ಸಂಪಾದಕೀಯ್:
ವಾದಾಳಾಕ್ ಸಾಂಪ್ಡಾಲ್ಲ್ಯಾ ಮೊಗಾಚಿ ಏಕ್ ಕವಿತಾ
ಸಪ್ಣಾಂ ಹಕೀಗತೆಂತ್ ಬದ್ಲನಾಸ್ತಾಂ ಸಕಾಳಿಂಚ್ಯಾ ಉದೆವಾಸಂಗಿಂ, ರೆಂವೆಂತ್ಲಿಂ ರಾವ್ಳೆರಾಂ ಕೊಸ್ಳೊನ್ ಗೆಲ್ಲ್ಯಾಬರಿ ಕೊಸ್ಳೊನ್ ವೆತಾತ್. ಆಶಾಯ್ ತಶ್ಯೋಚ್! ತಾಂಕಾಂ ವಾರೆಸ್ದಾರ್ ಆಸನಾಂತ್. ತ್ಯಾ ದೆಕುನ್ ಖಂಯ್ಚೆ ಘಡ್ಯೆ ತ್ಯೊ ತುಜ್ಯಾ ಇಂದ್ರಿಯಾಂಚೆರ್ ದಾಢ್ ಘಾಲುನ್ ತುಜಿ ನೀದ್ ಫಾರ್‍ತಾತ್ ಸಾಂಗೊಂಕ್ ಜಾಯ್ನಾ. ಅಸಲ್ಯಾ ವಾದಾಳಾಂಕ್ ಜಾಯ್ತಿಂ ಜಿವಿತಾಂ ಸಾಂಪ್ಡಾಲ್ಲಿಂ, ಶಿರ್‍ಕಲ್ಲಿಂ ಆಮ್ಚೆ ಝಳ್ಕೆಕ್ ಯೇನಾಸ್ತಾಂ ರಾಂವ್ಚಿನಾಂತ್. ಹಿ ಕವಿತಾಯ್ ತಶೀಚ್!
ಪರ್ಮಳ್ ದೀಜೆ ಆಸ್‌ಲ್ಲೊ ಧುಂಪ್ ಪರ್ಮಳ್ ದೀನಾಸ್ತಾಂ ಉರ್‍ಲೊ ತರ್; ಸೊಭಾಯ್ ದೀಜೆ ಆಸ್‌ಲ್ಲೆಂ ಫುಲ್ ಸೊಭಾಯೆವಿಣೆಂ ಬಾವ್ಲೆಂ ತರ್; ರೂಚ್ ದೀಜೆ ಆಸ್‌ಲ್ಲ್ಯಾ ವೊರ್‍ಣಾಂತ್ ಮೂಸ್ ಪಡ್ಲೆ ತರ್ ಅತ್ರೆಗಾಂಚ್ಯಾ ಉಮಾಳ್ಯಾಂಚೊ ಜೀವ್ ಕಸಲ್ಯಾ ಫುಗಾಸಾಂವಾನ್ ಭರೊನ್ ಕೆದಳಾ ಪಿರಾಣ್ ಸಾಂಡಿತ್ ಮ್ಹಳ್ಳೆಂ ಸಾಂಗೊಂಕ್ ಕಷ್ಟ್.
ವಿನ್ಸೆಂಟ್ ಪ್ರಕಾಶ್ ಏಕ್ ಮೊಗಾಳ್ ಕವಿತಾ ಘೆವ್ನ್ ಹಾಂಗಾಸರ್ ಆಸಾ. ಮೊಗಾಚಿ ಕವಿತಾ ಜಾಲ್ಯಾರ್ ಪರ್ವಾನಾ, ಪುಣ್ ಹಿ ನಿರಾಶೆನ್ ಬುಡ್‌ಲ್ಲಿ ಕವಿತಾ. ಮೋಗ್ ಭಿಯಾಚೆಂ ತಾಂತಿಂ ಮ್ಹಣ್ಚ್ಯಾಕ್ ಹಿ ಕವಿತಾ ಆನ್ಯೇಕ್ ಸಾಕ್ಸ್. ಇತ್ಲೀಯ್ ನಿರಾಶಾ ಮೋಗ್ ಕರ್‍ಣಾರಾಂನಿ ಆಪ್ಲ್ಯಾ ಕಾಳ್ಜಾಂನಿ ವ್ಹಾವಂವ್ಚಿಂ ನ್ಹಯ್!
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮ್ಹಜೆಂ ಜಿವಿತ್
ಜಿವಿತ್ ಮ್ಹಜೆಂ ವೊರ್‍ಣಾ ತಶೆಂ
ಚಾಕೊನ್ ಚಾಕೊನ್ ಆಸ್ತಾನಾ
ಮುಸಾಬರಿ ಘುಸ್ಲೆಂಯ್ ಕಶೆಂ
ಉಡೊಂ ಸೊಡುಂ ಕಳ್ಳೆಂನಾ
ಧುಂಪ್ ತುಂ ಪರ್ಮಳ್ ದಿಶಿ
ಕೆಂಡಾಂತ್ ಘಾಲ್ತಾನಾ
ಧುಂಪಾ ಬದ್ಲೆಕ್ ಧುಂವರ್ ಜಾಶಿ
ದೊಳೆ ಧಾಂಪುಂಕ್ ಜಾಲೆಂ ನಾ
ಫುಲಾ ಜಶಿ ಸೊಭಾಯ್ ತುಜಿ
ಆರಾಂವ್ಕ್ ತುಕಾ ವೆತಾನಾ
ಕಾಂಟೆ ಕಶೆ ಬೊಟಾಂಕ್ ಲಾಗ್ಲೆ
ದೂಕ್ ಆಜೂನ್ ರಾವ್ಲಿನಾ
ಜಿಣಿ ಮ್ಹಜಿ ತುಜೆಸಂಗಿಂ
ಸಾರ್‍ಚ್ಯಾಕ್ ಸಂಸಾರ್ ಸಾಂಡ್ತಾನಾ
ಹಾತೆರಾಂ ಸಂಗಿಂ ಸ್ವಾಗತ್ ಕರುಂಕ್
ಕಿತ್ಯಾಕ್ ರಾವ್ಲೆಂಯ್ ಕಳ್ಳೆಂನಾ
ಮಧುರ್ ಕೊಗ್ಳೆ ತಾಳೊ ತುಗೆಲೊ
ಆಯ್ಕೊಂಕ್ ಹಾಂವ್ ಆಶೆತಾನಾ
ಖಜ್ನೊ ಫುಟ್ಲೊ ಕಾನಾರ್ ಮ್ಹಜ್ಯಾ
ಕಿತೆಂಚ್ ಮುಕಾರ್ ಆಯ್ಕಲೆಂ ನಾ
-ವಿನ್ಸೆಂಟ್ ಪ್ರಕಾಶ್, ಸಿದ್ಧಕಟ್ಟೆ