ಸಂಪಾದಕೀಯ್:

ಥೊಡ್ಯಾ ಖಿಣಾಂಚ್ಯಾ ಜಿವಿತಾಂತ್ ಜಿಯೆಂವ್ಚಿ ಖತ್ಕತಿ ಆಶಾ

ಜಿವಿತ್ ಕೊಣಾಚೆಂ ಕೆದೆಂ ವ್ಹಡ್ ಆಸ್ತಾ ತೆಂ ಸಾಂಗೊಂಕ್ ಜಾಯ್ನಾ. ಜಲ್ಮಲ್ಲ್ಯಾ ಹರ‍್ಯೆಕ್ಲ್ಯಾಕಯ್ ಜಿಯೆಂವ್ಚಿ ಆಶಾ ಆಸ್ತಾ. ಮೊರಾಪರ‍್ಯಾಂತ್ ಜಿಯೆಂವ್ಕ್ ಹಿ ಕೂಡ್ ಅತ್ರೆಗ್ತಾ. ಪುಣ್ ಜಿವಿತಾಚ್ಯಾ ಹರ‍್ಯೆಕಾ ಪಾಂವ್ಡ್ಯಾರ್ ಕಷ್ಟಾಂಚೆ ಕಾಂಟೆ ಪಾಂಯಾಂಕ್ ತೊಪ್ತಾನಾ, ದೂಖ್ ಸೊಸುಂಕ್ ಜಾಯ್ನಾಸ್ತಾನಾ, ಕೊಣಾ ದುಸ್ಮಾನಾಚೆ ಪಾಯ್ ಧರುಂಕಯ್ ಆಮಿ ತಯಾರ್ ಆಸ್ತಾಂವ್.

ಹಾಂಗಾಚ್ಯಾ ಥೆಂಬ್ಯಾಚಿ ಗತ್ ಸೈತ್ ಅಶೀಚ್ ಜಾಲ್ಯಾ. ಲ್ಹಾನ್ ಜಿವಿತ್. ವ್ಹಡ್ ಆಶಾ. ಪುಣ್ ನಿಮಾಣೆಂ ನಿರಾಶಾ ಮಾತ್ರ್ ಬಗ್ಲೆಕ್ ಆಸಾ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಥೆಂಬೊ.....

ಪಾವ್ಸಾಳೆ ಸಾಂಜೆರ್
ಧರ್ತೆಚೆ ಪಾಟಿರ್ ಥೆಂಬೆ ಆಪ್ಟತಾನಾ
ಥೊಡೆ ಪಾಗ್ರಾಚ್ಯಾ ಫಾತ್ರಾಂಕ್ ಆಪ್ಟೊನ್ ಫುಟ್ತಾಲೆ
ಥೊಡೆ ಘರಾಂಚ್ಯಾ ನಳ್ಯಾಂಚೆರ್

ದಾಟ್ ಮಾಂಡಲ್ಲ್ಯಾ ಶೆಳ್ಯಾಂತ್ಲ್ಯಾನ್ ನಿಸ್ರೊನ್
ವ್ಹಾಳೊನ್ ವೆಚ್ಯಾ ಉದ್ಕಾಂತ್ ಮೆಳೊನ್ ಗೆಲೆ
ಥೊಡೆ ರುಕಾಚ್ಯಾ ಫಾಂಟ್ಯಾಂನಿ ಖೆಳೊನ್
ಪಾನಾಂ ಪಾನಾಂನಿ ಗಳೊನ್ ಮಾಯಾಗ್ ಜಾಲೆ

ಪಾವ್ಸಾ ಜೋರ್ ಉಣೊ ಜಾತಾನಾ
ಹಿಂವಾ ವಾರೆಂ ಆಂಗಾಕ್ ಮಾರ್ತಾಲೆಂ
ಥೆಂಬೆ ಆನಿಕಿ ಪಡೊನ್ ಆಸಲ್ಲೆ

ತ್ಯಾ ಪಾವ್ಸಾಚೊ ಆಕ್ರೆಚೊ ಪವಿತ್ರ್ ಥೆಂಬೊ
ಹಾಂವ್ ಉಬೊ ಆಸಲ್ಲ್ಯಾ ಮಾಡಾಂ ಪೊಂದಾ
ನ್ಹಾಣಿಯೆಚ್ಯಾ ಘಾಣ್ಕುಟ್ಯಾ ಉದ್ಕಾಂತ್
ರೂಂದ್ ಪಾತ್ಳೊನ್ ಆಸಲ್ಲ್ಲ್ಯಾ ಕಾಸುಳ್ಯಾ ಪಾನಾರ್ ಪಡ್ಲೊ

ಅಸ್ಕತ್ ತ್ಯಾ ಕಾಸುಳ್ಯಾಚೊ ದೇಂಟ್
ವಾರ‍್ಯಾಕ್ ಹಾಲತ್ ತರ್
ಪವಿತ್ರ್ ಥೆಂಬ್ಯಾ ತುಜೆಂ ಪವಿತ್ರಪಣ್ ಭಶ್ಟ್ ಜಾಯ್ತ್
ಚಡ್ ವೇಳ್ ರಾವೊಂಕ್ ತುಕಾ ಕಶ್ಟ್ ಜಾಯ್ತ್
ಥೆಂಬ್ಯಾಚೆಂ ಮಾಗ್ಣೆಂ ಕಾಸುಳ್ಯಾ ಖೊಲ್ಯಾಕ್ -

"ಥೊಡೊ ವೇಳ್ ತರಿ, ಏ ಪಾನಾ,
ಆಸ್ರೊ ದೀ ಮ್ಹಾಕಾ
ಥೊಡೋ ಕಾಳ್ ತರಿ
ತ್ಯಾ ಘಾಣ್ಕುಟ್ಯಾ ಯೆಮ್ಕೊಂಡಾ ಥಾವ್ನ್
ವಿಸ್ರಯ್ ಮ್ಹಾಕಾ"

ಆಕ್ರೇಕ್ ಪವಿತ್ರ್ ಥೆಂಬ್ಯಾಚ್ಯಾ ವಜನಾಕ್
ಕಾಸುಳೋಯಿ ಕೊಸ್ಳಾಲೊ
ಪರ್ಕಿ ಥೆಂಬ್ಯಾಕ್ ಆಸ್ರೊ ದಿವುನ್
ತೋಯಿ ಧರ್ಣಿಕ್ ಸಮಾ ಜಾಲೊ

-ಅನಿಲ್ ಬೈಂದೂರ್ (ಸ್ಪೈನ್)