ಸಂಪಾದಕೀಯ್:
ಹೋಮ್ ಸ್ಟೇ ಪ್ರಕರಣ್ ಆನಿ ಆವಯ್ಚ್ಯಾ ಕುಸ್ವಾಂತ್ಲೆ ಚಲಿಯೆಚೆಂ ಚಿಂತಪ್
ಎಕೆ ಚಲಿಯೆಕ್ ಭ್ಯೆಂ ಮ್ಹಳ್ಳೆಂ ತೆಂ ಜಲ್ಮಾ ಥಾವ್ನಚ್ ಯೆತಾ? ಜಲ್ಮ್ ತಿಚೊ ಥರ್ಥರ್‍ಯಾನಿಂಚ್ ಜಾತಾ? ಹಾಂಗಾಸರ್ ಆವಯ್ಚ್ಯಾ ಕುಸ್ವ್ಯಾಂತ್ಲೊ ಚಲಿಯೆ-ಗಾಬೊ ಉಲಯ್ತಾ. ತೆಂ ಉಲೊವ್ಣೆಂ ಆಯ್ಕತಾನಾ ಧಾರುಣ್ ಕಾಳೀಜ್ ಲೆಗುನ್ ಪಿಗ್ಳತಾ. ಚಲಿಯೆನ್ ವಿಘ್ನಾಂ-ಅನ್ವಾರಾಂ ಆವಯ್ಚ್ಯಾ ಪೊಟಾಂತ್ ಆಸ್ತಾನಾಂಚ್ ಪಳೆಂವ್ಚಿ ಏಕ್ ಗತ್ ಆಯ್ಚ್ಯಾ ಸಂಸಾರಾನ್ ರಚ್ಲ್ಯಾ.
ಅನಿಲ್ ಬೈಂದೂರಾನ್ ಚಲಿಯೆಚ್ಯಾ ಹ್ಯಾ ದುಖಾಂವಿಶಿಂ ಸುಕ್ಷ್ಮೀಮಾಯೆನ್ ಹೆ ಕವಿತೆದ್ವಾರಿಂ ನದರ್ ಚರಯ್ಲ್ಯಾ.
ಹೆ ಕವಿತೆ ಮಾರಿಫಾತ್ ಆಪ್ಣಾಚಿ ಕಾವ್ಯ-ತಾಂಕ್ ಜೊಕ್ತೆ ರಿತಿನ್ ಅನಿಲಾನ್ ಜಾಹೀರ್ ಕೆಲ್ಯಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮಾಂಯ್ ಮ್ಹಾಕಾ ನಿಸ್ರಯ್
ಆವಯ್ಚ್ಯಾ ಗರ್ಭಾಥಾವ್ನ್ ಸಂಸಾರ್ ತಿಳ್ಚೆಂ ಬಾಳ್
ಮ್ಹಣಾಲೆಂ ಮಾಂಯ್ ಹೊ ದಾದ್ಲ್ಯಾ ಕಾಳ್
ದಾರಾಂ ಭೆತುನ್ ತೆ ದಗ್ದಿತಾತ್
ಮಾನ್ ಆನಿ ಅಂತಸ್ಕರ್ನ್ ಮುಡ್ಡಿತಾತ್
ವಿಕಾಳ್ ನಂಜೆ-ನಾಗ್ ಮಾನ್ ನಾಗಯ್ತಾತ್
ಹ್ಯಾ ಖರ್ಗಾಂತುಲ್ಯಾನ್ ವಿಸ್ರಯ್ ಮ್ಹಾಕಾ
ತುಜ್ಯಾ ಗರ್ಭಾಂತುಲ್ಯಾನ್ ನಿಸ್ರಯ್ ಮ್ಹಾಕಾ
ಮಾಂಯ್ ತ್ಯಾ ಉಗ್ತ್ಯಾ ರಸ್ತ್ಯಾಂನಿ
ಹಾಂವ್ ಎಕೊಡೆಂ ಚಲೊಂಕ್ ಸಕ್ಚಿಂನಾ
ಹಾಂಗಾ ಹಜಾರ್ ನರ್
ಮ್ಹಜೆ ಆಂಗ್ ಆಪ್ಡೊನ್
