ಸಂಪಾದಕೀಯ್:
ಕಂಪ್ಯೂಟರ್ ಯುಗಾಂತ್ಲೆ ಕವಿತೆಚೊ ಚಮತ್ಕಾರ್!
ಸಾದಿ, ಸೊಂಪಿ ಕವಿತಾ ತರೀ ಠರಾವಣೆಕ್ ಲಾಗೊನ್ ಕಾಳ್ಜಾಂ ಮನಾಂ ಜಿಕಯ್ತಾ ಆನಿ ಭಿತರ್‍ಲ್ಯಾ ಭಿತರ್ ಹಾಸಯ್ತಾ. ಕೊಣಾಕ್ ಭೊಗುಂಕ್ ಪುರೊ ಎಕೆ ವೆವಸ್ಥೆಚಿಂ ನಕ್ಲಾಂಯ್ ಹಿ ಕವಿತಾ ಕರ್‍ತಾ ಮ್ಹಣೊನ್! ಮನ್ಶಾ ಜಿವಿತಾಚೆ ಸಂಕೀರ್ಣತೆಕ್ ಲಾಗೊನ್ ಹೆ ಕವಿತೆಂತ್ ಅತ್ಮೊ ಜೊಡ್‌ಲ್ಲೊ ವಿಶಯ್, ಫಾಲ್ಯಾಂ ಆಮ್ಚೆ ಮದೆಂ ಜೀವ್ ಜೊಡುಂಕ್‌ಯ್ ಪುರೊ. ತೆ ದೀಸ್ ಪಯ್ಸ್ ನಾಂತ್.
ಆಮಿ ಕವಿಂನಿ ರೆಮ್ಸಿನ್ ವಿಂಚ್‌ಲ್ಲ್ಯಾ ವಿಶಯಾಬರಿ ವೆವೆಗ್ಳ್ಯಾ ವಿಶಯಾಂಚೆರ್ ಕವಿತಾ ಬರಯ್ಜೆ. ತಾಂತುಂ ವಿಜ್ಞಾನಾಕ್ ಲಗ್ತಿ ಜಾಲ್ಲೆ ವಿಶಯ್, ಭುಮಿ ಭಾಯ್ಲ್ಯೊ ಸಂಗ್ತಿ, ಫುಡಾರಾಂತ್ ಘಡ್ಯೆತ್ ಜಾಲ್ಲ್ಯೊ ಸಂಗ್ತಿ -ಅಶೆಂ ಅಪ್ರೂಪಾಚ್ಯಾ ಸಂಗ್ತಿಂಕ್ ಕವಿಂನಿ ಆರಾಯ್ಜೆ. ತಶೆಂ ಕರಿನಾಂವ್ ಜಾಲ್ಯಾರ್ ಆಮಿ ವಾಚ್ಪ್ಯಾಂಕ್ ತೆಂಚ್ ಶೆಳೆಂ ಶಿತ್ ಸದಾಂ ಖಾಂವ್ಕ್ ದಿಲ್ಲೆಬರಿ ಜಾಯ್ತ್! ತೆ ದಿಶ್ಟಿನ್ ರೆಮ್ಸಿಚ್ಯಾ ಪ್ರೇತನಾಕ್ ಹಾಂವ್ ಶಾಭಾಸ್ಕಿ ದಿತಾಂ.
ಫುಡಾರಾಂತ್‌ಯ್ ಕವಿತಾ ಕುಳಾರಾಂತ್ ತಾಚ್ಯೊ ಕವಿತಾ ವ್ಹಾಳ್ತಲ್ಯೊ ಅಶೆಂ ಆಮ್ಚೊ ಭರ್ವಸೊ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಇಂಟರ್‌ನೆಟ್ ಕುಮ್ಸಾರ್ (ಇ-ಕುಮ್ಸಾರ್)
ಟ್ರಿಂ, ಟ್ರಿಂ ಪೊನ್ ವಾಜ್ತಾ
ವಿಗಾರ್ ಪಾದ್ರ್ಯಾಬ್ ಫೋನ್ ಕಾಡ್ತಾ
ದೇವ್ ಬರೊ ಸಕಾಳ್ ದೀಂವ್
ರುಜಾರಾಬ್ ವಯ್ಲ್ಯಾನ್ 'ಹಲೋ' ಮ್ಹಣ್ತಾ
'ತುಕಾಯ್ ಬರೊ ದೀಸ್ ದೀಂವ್'
ವಿಗಾರ್ ಆಮ್ಸೊರಾನ್ ಜಾಪ್ ದಿತಾಂ-
'ಕುಮ್ಸಾರಾಕ್ ಎಪೋಂಯ್ಟ್‌ಮೆಂಟ್ ಜಾಯ್'
ರುಜಾರಾಬ್ ವಿನಂತಿ ಕರ್‍ತಾ.
