ಹಾಂವ್ ಅಭಾಗಿ

ಸಂಪಾದಕೀಯ್:

ಸದಿಂ ಭಾಶೆನ್ ಆಯ್ಜ್ ದುಕಾಂ ದೀವ್ನ್ ಗೆಲ್ಲಿ ಯಾದ್

ಬೋವ್ ಫಾಮಾದ್ ಜಾಲ್ಲೆಂ ರಾಜಯ್ ಪವಾರಾಚೆಂ ಏಕ್ ಗಝಲ್ ಹಾಂಗಾಸರ್ ದಿಲಾಂ. ಮಾಂಡ್ ಸೊಭಾಣ್ ಕಾರ್ಯಾವಳಿಂ ವೆಳಾರ್ ಜಾಯ್ತ್ಯಾ ಸಂದರ್ಭಾಂನಿ ಹೆಂ ಗಝಲ್ ತುಮಿ ಆಯ್ಕಲಾಂ ಆಸ್ಯೆತ್. ಪುಣ್ ಗಾಯ್ತಾನಾ ಗಝಲಾಂತ್ಲೆ ಹರ‍್ಯೆಕ್ ಕಡ್ವೆ ಗಾವುಂಕ್ ಜಾಯ್ನಾಂತ್. ತಶೆಂ ಜಾಲ್ಲ್ಯಾನ್ ಹ್ಯಾ ಗಝಲಾಚೊ ಬರ್ಪೂರ್ ಆನಂದ್ ತುಮಿ ಭೊಗಜಾಯ್ ಮ್ಹಳ್ಳೆ ಖಾತೀರ್ ರಾಜಯಾಚ್ಯಾ ‘ಪಾವ್ಸ್ ಫುಲಾಂ’ ಪುಸ್ತಕಾಂತ್ಲ್ಯಾನ್ ಹಿ ಕವಿತಾ ಆಮಿ ಪರ್ಗಟ್ ಕೆಲ್ಯಾ.

ರಾಜಯ್ ಪವಾರಾಕ್ ಆಂವ್ದುಂ ವರ್ಸಾ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರಾ ಖಾತೀರ್ ಆಮಿ ವಿಂಚಲ್ಲೆಂ. ಕೊಂಕಣಿ ಕವಿತಾ ಶೆತಾಚೆರ್ ಚಲಯಿಲ್ಲ್ಯಾ ಸಂಸೊಧಾಕ್ ಲಾಗೊನ್ ಡೊಕ್ಟರೇಟ್ ಲಾಭಲ್ಲೊ ಪಯ್ಲೊ ಮನೀಸ್ ತೊ.

ಗಝಲಾಂಚೊ ಆನಂದ್ ಭೊಗ್ಚಿ ರೀತಚ್ ವೆಗ್ಳಿ. ಹಾಂವೆಂ ಹಾಂಗಾಸರ್ ಶಿಂದ್ಚೆ ತಸಲೆಂ ಕಾಂಯ್ ನಾ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಹಾಂವ್ ಅಭಾಗಿ

ಸದಿಂ ಭಾಶೆನ್ ಆಯ್ಜ್ ತಿ, ಯಾದ್ ಯೇವ್ನ್ ಗೆಲಿ
ಸುಕ್ಯಾ ಮ್ಹಜ್ಯಾ ದೊಳ್ಯಾಂನಿ, ದುಕಾಂ ದೀವ್ನ್ ಗೆಲಿ

ದಿಸಾ ಉಪ್ರಾಂತ್ ಯೆತಾ ರಾತ್, ಜಾತಾ ಪರ್ತುನ್ ದೀಸ್
ಮ್ಹಜೆ ಜಿಣೆಂತ್ ರಾತಿ ಉಪ್ರಾಂತ್, ರಾತಚ್ ಯೇವ್ನ್ ಗೆಲಿ

ಮ್ಹಾಕಾ ತುಮಿ ಕೆಲೊ ಪಯ್ಸ್, ಅತಿತಾಯ್ ಕಸಲಿ
ಮ್ಹಾಕಾ ಮ್ಹಜಿ ಸಾವ್ಳಿ ಲೆಗಿತ್, ಎಕ್ಟೊ ಕರುನ್ ಗೆಲಿ

ಸೊಬಿತ್ ಸಪ್ನಾಂ ಪಳಯ್ಲಿಂ, ಪುಣ್ ರಂಗ್ ಹಾಂವೆಂ ಭರ‍್ಲೆಚ್ ನಾ
ರಂಗ್ ಭರ‍್ಚೆ ಆದಿಂಚ್ ಸಪ್ನಾಂ, ಮ್ಹಾಕಾಚ್ ಸೊಡುನ್ ಗೆಲಿಂ

ತುಮಿ ಮ್ಹಾಕಾ ದಿಲಿಂ ಫುಲಾಂ, ಹಾಂವೆಂಯ್ ತಿಂ ಆಪ್ಣಾಯ್ಲಿಂ
ತಿಂಚ್ ಫುಲಾಂ ಕಾಂಟೆ ಜಾವ್ನ್, ಕಾಳ್ಜಾಕ್ ತೊಪುನ್ ಗೆಲಿಂ

ಮ್ಹಜೆ ಸರ್ಶಿಂ ರಡ್ಲಿಂ ಮನಾಂ, ಹಾಂವೆಂ ತಾಂಕಾಂ ಹಾಸಯ್ಲೆಂ
ಸಗ್ಳಿಂ ಗೆಲಿಂ ಹಾಂಸತ್, ಪುಣ್ ಮ್ಹಾಕಾ ರಡೊವ್ನ್ ಗೆಲಿಂ

ಉದೆಂತೆಚೊ ವಾಂಗ್ಡಿ ಹಾಂವ್, ವಾಟ್ ಪಳಯ್ಲಿ ಸುರ್ಯಾಚಿ
ಮ್ಹಜೊ ಸೂರ್ಯ್ ಉದೆಲೊಚ್ ನಾ, ಪುಣ್ ಅಸ್ತಮ್ ಜಾವ್ನ್ ಗೆಲಿ

ಹಾಂವ್ ಅಭಾಗಿ ಹಾಂವೆಂ ಮ್ಹಜೆ, ಮರಣ್‌ದೇವಿಕ್ ಆಪಯ್ಲಿ
ಕೂಡ್ ಮ್ಹಜಿ ಸಾಂಡುನ್ ಫಕತ್, ಮನಚ್ ಘೆವ್ನ್ ಗೆಲಿ.

-ರಾಜಯ್ ಪವಾರ್