ಸಂಪಾದಕೀಯ್:
ಪ್ರಕೃತಿ ಆನಿ ಚಂದ್ರೆಮಾಚೊ ಮೋಗ್
ಪ್ರಕೃತಿಚ್ಯಾ ಸೈಂಭಾಚೆಂ ಏಕ್ ವರ್ಣನ್ ಚಂದ್ರೆಮಾಚ್ಯಾ ಚಾನ್ನ್ಯಾನ್ ಮಾಪುಂಕ್ ವಚೊನ್ ವೆಗ್ಳೊಚ್ ಏಕ್ ಸಂಸಾರ್ ನಿರ್ಮಾಣ್ ಕೆಲಾ ಕವಯಿತ್ರಿ ಕ್ಯಾಥರಿನ್ ರೊಡ್ರಿಗಸ್ ಹಿಣೆಂ. ಪ್ರಕೃತಿಚ್ಯಾ ಸುಕ್ಷೀಮ್ ಸಂಗ್ತಿಂಲಾಗಿಂ ಮಾಯೆಮೊಗಾನ್ ಉಲಂವ್ಚಿ ಸಕತ್ ಕೊಣಾಕ್ ಆಸಾ, ತಸಲ್ಯಾಂಕ್ ಅಸಲ್ಯೊ ಕವಿತಾ ಸಲಿಸಾಯೆನ್ ವಿಣುಂಕ್ ಸಾಧ್ಯ್ ಆಸಾ. ಅಸಲಿ ಏಕ್ ಸಕತ್ ಕವಯಿತ್ರಿಚೆಂ ಜಿಣೆಂ ಪಾರ್ಕಿಲ್ಲ್ಯಾಂಕ್ ಖಿಣಾನ್ ಸಮ್ಜತಲಿ ಮ್ಹಣ್ಚ್ಯಾಂತ್ ದುಭಾವ್ ನಾ.
ಕ್ಯಾಥರಿನ್ ರೊಡ್ರಿಗಸ್ ಕೊಂಕಣಿ ಮಾತ್ರ್ ನ್ಹಯ್ ಕಾನಡಿ ತಶೆಂ ತುಳು ಸಾಹಿತ್ಯಾಂತ್ ಫಾಮಾದ್ ನಾಂವ್. ತುಳು ಸಾಹಿತ್ಯಾಕ್ ತಿಚಿ ದೇಣ್ಗಿ ವ್ಹರ್‍ತಿ ಆನಿ ತ್ಯಾತೆಕಿದ್ ತುಳು ಸಾಹಿತ್ಯಾಂತ್ ತಿಚೆಂ ನಾಂವ್ ಥೋರ್ ಜಾಲಾಂ! ಕೊಂಕಣಿಂತ್‌ಯ್ ಥೊಡ್ಯಾ ಸಂದರ್ಭಾಂನಿ ವಿಶೇಸ್ ಮಹತ್ವಾಚಿಂ ಕಾಮಾಂ ತಿಚೆಥಾವ್ನ್ ಕೊಂಕಣಿಕ್ ಲಾಭ್ಲ್ಯಾಂತ್.
ಕವಿತಾ, ತಿ ಚಡಿತ್ ಬರಯ್ನಾ ತರೀ 'ಕವಿತಾ ಕುಳಾರಾ'ಚ್ಯಾ ಮೊಗಾನ್ ಜಿ ಬರಯಿಲ್ಲಿ ಹಾಂಗಾಸರ್ ಆಮಿ ಪರ್ಗಟ್ ಕರ್‍ತಾಂವ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಚಾಂದ್ನೆಂ ಶಿಂಪ್ಡಾಯ್ಲಾಂ
ಚಾಂದ್ನೆಂ ಶಿಂಪ್ಡಾಯ್ಲಾಂ ಕೊಣೆಂ
ವಣ್ಟಿ ಫಾಳ್ಳ್ಯಾ ತಿ ಕೊಣೆಂ
ಚಂದ್ರೆಮ್ ರಾಯ್ ನ್ಹೆಸ್ಲಾ ಕಿತೆಂ?
