತೇಜ್ ತರೀ
ಬಾಳಾಂಕ್ ಹಾಸಂವ್ಕ್ ದುಕಾನಿಂಚ್ ಪೊಟ್ ಭರ್‍ಚೆ ಚಲಿಯೆರ್
ರಸ್ತ್ಯಾರ್, ಸರ್‍ವ್ ಕುಡ್ಡ್ಯಾಂ ಹುಜಿರ್ ಮುಟಿಯೆಂಚೊ
ಪ್ರಹಾರ್ ಖಾಂವ್ಚೆ ಅಸಹಾಯಕ್, ಅಸ್ವಸ್ಥ್ ಸ್ತ್ರೀಯೆರ್
ಗಲ್ಲೆನ್ ಜೀವ್ ಹಾತಿಂ ಘೆವ್ನ್ ಖಿಣಾಚೆ ಸುರಕ್ಷೆಕ್
ಧಾಂವ್ ಮಾರ್‍ಚೆ, ರಗ್ತಾನ್ ಬಿಜ್‌ಲ್ಲೆ ಬಾಯ್ಲೆರ್...
ಹೊಚ್ ತಾಚೊ ಸಂಸ್ಕಾರ್...
ತಾಚೊ ದಳ್ಬಾರ್ ಚೊವಿಚ್ ವೊರಾಂಯ್
ತಿಕಾ ಭಾಣ್ಶಿರೆಂ ಕರ್‍ನ್ ಭಂಗವ್ಚ್ಯಾಂತ್
ತಾಚೊ ಅಧಿಕಾರ್ ತಿಚೆ ನಾಜೂಕ್ ವಿಶ್ವೆ
ವಿಕಟ್ ಹಾಶಾಂನಿ ಖುಶೆ ಖುಶೆನ್ ಜಳೊಂವ್ಚ್ಯಾಂತ್
ಆನಿ ತಾಚ್ಯಾ ಗರ್‍ವಾಚೆಂ ಅತಿರೇಕ್
ಕೆಂಕಾರುನ್ ಬೊತ್ಲಿ ಖಂವ್ಚಿಂನಿ ತಿಚೊ ಮಾನ್ ಕೊಚಾಂವ್ಚ್ಯಾಂತ್ ..
ತಾಕಾ ಘೊವ್ ಮ್ಹಣ್ ನಾ, ಭಾವ್ ಮ್ಹಣ್ ನಾ
ಬಾಪಯ್ ಮ್ಹಣ್ ನಾ, ಪೂತ್ ಮ್ಹಣ್ ನಾ
ದೊತೊರ್ ಮ್ಹಣ್ ನಾ, ಅತ್ಮ್ಯಾ ದಿರೆಕ್ತೊರ್ ಮ್ಹಣೊನ್‌ಯ್ ನಾ!
ಕೆನ್ನಾ ಹೊ ಸೈತಾನ್, ಗತಿಪಾಸ್ಟ್ ಪಿಂವ್ಡೊ,
ಶಿಕಪ್ ಆನಿ ಅಕ್ಕಲ್ ನಾತಲ್ಲೊ ರಾನ್ವಟಿ
ಆನಿ ಕೆನ್ನಾಂ ಸಮಾಜೆಂತ್ ಮಾನಾಯ್
ಶಿಕ್ಪಾಂತ್ ದೊತೊರ್, ಬೋರ್ಡ್ ದಿರೆಕ್ತೊರ್
ರುಪಾಂ ವೆಗ್ಳಿಂ ವೆಗ್ಳಿಂ, ತಾನ್, ತಾಳ್ನಿ ತಿಚ್
ಕೆನ್ನಾ ಪಬ್ಬ್ ಎಟ್ಯಾಕಾಂತ್ಲೊ ಗೂಂಡಾ
ಅಸ್ಸಾಮ್ ಚೆಡ್ವಾಚೊ ಗೋಳ್ ಕೆಲ್ಲೊ ಹಲ್ಕಟ್
ಹೊಂ ಸ್ಟೇ ಎಟ್ಯಾಕಾಂತ್ಲೊ ತೊ ಥರ್‍ಡ್ ಕ್ಲಾಸ್ ಜಾನ್ವಾರ್...
ತ್ಯಾ ದಿಸಾಂನಿ,
ತಿಚಿ ಬೊಬ್ ಸೊಡ್,
ಪಾಪ್! ತಿಕಾ ಸುಶೆಗ್ ದೀ, ಸುಟ್ಕಾ ದೀ
ಮ್ಹಣ್ ಹಾಕ್‌ಬೊಬ್ ಮಾರ್‌ಲ್ಲಿ ಕೊಣಾಕೀ ಆಯ್ಕಾಲ್ಲೆಂಚ್ ನಾ
ಆಜ್,
ಘರಾಂತ್ ಆನಿ ಗಾಂವಾಂತ್
ಶಿಕ್ಷಣ್ ಆನಿ ರಕ್ಷಣ್ ದೀಜೆ ಜಾಲ್ಲೆ ಸಾಂಕ್ತುವರಿಂತ್
ತಿಚೆ ಸಂತತೆಕ್ ಲುಟ್ತಾನಾ, ಜಳಯ್ತಾನಾ, ಭಂಗಯ್ತಾನಾ
ಹಾಂವ್ ಭೆರ್‍ಯಾಕ್ ಪರತ್ ತಾಳೊ ಉಬಾರುಂಗೀ?
ಯಾ ಅಸಹಾಯಕ್, ಅಸ್ವಸ್ಥಪಣಿಂ ಹಾಂವೀ ಕೆಪ್ಪೊ ಜಾಂವ್‌ಗೀ?
ಕೊಣೇಂಯ್ ತರೀ ಹಾಚೊ ಸಂಹಾರ್ ಕರಿಜಾಯಿಚ್ ...
-ಮ್ಯಾಕ್ಸಿಮ್ ಲೋಬೊ