ಸಂಪಾದಕೀಯ್:
ಹೊ ಮೋಗ್ ಕೊಣಾಚೊ? ಕಾಂಯ್ ಕವಿತೆಚೊ ಯಾ ಪ್ರೇಮಿಚೊ?
ಮನಾಂತ್ಲಿಂ ಧಾಂವ್ತಿಂ ಮೊಗಾಚಿಂ ಚಿಂತ್ನಾಂ ಕಾಗ್ದಾಚೆರ್ ವೊತ್‌ಲ್ಲ್ಯಾವೆಳಾರ್ ಕಶೆಂ ಏಕ್ ಅಚರ್‍ಯೆಂ ಘಡೊಂಕ್ ಸಾಧ್ಯ್ ಆಸಾ ಮ್ಹಳ್ಳ್ಯಾಕ್ ಸಕಯ್ಲಿ ಕವಿತಾ ಗೊವಾಯ್ ದಿತಾ. ಮೊಗಾಕ್ ಅಸಲೆಂಚ್ ಏಕ್ ವಿವರಣ್ ದೀಂವ್ಕ್ ಆಜೂನ್ ಕೊಣ್‌ಯ್ ಸಕೊಂಕ್ ನಾ. (ಹೆಂ ಫಟ್ ಕರುಂಕ್ ಪೆಚಾಡ್ಚಿ ಎರಿಕ್ ಫ್ರೊಮ್ಮಾಚಿ ಥಿಯರಿ ಕಿತ್ತುನ್ ಪಾವ್ಲ್ಯಾ ಮ್ಹಾಕಾ ಖಬರ್ ನಾ). ತ್ಯಾದೆಕುನ್ ಕೊಣಾಕ್ ಸಕಾಳಿಂಚ್ಯಾ ಧೊವಾಂತ್ ಪಾಕಟೆ ಖೊವವ್ನ್ ಹೊ ಮೋಗ್ ಉಡ್ಕಾಣಾಂ ಘಾಲ್ಚೊ ಝಳ್ಕತಾ. ಕೊಣಾಕ್ ಕಾಳೊಕಾಚ್ಯಾ ಕೊನ್ಶಾಂತ್ ಗುಟ್ಲಿ ಜಾವ್ನ್ ಅಂತರ್‌ಮಳಾಂ ವೊಳಾವ್ನ್ ಕಸ್ಕಸ್ಯಾಂ ರಡ್‌ಲ್ಲೊ ದಿಸ್ತಾ. ಕೊಣಾಚೊ ಹಾಸ್ತಾ. ಕೊಣಾಚೊ ಹುಸ್ಕಾರ್‍ತಾ ಆನಿ ಕೊಣಾಚೊ ಸಪ್ಣಾಂನಿ ಸರಾಗ್ ಕೆಳಿಂ ಖಾತಾ!
ಮಾಗೀರ್ ಹೊ ಮೋಗ್ ಕಸಲೋಯ್ ಜಾಂವ್! ಹೆ ಕವಿತೆಚಿ ಕವಯಿತ್ರಿ ಆಶಾ ರೊಡ್ರಿಗಸ್, ನವಿಚ್ ಏಕ್ ಆಶಾ ಘೆವ್ನ್ ಹಾಂಗಾಸರ್ ಆಯ್ಲ್ಯಾ. ಕವಿತೆಚೆಂ ಖಳ್ ಸದಾಂಕಾಳ್ ಕೊಸ್ಚಿ ಆಶಾ ಹಿ! ಹೆ ಆಶೆಚಿಂ ಪಿಸೊಳಿಂ ತಿಚ್ಯಾ ಕಾಳ್ಜಾ ಮನಾಂತ್ ಸದಾಂನೀತ್ ಪಾಕಟೆ ಉಸವ್ನ್ ಉಬೊಂದಿತ್ ಆನಿ ಕೊಂಕಣಿಚೆಂ ಕವಿತಾ ಶೆತ್ ಸೊಭಿತ್ ಕರುಂದಿತ್ ಮ್ಹಳ್ಳಿ ಆಮ್ಚಿ ಆಶಾ!