ಚಾಂದ್ನೆಂ ಶಿಂಪ್ಡಾಯ್ಲಾಂ ಕೊಣೆಂ?
ಚಾಂದ್ನ್ಯಾ ಸತ್ರೆಂತ್ ನವ್ಲಾಂ
ಚಂದ್ರೆಮ್ ಕುಂವರ್ ಘಾಮೆತಾಂ
ದಾಮಾಸ್ಕಾ ಸತ್ರಿ ತಿ ಫುಲ್ಲ್ಯಾ
ಮಾಂಡಿ ತಿ ಆಜ್ ಧಲ್ತಾ
ಸಾಂಗ್‌ಗೊ ಚೆಡ್ವಾ ಸಾಂಗ್‌ಗೊ ಚೆಡ್ವಾ
ಚಾಂದ್ನೆಂ ಶಿಂಪ್ಡಾಯ್ಲಾಂ ಕೊಣೆಂ?
ಆಗೋ ಆಗೋ ಚೆಡ್ವಾ
ತುಂ ಕಿತ್ಯಾಕ್ ಲಜ್ತಾಯ್?
ಆಗೋ ಆಗೋ ಮಾಣ್ಕಾ
ತುಂ ಕಿತ್ಯಾಕ್ ಲಿಪ್ತಾಯ್?
ಚಾಂದ್ನ್ಯಾ ವಾಟ್ಲೆಂತ್ ಮೊತಿಯಾಂ ಭರ್‍ಲ್ಯಾಂತ್
ಹಾಡ್‌ಗೊ ತಾಂಬ್ಡೊ ಶೆಲೊ!
ಪಾಚ್ವ್ಯಾ ಕಾಪ್ಡಾಕ್ ತುಜ್ಯಾ
ಭಾಂಗ್ರಾಳ್ಯಾ ಸರಿಯಾಂನಿ ವಿಣ್ಲಾಂ
ರಾನಾಂತ್ಲಿಂ ತಿಂ ಝಾಡಾಂ
ತುಜ್ಯಾ ಘಾಮಾಂತ್ ತೊವ್ಲ್ಯಾಂತ್
ಚಂದ್ರೆಮ್ ರಾಯ್ ನೆಟೊನ್ ಥಕ್ಲಾ
ಹಾಡ್‌ಗೊ ಪಾಚ್ವೊ ಶೆಲೊ!
ನಿಳ್ಶೆಂ ಕಾಪಡ್ ತುಜೆಂ
ಮೊತಿಯಾಂ ವಜ್ರಾನ್ ಸೊಭ್ತಾ
ವೆಳೆ ರೆಂವೆರ್ ತುಜ್ಯಾ
ದುಧಾಫೆಂಡ್ ತೊ ಖೆಳ್ತಾ
ಮಿರಿಯಾಂನಿ ತುಜ್ಯಾ ದೆಡಿಯೊ ಲಿಪ್ತಾತ್
ಹಾಡ್‌ಗೊ ನಿಳ್ಸೊ ಶೆಲೊ!
ಮೊಗಾಭರ್‍ತಿ ಆಯ್ತಿ
ಪೃಥ್ವಿ ಚಲಿ ಥಕ್ಲಿ
ದಾಲಿಯೊ ತುಪಿಂ ಭರ್‍ಲಿಂ
ಪಾಂಯ್ಜಣಾಂ ತಿಚಿಂ ನಾಚ್ಲಿಂ
ನೊವ್ರೊ ಚಂದ್ರೆಮ್ ಹುಂಬ್ರಾರ್ ಉಬೊ
ಮಾಂಚಿಯೆಂತ್ಲೆ ವ್ಹಕ್ಲೆಕ್!
-ಕ್ಯಾಥರಿನ್ ರೊಡ್ರಿಗಸ್, ಕಟ್ಪಾಡಿ