ಸಂಪಾದಕೀಯ್:

ಬಾಳ್ಪಣಾಕ್ ಪರತ್ ವೇಂಗ್ ಮಾರ್ಚಿ ಆಶಾ ಜಾತಾನಾ

ಮನ್ಶಾ ಜಿವಿತಾಕ್ ವೆವೆಗ್ಳೆ ಪಾಂವ್ಡೆ ಆಸ್ತಾತ್. ಹೆ ಪಾಂವ್ಡೆ ಆಶೆಲ್ಲೆಬರಿ ಪರ್ತ್ಯಾನ್ ಕೊಣಾಯ್ ವರ್ವಿಂ ಜೊಡುಂಕ್ ಸಾಧ್ಯ್ ನಾಂತ್. ಕಾಳ್ ಪರ್ತುನ್ ಗೆಲ್ಲ್ಯಾಬರಿ ಹೆ ಪಾಂವ್ಡೆ ಫಕತ್ ಉಡಾಸಾಚ್ಯಾ ಕಂತ್ರೆಲಾಂನಿ ಮಾತ್ರ್ ಫಿಛಾರ್ ಕರ್ಯೆತ್.

ಹಾಂಗಾಸರ್ ಕವಿಕ್ ಬಾಳ್ಪಣಾಚ್ಯಾ ಪಾಂವ್ಡ್ಯಾಕ್ ಪರ್ತ್ಯಾನ್ ಮೇಟ್ ದವರ್ಚಿ ಜಬ್ಬೊರ್ ಆಶಾ ಜಾಲ್ಲಿ ದಿಸ್ತಾ. ಖಂಯ್ ಗೆಲಾಂಯ್ ಯೇ ಪಾಟಿಂ ತುಂ ಲ್ಹಾನ್‌ಪಣಾ, ಹಾಂವ್ ತುಕಾ ರಾಕ್ತಾಂ ತುಜೊ ಪಾತ್ತೊ ನಾ, ಲ್ಹಾನ್‌ಪಣಾಲೆ ದೀಸ್... ಹೆಂ ಗೀತ್ ಆಮಿ ಆಯ್ಕಲಾಂ.

ಖಂಯ್ಚ್ಯಾ ಮನ್ಶಾಕ್ ಆಶಾ ನಾ ಜಾಯ್ತ್ ಬಾಳ್ಪಣಾಕ್ ಪರ್ತ್ಯಾನ್ ಏಕ್ ಪಾವ್ಟಿಂ ವೇಂಗ್ ಮಾರುಂಕ್?

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಬಾಳ್ಪಣಾಚೆ ಯಾದಿಂನಿ

ಕಾಂಟಿಂನಿ ಭರ್ನ್ ದವರಲ್ಲಿಂ ಉಗ್ಡಾಸಾಚಿಂ ಭೊಗ್ಣಾಂ
ಜಿವಿತ್ ಮ್ಹಳ್ಳ್ಯಾ ಸುಕ್ಣ್ಯಾನ್ ಕಾಳ್ಜಾ ಪಿಂಜ್ರ್ಯಾ ಥಾವ್ನ್
ಬಾಳ್ಪಣಾಕ್ ಉಬೊಂವ್ಕ್ ಪಾಕಟೆ ಫುಲಯ್ಲ್ಯಾತ್

ಸಾಂಡುನ್ ಗೆಲ್ಲೆಂ ತೆಂ ಜಿವಿತ್
ಉತ್ರಾಂನಿ ವರ್ಣುಂಕ್ ಜಾಯ್ನಾ ತಸಲೆಂ
ಚಮ್ಕೊನ್ ಆಯಿಲ್ಲ್ಯಾ ಪಾವ್ಲಾಂಚೆ ಗುರ್ತ್ ಪಳೆವ್ನ್ ಥಕ್ಲಾಂ
ಇಷ್ಟಾಗತೆಂತ್ ಎಕ್ಟಾಯ್ಲಲೆ ತೆ ರಂಗ್ ಆಳ್ವಾಳ್ಳ್ಯಾ ಕಾಳಾಕ್
ರಡ್ಚ್ಯಾ ತೊಂಡಾರಯಿ ಹಾಸೊನ್ ಆಸಾತ್

ಬಾಳ್ಪಣಾಚ್ಯಾ ಖೆಳಾಂಚೆ ಯಾದಿಂನಿ
ಪಾಯಾಂ ಬೊಟಾಂ ರಾವ್ಲ್ಯಾಂತ್
ಪರತ್ ಬಾಳ್ಪಣಾಚೆ ಆವ್ದೆಚ್ಯಾ ಥೆಂಬ್ಯಾಂಕ್
ಆಶೆವ್ನ್ ಪಿಸೊ ಜಾಲಾಂ

ಮೊಳ್ಬಾಪರಿಂ ವಿಸ್ತಾರಲ್ಲೆ ಯಾದಿಂನಿ
ಪಾಕಟೆ ಫುಲೊವ್ನ್ ಉಬ್ತಾಂ
ಬಾಳ್ಪಣಾಚೆ ಜಿಣ್ಯೆಕ್ ವೆಂಗ್ಚ್ಯಾ ತ್ಯಾ ಅತ್ರೆಗಾನ್

-ಜೀವನ್ ಬೊಂದೆಲ್