ಸಭಾರ್ ಚಲಿಯಾಂನಿ-ಸ್ತ್ರೀಯಾಂನಿ ಪಯ್ಲೆಚ್ ಪಾವ್ಟಿಂ ಕವಿತಾ ಬರಂವ್ಚೆಂ ಧೈರ್ ಘೆವ್ನ್ ಆಮ್ಕಾಂ ಆನಿ ಕೊಂಕಣಿಕ್ ದಾಧೊಸ್ ಕೆಲಾಂ. ತುಂವೇಂಯ್ ಕಿತ್ಯಾಕ್ ಅಸಲೆಂ ಧೈರ್ ಘೆಂವ್ಕ್ ನಜೊ?
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಕೆನ್ನಾಂ ಮ್ಹಾಕಾ ಕರ್‍ತಾಯ್ ತುಜೆಂ?
ಆಖ್ಖ್ಯಾ ದಿಸಾಚ್ಯಾ ಕಾಮಾಂತ್
ಕೂಡ್ ಮ್ಹಜಿ ಥಕ್ತಾನಾ
ದಫ್ತರಾಂತ್ಲೆ ಕರಂದಾಯೆಂತ್
ಮತ್ ಮ್ಹಜಿ ಚುಕ್ತಾನಾ
ವಿಶ್ರಾಂತ್ ಹಾಂವ್ ಆಶೆತಾಂ
ವಿರಾಮ್ ಘೆಂವ್ಕ್ ಆಯ್ತಿಂ ಜಾತಾಂ
ಆಮ್ಸರಾನ್ ನ್ಹಾಣ್ ಸಂಪವ್ನ್
ಮಾಂದ್ರೆರ್ ಪಾಟ್ ತೆಂಕ್ತಾನಾ
ದೊಳೆ ಲೆಗುನ್ ಧಾಂಪನಾಂತ್
ನಿದೆಕ್ ವೆಂಗೊನ್ ಧರಿನಾಂತ್
ತಿತ್ಲ್ಯಾರ್ ಮುಕಾರ್ ದಿಸ್ತಾಯ್ ತುಂ
ನೀದ್ ಮ್ಹಜಿ ಲುಟ್ತಾಯ್ ತುಂ
ಸಕಾಳಿಂಚ್ಯಾ ಧೊವಾಂತ್ ದಿಸ್ತಾಯ್
ದೊನ್ಪಾರಾಂಚೆ ದಾವೆಂತ್ ಹಾಸ್ತಾಯ್
ಸಾಂಜೆಚ್ಯಾ ವಾರ್‍ಯಾಂತ್ ಭೊಂವ್ತಾಯ್
ಮ್ಹಜೆಂ ಕಾಳೀಜ್ ಕಾಂತುನ್ ಖಾತಾಯ್!
ಹರ್ ಉದೆವಾಚ್ಯಾ ಸುರ್ಯಾಂತ್
ದೊನ್ಪಾರಾಂ ಮ್ಹಜೆಚ್ ಸಾವ್ಳೆಂತ್
ರಾತ್ಚೆಂ ತಾರಾಂಚೆ ಮೊವ್ಳೆಂತ್
ರಾವ್ತಾಯ್ ಸದಾಂಚ್ ಮ್ಹಜೆ ಬಗ್ಲೆಂತ್
ದೊಳ್ಯಾಂ ಮುಕಾರ್ ಮೇಳ್ ತುಜೊ
ಆಪಾಲಿಪಾ ಖೆಳ್ ಕಸೊ
ಹಾತಾಕ್ ಮೆಳೊನ್ ಗಳೊನ್ ವೆಚ್ಯಾ
ದರ್ಯಾ ಉದ್ಕಾ ಪೊಸೊ ಕಸೊ
ನೆಣಾ ಹಾಂವ್ ಕರುಂ ಕಿತೆಂ?
ಜಿವಿತ್ ಮ್ಹಜೆಂ ರಿತೆಂ ರಿತೆಂ
ಸಾಂಗಾತ್ ತುಜೊ ಜಾಯ್ ಮ್ಹಾಕಾ
ತುಂಚ್ ಮ್ಹಜೆಂ ಜಿಣ್ಯೆ ಸಾತೆಂ
-ಆಶಾ ಆರ್. ರೊಡ್ರಿಗಸ್, ಆಗ್ರಾರ್