ಸಂಸ್ಕ್ರತಿ ಮ್ಹಣೊನ್ ಮಜಾ ಲುಟ್ತಿತ್
ವಿಕ್ರಿತ್ ಕರ್ನ್ ಇಜಾ ದಿತಿತ್
ಹ್ಯಾ ಖರ್ಗಾಂತುಲ್ಯಾನ್ ವಿಸ್ರಯ್ ಮ್ಹಾಕಾ
ತುಜ್ಯಾ ಗರ್ಭಾಂತುಲ್ಯಾನ್ ನಿಸ್ರಯ್ ಮ್ಹಾಕಾ
ಮಾಂಯ್ ಸ್ತ್ರೀ ಜಾತ್ ಮ್ಹಣೊನ್ ಬಾಬ್ ನೆಗಾರ್ ಕರಿತ್
ಮ್ಹಾಕಾ ದೊಳೆ ಉಗಡ್ಚ್ಯಾ ಫುಡೆಂ ನಿಸ್ರಾಂವ್ಕ್ ಸಾಂಗಿತ್
ನಾಂ ತರ್ ತುಜ್ಯಾ ಪೊಸ್ಕುಟ್ಯಾರ್ ಖೊಂಟಯ್ತ್
ತಾಚ್ಯಾ ಪಾಂಯಾಚೊ ಖೊಂಟ್
ತುಜ್ಯಾ ಪೊಟಾರ್ ತೆಂಕ್ಚ್ಯಾ ಫುಡೆಂ
ತ್ಯಾ ಖರ್ಗಾಂತುಲ್ಯಾನ್ ವಿಸ್ರಯ್ ಮ್ಹಾಕಾ
ತುಜ್ಯಾ ಗರ್ಭಾಂತುಲ್ಯಾನ್ ನಿಸ್ರಯ್ ಮ್ಹಾಕಾ
ಮಾಂಯ್ ತುಜ್ಯಾ ಖುಸ್ತಾರ್ ಥೊಡೆ ದೀಸ್ ಸಾರ್ತಿತ್
ಕಾಜ್ರಾ ಪಿರಾಯ್ ಜಾಲ್ಯಾ ಮ್ಹಣೊನ್ ತಿ ಉಕಲ್ನ್ ವ್ಹರ್ತಿತ್
ದೊತಿ ಖಾತಿರ್ ಉಜೊ ದಿವುನ್ ಜಿವೆಚ್ ಹುಲ್ಪಾಯ್ತಿತ್
ಅತ್ಮ್ಯಾಕ್ ವಾರ್‍ಯಾರ್ ಉಬೊನ್ ಜೀವ್ ಪುರ್ತಿತ್
ಮಾಂಯ್ ಅಬಲ್ ಹಾಂವ್ ಹೆಂ ಸರ್ವ್ ಸೊಸ್ಚಿಂ ನಾ
ಹ್ಯಾ ಖರ್ಗಾಂತುಲ್ಯಾನ್ ವಿಸ್ರಯ್ ಮ್ಹಾಕಾ
ತುಜ್ಯಾ ಗರ್ಭಾಂತುಲ್ಯಾನ್ ನಿಸ್ರಯ್ ಮ್ಹಾಕಾ
ಬಂಧ್ ಕುಡಾಂತ್ ಮಂದ್ ಜಳ್ತಲಿಂ ಹಾಂವ್
ಜನೆಲಾ ವಿಣೆಂ ತಡ್ಪಡ್ಚ್ಯಾ ಉಜ್ವಾಡಾಚಿ ದೆದೆಸ್ಪರಿತ್ ಧಾಂವ್
ಸ್ವತಂತ್ರಾಚೆಂ ವಾರೆಂ ನಾಸ್ತಾಂ ಘಡ್ಯೆನ್
ಪಾಲ್ವೊನ್ ವಚನ್ ಹಾಂವ್
ಮಾಂಯ್ ಹಿ ಧರ್ತಿ ಮ್ಹಾಕಾ ಜಿಯೆಂವ್ಕ್ ಸೊಡ್ಚಿನಾ
ದೆಕುನ್ ಹ್ಯಾ ಖರ್ಗಾಂತುಲ್ಯಾನ್ ವಿಸ್ರಯ್ ಮ್ಹಾಕಾ
ತುಜ್ಯಾ ಗರ್ಭಾಂತುಲ್ಯಾನ್ ನಿಸ್ರಯ್ ಮ್ಹಾಕಾ
-ಅನಿಲ್ ಬೈಂದೂರ್, ಸ್ಪೇಯ್ನ್