'ಪಾತ್ಕಾಂ ಕಿತ್ಲಿಂ ರಾಸ್ ಪಡ್ಲ್ಯಾಂತ್?'
ವಿಗಾರಾಚ್ಯಾ ಸವಾಲಾಕ್ ರುಜಾರ್ ಮ್ಹಣ್ತಾ:
'ಕಾಂಯ್ ಎಕಾ ವರ್‍ಸಾಚಿಂ ಆಸ್ತಿತ್
ಪ್ರಯತನ್ ಕೆಲ್ಯಾರಿ ಲೇಖ್ ಚುಕ್ತಾ'
'ಉಣಿಂ ಪಾತ್ಕಾಂ ಆಸಾತ್ ತರ್
ಕಾಜಿತೊರಾಕ್ ಅಯ್ಕೊನ್ ಭೊಗ್ಸುಂಕ್ ಸಾಂಗ್ತಾಂ
ವೊಜೆಂ ಬೋರೆಂ ಆಸಾ ತರ್, ತುಕಾ
ಕುಮ್ಸಾರಾಕ್ ದುಸ್ರೆಂ ಓಪ್ಶನ್ ದಿತಾಂ'
'ದುಸ್ರೆಂ ಓಪ್ಶನ್?'
-ಆತುರಾಯೆನ್ ಭರೊನ್ ರುಜಾರಾಬ್ ವಿಚಾರಿ
ದೆವಾಲಾಗಿಂ ಮಾಗೊನ್
ಪಾದ್ರಿಬಾಬಾನ್ ಸಾಂಗ್ಲೆಂ ಮಾರುಂಕ್ ಚುಕಾರಿ
'ನಾತ್ವಾ ಕಡೆನ್ ಸಾಂಗೊನ್
ಪಾತ್ಕಾಂ ಬರಯ್ ತುಜಿಂ ಕಂಪ್ಯೂಟರ್ ಸೀ.ಡಿ.-ರಿ
ಧಾಡ್ನ್ ಸೊಡ್ ಇ-ಮೇಲಾರ್
ಮ್ಹಜ್ಯಾ ವಿಗಾರ್ ಭೊಗ್ಸಾಣೆ.ಕೊಮ್ ವಿಳಾಸಾರಿ'
ಕಂಪ್ಯೂಟರಾಚೊ ಕಾಳ್ ಜಾಲ್ಲ್ಯಾನ್
ಎಕ್ಲ್ಯಾನ್ ಕಂಪ್ಯೂಟರ್ ದಾನ್ ದಿಲಾಂ
ವೆಳಾಚೋಯ್ ಆಭಾವ್ ಜಾಲ್ಲ್ಯಾನ್
ಇಗರ್ಜೆಕ್ ಇಂಟರ್‌ನೆಟಾಚಿಯ್ ಸವ್ಲತಾಯ್ ಘೆತ್ಲ್ಯಾ
ಪಾತ್ಕಾಂ ಸಾಂಗೊಂಕ್ ಲಜೆತೆಲ್ಯಾಂಕ್
ಇಂಟರ್‌ನೆಟ್ ಕುಮ್ಸಾರಾಚೊ ಉಪಾಯ್ ಕೆಲಾ
ಇಂಟರ್‌ನೆಟ್ ಭೊಗ್ಸಾಣ್ಯಾಕ್ ರಾಕೊನ್ ರಾವೊನ್
ರುಜಾರಾಬ್ ಮಾತ್ರ್ ಸಾಸ್ಣಾಕ್ ಮೆಲಾ!
-ರೆಮ್ಸಿ ಫೆರ್ನಾಂಡಿಸ್