ಸಂಪಾದಕೀಯ್:
ನವಿ ಭಾಸ್, ನವಿ ಕವಿತಾ
ನವೆಂ ತಂತ್ರಗಿನ್ಯಾನ್ ಯೆತಾನಾ, ನವಿ ಭಾಸ್ ಘೆವ್ನ್ ಯೆತಾ. ಕಂಪ್ಯೂಟರ್ ವಿಗ್ಯಾನಾನ್ ಹಾಡಲ್ಲೆ ತಿತ್ಲೆ ಸಬ್ದ್ ಹೆರ್ ಖಂಯ್ಚ್ಯಾಯ್ ವಿಗ್ಯಾನಾನ್ ಹಾಡಲ್ಲೆ ನಾಂತ್. ಹಾಡ್ಲ್ಯಾತ್ ಜಾಲ್ಯಾರಿ ಅಶೆ ರಿತಿನ್ ತೆ ಲೊಕಾಮೊಗಾಳ್ ಜಾಲ್ಲೆನಾಂತ್. ಸಾಮಾನ್ಯ್ ಲೊಕಾಕಯ್ ಆಯ್ಚಿ ಕಂಪ್ಯೂಟರ್ ಭಾಸ್ ಸಮ್ಜತಾ.
ಆಯ್ಲೆವಾರ‍್ಚ್ಯಾ ದಿಸಾಂನಿ ಕಾಂಯ್ ಲೊಕಾಂನಿ ಕಂಪ್ಯೂಟರ್ ರೂಪಕಾಂ ವಾಪರುನ್ ಕೊಂಕಣಿ ಕವಿತಾ ಬರಯಿಲ್ಲ್ಯೊ ವಾಚುಂಕ್ ಮೆಳ್ತಾತ್. ತ್ಯಾ ಪಯ್ಕಿ ನೂತನ್ ಸಾಖರ್‌ದಾಂಡೆ ಆನಿ ರಾಜಯ್ ಪವಾರಾಚ್ಯೊ ಕವಿತಾ ಫಾಮಾದ್ ಜಾಲ್ಯಾತ್. ಹೆ ವಳೆರಿಕ್, ಹಾಂಗಾಚೆ ಕವಿತೆ ಮಾರಿಫಾತ್ ರೂಪಾಲಿಚೆಂ ನಾಂವ್ ಆತಾಂ ಜೊಡ್ಲಾಂ.
ತುಮ್ಕಾಂ ಕವಿತಾ ಕಶಿ ಲಾಗ್ಲಿ ತೆಂ ಬರೊವ್ನ್ ಸಾಂಗ್ಲ್ಯಾರ್ ಉಪ್ಕಾರ್ ಜಾತೊ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ತೆ ಖಿಣ್
ಜಾಚ್ ತುಂ ವ್ಹಡ್ಲೊ ಇತ್ಲೊ
ತುಕಾ ಮೆಳುಂಚ್ ಭರ್‌ಭರುನ್
ಮ್ಹಜೆ ಖಾತೀರ್ ದವರ್ ಮಾತ್
ಖಿಣ್ ತೆ ಸಾಂಬಾಳುನ್
ಎಡ್ ಕರ‍್ತಾಂ ಕರ‍್ತಾಂ
ಖೂಬ್ ಡಿಲೀಟ್ ಜಾಲೆ ಖಿಣ್
ಕೆನ್ನಾಂಯ್ ಮದಿಂ ಸಾಸ್ಪುನ್ ಪಳಯ್
ರಿಸಾಯ್ಕಲ್ ಬಿನ್
ವಿಂಡೋರ್ ವಿಂಡೋ ವಿಂಡೋರ್ ವಿಂಡೋ
ಉಘಡತ್ ತುಂ ಗೆಲಾ
ಪೊಂದ್ಚೊ ವಿಂಡೋ ಉಗ್ಡೊಚ್ ಆಸಾ
ತುಂ ಮಾತ್ ಫುಡೆಂ ಪಾವ್ಲಾ
ಎಸ್ಕೇಪ್ ಕರೀತ್ ಕರೀತ್
ತಾಂತ್ಲ್ಯಾನ್ ಭಾಯ್ರ್ ಮಾತ್ಸೊ ಯೋ
ಏಕ್ ಏಕ್ ವಿಂಡೋ ಬಂಧ್ ಕರೀತ್
ಪೊಂದೊ ಮೆರೆನ್ ಯೋ
ಖರೆಂಚ್ ಆಸಾ ಗರಜ್?
ಇತ್ಲೆ ವಿಂಡೋ ಓಪನ್ ಕರ‍್ಚಿ?
ಡಿಲೀಟ್ ಕರುನ್ ಖಿಣ್ ತೆ
ರಿಸಾಯ್ಕಲಿಂಗಾಕ್ ಘಾಲ್ಚಿ?
