ಜಾಯಿಚ್ ಜಾಯ್

ಸಂಪಾದಕೀಯ್:

ಭಿಕಾರಿ ನ್ಹವ್ರ್ಯಾಚಿ ಅವ್ವಲ್ ಕಥಾ

ದೋತ್ ನಾಕಾ ಮ್ಹಣೊನ್ ದೆಣೆಂ ಘೆಂವ್ಚ್ಯಾಕ್ ಆಮ್ಚ್ಯಾ ಗಾಂವಾಂತ್ ದುಕೊಳ್ ನಾ. ಕಾಳ್ಜಾಂತ್ ಆನಿ ಅತ್ಮ್ಯಾಂತ್ ಭಿಕಾರಿ ಹೆ ಮನೀಸ್. ಆಪ್ಲೆ ಜಿಣಿಯೆಕ್ ಸಾಂಗಾತ್ ದೀಂವ್ಕ್ ಯೆಂವ್ಚೆ ಸ್ತ್ರೀಯೆಕ್, ಆಪ್ಣಾಕ್ ಜಾಯ್ ಜಾತಾಂ ಸುಖ್ ದಿಂವ್ಚೆ ಸ್ತ್ರೀಯೆಕ್, ಆಪ್ಣಾಕ್ ಭುಕ್ ಲಾಗ್ತಾಂ ಪೊಟಾಕ್ ದಿಂವ್ಚೆ ಸ್ತ್ರೀಯೆಕ್ - ಘರಾ ಭಿತರ್ ಹಾಡ್ಚೆ ಆದಿಂ ಹಾಂಚೆಂ ಥಳ್ ಹಾಂಕಾಂ ಘಟ್ ಕರುಂಕ್ ಜಾಯ್.

ದೆಣ್ಯಾವಿಣೆಂ ಹಾಂಕಾಂ ಹಾಂಚೆರ್ ಭರ‍್ವಸೊ ನಾ. ಅಸಲ್ಯಾ ದಾದ್ಲ್ಯಾಚಿ ವಾಸ್ತವಿಕತಾ ಸಂಪ್ಯಾ ಉತ್ರಾಂನಿ ಫಿಲೊಮಿನಾ ಸಾಂಫ್ರಾನ್ಸಿಸ್ಕೊನ್ ಆಮ್ಚೆ ಹುಜಿರ್ ದವರ‍್ಲ್ಯಾ. ನಿಮಾಣ್ಯಾ ಕಡ್ವ್ಯಾಂತ್ ಮಾತ್ರ್ ಬೋವ್ ಮಾರ್ಮಿಕ್ ಥರಾನ್ ದಾದ್ಲ್ಯಾಚೆಂ ಶಿಖಂಡಿಪಣ್ ತಿ ಮಾರ್ನ್ ಉಡಯ್ತಾ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಜಾಯಿಚ್ ಜಾಯ್

ತಾಕಾ ಪನ್ನಾಸ್ ಲಿಬ್ರಾಂ ಭಾಂಗರ್ ಜಾಯ್
ಜೋಗ್, ಕಾಂಕ್ಣಾಂ, ಸರ್ಪಳಿ ಜಾಯ್
ಮಾಸ್ಕೊತ್, ಕಾನಾಂತ್ಲಿಂ, ಮುದಿ ಜಾಯ್; ಆನಿ...
ಪಾಂಯ್ಜಣಾಂ ದಿಲ್ಯಾರ್.. ತಿಂವೂಯ್ ಜಾಯ್

ತಾಕಾ ಟಿ.ವಿ., ವೀಡಿಯೊ, ರೇಡಿಯೊ ಜಾಯ್
ಫ್ರಿಡ್ಜ್, ಮಿಶಿನ್, ಗ್ಯಾಸ್ ಜಾಯ್,
ಕೊಬೊಡ್, ಸೋಫಾ, ಖಾಟ್ ಜಾಯ್; ಆನಿ...
ಮೊನ್ಕುಟೊ ದಿಲ್ಯಾರ್.. ತೊವೂಯ್ ಜಾಯ್.

ತಾಕಾ ಸೂಟ್, ಬೂಟ್, ಟಾಯ್ ಜಾಯ್,
ರಾವುಂಕ್ ಘರ್ ನಾ, ಘರ್ ಜಾಯ್,
ಸಾಯ್ಕಲ್, ಸ್ಕೂಟರ್, ಮೊಟೊರ್ ಜಾಯ್; ಆನಿ...
ತೀನ್ ಚಾಕಾಂಚಿ ಸಾಯ್ಕಲ್ ದಿಲ್ಯಾರ್... ತಿವೂಯ್ ಜಾಯ್.

ಚಲೊಂವ್ಕ್ ನಕ್ಳೊ ತರೀ ಹೊಂಡಾ ಜಾಯ್,
ವಾಜೊಂವ್ಕ್ ನಕ್ಳೊ, ತರೀ ಗಿಟಾರ್ ಜಾಯ್,
ಆಯ್ಕುಂಕ್ ಉಣೆಂ ಯೆತಾ, ತರೀ ಸಿ.ಡಿ. ಜಾಯ್; ಆನಿ...
ದಾಟ್ ಹಾರ್ಶಾಂಚಿಂ ವೊಕ್ಲಾಂ ದಿಲ್ಯಾರ್...ತಿಂವೂಯ್ ಜಾಯ್.

ಹೆಂವೂಯ್ ಜಾಯ್, ತೆಂವೂಯ್ ಜಾಯ್,
ಸಗ್ಳೆಂಚ್ ಜಾಯಿಚ್ ಜಾಯ್;
ಕಾರಣ್, ತೊ ಏಕ್ ಭಿಕಾರಿ ನ್ಹವ್ರೊ,
ತಾಕಾ ದೋತ್ ನಾಕಾ; ಪುಣ್
ಹೆಂ ಸಗ್ಳೆಂ ಮಾತ್ ಜಾಯಿಚ್ ಜಾಯ್, ಜಾಯಿಚ್ ಜಾಯ್.

-ಫಿಲೊಮಿನಾ ಸಾಂಫ್ರಾನ್ಸಿಸ್ಕೊ