ಸಂಪಾದಕೀಯ್:
ಇಮಾಮ್ ಸಾಬಿಚಿ ಆಂಗಡ್ ಸೈತ್ ಧಾಂಪುನ್ ವೆತಾ ಆಯ್ಚ್ಯಾ ದಿಸಾ
ತೆ ದೀಸ್ ಗೆಲೆ, ದ್ರೌಪದಿಕ್ ರಾಕಲ್ಲೆ. ಆಯ್ಚ್ಯಾ ಕಾಳಾರ್ ಖಂಯ್ಚ್ಯಾ ಕೊನ್ಶಾಂತ್ಲ್ಯಾ ದೆವಾಂಕಯ್, ತಾಂಚ್ಯಾ ಸಾಂಗಾತಾ ಅರ್ಜುನಾ ತಸಲೆ ಅವ್ವಲ್ ಝುಜಾರಿ ಆಸ್ಲ್ಯಾರಿ, ಖಂಯ್ಚ್ಯಾಯ್ ದ್ರೌಪದಿಂಚೊ ಮಾನ್ ಲಿಲಾಂವ್ ಘಾಲ್ತಾನಾ, ರಾಕೊನ್ ವ್ಹರೊಂಕ್ ಜಾಂವ್ಚೆಂ ನಾ. ಯೇ ದೆವಾ, ಕಸಲಿ ಏಕ್ ಪರಿಗತ್ ಆಮ್ಚಿ ಮಂಗ್ಳುರ್‍ಚಿ! ಚಿಂತ್ಚೆ ತಸಲೆಂ ಮೊವಾಳ್ ಕಾಳೀಜ್ ಸೈತ್ ಫಾತರ್ ಜಾವ್ನ್ ಗೆಲಾಂಮೂ!
ಆಜ್ ಮಂಗ್ಳುರಾಂತ್ ಅಸಲೆಂ ಏಕ್ ಘಟನ್ ಜಾತಾನಾ, ಥರ್ಥರೆ ಉಟ್ತಾತ್. ಹೊಟ್ಲಾಂಕ್ ದಂಧೊ ಉಣೊ ಜಾತಾ. ಮಾಗೀರ್ ಇಮಾಮ್ ಸಾಬಿನ್ ಮಾಸಾಚಿ ಆಂಗಡ್ ಧಾಂಪಲ್ಲ್ಯಾಂತ್ ಖಂಯ್ಚೆಂ ನವಲ್?
ಎಕೆ ಕುಶಿನ್ ವಾರೆಂ-ವಾದಾಳ್, ಆನ್ಯೇಕೆ ಕುಶಿನ್ ಹೊ ಲಾಂಪ್ಯಾಂವ್. ಕೆನ್ನಾಂ ಹೆಂ ಸಗ್ಳೆಂ ಸಂಪ್ತಲೆಂ ಕೊಣಚ್ ನೆಣಾಂತ್. ಹ್ಯಾ ವಾರ್‍ಯಾ ವಾದಾಳಾಕ್ ಥಂಡ್ ಕರ್‍ಚಿ ಸಕತ್ ಖಂಯ್ಚ್ಯಾ ಕೃಷ್ಣಾಕ್ ಆಸಾ! ಜೊ.ಸಿ. ಚಿ ಕವಿತಾ ಪರ್ತ್ಯಾನ್ ಪರ್ತ್ಯಾನ್ ವಾಚಿಶೆಂ ಕರಯ್ತಾನಾ, ಶೆಂಭರಾಂನಿ ಸಂಗ್ತಿ ದಿಷ್ತಿ ಮುಕಾರ್ ಯೇವ್ನ್ ರಾವ್ತಾತ್ ಆನಿ ಕಾಳೀಜ್ ಝಿಮ್ ಜಾತಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ದ್ರೌಪದಿಂಚೆ ವಿಳಾಪ್
ಹೇ ಕಿಸ್ಣಾ
ತುಜಿ ಮುರಲಿ ಫುಂಕಿತ್
ಖಂಯ್ ಭಂಗ್ಲಾಯ್?
ಹ್ಯಾ ದುಶ್ಟಾಂ ಸಾಂಗಾತಾ ತುಂವೀ ಮೆಳ್ಳಾಯ್
ಶಿಮ್ಟಿ ನಾತ್ಲ್ಯಾಕೊಲ್ಯಾಪರಿಂ ಪೊಳ್ಳಾಯ್?
ಪಾಂಡವ್ ಹಾಂಗಾ ಥೊಡೆ ಭೊಂವ್ತಣಿ
ಲಾಟಿ ಹಾತಿಂ ಆಸಾ, ಉಬಾರುಂಕ್ ಪರ್ವಣ್ಗಿ ನಾ
ಕೆಮರಾ ಚಾರ್‌ಯಿ ಕುಶಿಂನಿ
ಉಜ್ವಾಡ‌ಚ್‌ ಉಜ್ವಾಡ್, ಧಾಂಪುಂಕ್‌ ಜಾಯ್‌ಚ್ ನಾ
ದುಶ್ಟ್ ಹೆ ಪಳೆನೇ ಕಿಶ್ಣಾ
ಹಾಂಚೆ ಗರ್ಜೊಣೆ ಮಧೆಂ ಮುರಲಿ ಕಾಂಯ್‌ ಉಪ್ಕಾರ್‍ನಾ
ಕಾಲ್ದೊ ಕಿಲೊ ಥಾನಾಂ, ತಂದೂರಿ ಜಾಂಗ್ಳಾಂ
ಹಾಂಚ್ಯಾ ಹಾತಾಂನಿ ಪೂಡ್ ಜಾಲಿಂ
ವಾಂಟೆ ಘಾಲ್ಚಿ ಹಾಂಚಿ ಚಲಾಕಿ ಚೊವುನ್
ಮಾಸಾಚ್ಯಾ ಇಮಾಮ್ ಸಾಬಿನ್ ಆಂಗಡ್ ಧಾಂಪ್ಲಿ
ದುಶ್ಟ್ ಹೆ ಪಳೆನೇ ಕಿಶ್ಣಾ
ತುಜೆ ಶಿವಾಯ್ ಆಮ್ಕಾಂ ಹೆರ್‌ ಕೋಣ್ ನಾ
ವಾರ್‍ಯಾ ಹೊರ್ಬೊಸಾಕ್ ವೊಳ್ವಳ್ಚಿ ವಾತ್ ಆಮ್ಗೆಲಿ ಜಿಣಿ
ಜಾಲಿಮುರೆ ಕಾಣಿ ಖಬ್ರೆ ಪತ್ರಾರ್
ಅಬಲ್ ಜಾವ್ನ್ ರಚುಂನಾಕಾರೆ ಕೆನ್ನಾಂಯ್
ಖುಶಿ ತರ್‌ ತಾಂಚ್ಯಾ ಗೊಟ್ಯಾಂತ್ಲಿಂ ಗೊರ್ವಾಂ ಕರ್
ಕಶ್ಟ್‌ನೇ ತುಕಾಯ್ ಕಿಶ್ಣಾ
ತುಕಾಚ್‌ ತುಜೆಂ ಧಯ್ರ್ ನಾ, ಆಸ್ಲ್ಯಾರಿ ಕಿತೆಂ ಅರ್ಜುನಾ?
-ಜೊ. ಸಿ. ಸಿದ್ದಕಟ್ಟೆ