ಸ್ಪ್ಯಾಮ್ ಥಂಯಿಂಚ್ ತೆ ಖಿಣೂಯ್ ಥಂಯಿಂಚ್
ರಿಸಾಯ್ಕಲ್ ಬಿನ್ನಾನ್ ಖಾತಡ್ ಜಾಲ್ಯಾ
ಸೊದುಂಕ್ ಕಠಿಣ್ ಜಾಂವ್ಚೆಂ ನ್ಹೀ
ರಿಸ್ಟೋರ್ ಕರ‍್ಚೊ ವೇಳ್ ಆಯ್ಲಾ
ಡೆಸ್ಕ್ ಟೋಪಾರ್ ಪ್ರೊಗ್ರಾಮ್ ಚಡ್
ರೆಮ್ ಮೆಮರೀಯ್ ಕಮಿ ಜಾಲ್ಯಾ
ಹ್ಯಾಂಗ್ ಜಾವ್ನ್ ಉರ‍್ಚೆ ಪಯ್ಲಿಂ
ಕ್ಲೀನಪ್ ಕರ‍್ಚಿ ಗರಜ್ ಆಯ್ಲ್ಯಾ
ಕ್ಲಿಯರ್ ಕರ್ ಸ್ಪ್ಯಾಮ್ ಸಗ್ಳೊ
ವಾಯ್ರಸ್ ಕ್ಲೀನ್ ಕರ್
ವೆಳ್ಚ್ಯಾ ವೆಳಾರ್ ಅಪ್ಡೇಟ್ ಕರುನ್
ತೆ ಖಿಣ್ ರಿವಾಯ್ವ್ ಕರ್
ಜಾಚ್ ತುಂ ವ್ಹಡ್ಲೊ ಇತ್ಲೊ
ತುಕಾ ಮೆಳುಂಚ್ ಭರ್‌ಭರುನ್
ಪರ್ತೀಯ್ ತೆ ಖಿಣ್ ಮ್ಹಾಕಾ
ವಚ್ಚೆ ಪಯ್ಲಿಂ ಡಿಲೀಟ್ ಜಾವ್ನ್
-ರೂಪಾಲಿ ಕೀರ್ತನಿ
संपादकीय:
नवी भास, नवी कविता
नवें तंत्रगिन्यान येताना, नवी भास घेवन येता. कंप्यूटर विग्यानान हाडल्ले तितले सब्द हेर खंयच्याय विग्यानान हाडल्ले नांत. हाडल्यात जाल्यारी अशे रितीन ते लोकामोगाळ जाल्लेनांत. सामान्य लोकाकय आयची कंप्यूटर भास समजता.
आयलेवारच्या दिसांनी कांय लोकांनी कंप्यूटर रूपकां वापरून कोंकणी कविता बरयिल्ल्यो वाचुंक मेळतात. त्या पयकी नूतन साखरदांडे आनी राजय पवाराच्यो कविता फामाद जाल्यात. हे वळेरीक, हांगाचे कविते मारिफात रूपालिचें नांव आतां जोडलां.
तुमकां कविता कशी लागली तें बरोवन सांगल्यार उपकार जातो.
-मेल्विन रोड्रीगस
कविता:
ते खीण
जाच तूं व्हडलो इतलो
तुका मेळुंच भरभरून
म्हजे खातीर दवर मात
खीण ते सांबाळून
एड करतां करतां
खूब डिलीट जाले खीण
केन्नांय मदीं सास्पून पळय
रिसायकल बिन
विंडोर विंडो विंडोर विंडो
उघडत तूं गेला
पोंदचो विंडो उगडोच आसा
तूं मात फुडें पावला
एस्केप करीत करीत
तांतल्यान भायर मात्सो यो
एक एक विंडो बंध करीत
पोंदो मेरेन यो
खरेंच आसा गरज?
इतले विंडो ओपन करची?
डिलीट करून खीण ते
रिसाय्कलिंगाक घालची?
स्पॅम थंयिंच ते खिणूय थंयिंच
रिसायकल बिन्नान खातड जाल्या
सोदुंक कठीण जांवचें न्ही
रिस्टोर करचो वेळ आयला
डेस्क टोपार प्रोग्राम चड
रॅम मेमरीय कमी जाल्या
हॅंग जावन उरचे पयलीं
क्लीनप करची गरज आयल्या
क्लियर कर स्पॅम सगळो
वायरस क्लीन कर
वेळच्या वेळार अपडेट करून
ते खीण रिवायव कर
जाच तूं व्हडलो इतलो
तुका मेळुंच भरभरून
पर्तीय ते खीण म्हाका
वच्चे पयलीं डिलीट जावन
-रूपाली कीर्तनी