ಸಂಪಾದಕೀಯ್:
ರಾಂದ್ವಯೆಚಿ ಕವಿತಾ ಗಾಂವ್ಚೊ ಉಡಾಸ್ ಜಿವೊ ಕರ್‍ತಾ
ಗಾಂವಾಂತ್ ಪಾವ್ಸ್ ಪಡ್ಲಾ. ಹ್ಯಾ ಪಾವ್ಸಾನ್ ಭುಂಯ್ತ್‌ಲ್ಯಾ ಬಿಯಾಳ್ಯಾಕ್ ಜೀವ್ ಭರ್‍ಲಾ. ಸುಕೊನ್ ಗೆಲ್ಲ್ಯಾ ರೂಕ್ ಝಾಡಾಂನಿ ಸ್ವಾಸ್ ಭರ್‍ಲಾ. ಆಖ್ಖೊ ಗಾಂವ್ ಪಾಚ್ವ್ಯಾನ್ ಪರ್ಜಳ್ತಾ. ದೊಳ್ಯಾಂಕ್ ಫೆಸ್ತ್‌ಚ್ ಫೆಸ್ತ್!
ಹ್ಯಾಚ್ ವೆಳಾ ಗಾಂವಾರ್ ಫೆಸ್ತಾಂ ಸುರು ಜಾತಾತ್. ಭುಂಯ್ತ್ ಜಾಲ್ಲ್ಯಾ ನವ್ಯಾ ರಾಂದ್ವಯ್ ಫಳಾಂಚೆಂ (ಕಾಂಯ್ ಥೊಡೆಕಡೆ ಪಾವ್ಸಾಉಪ್ರಾಂತ್ ಪಯ್ಲೆಪಾವ್ಟಿಂ ಪಾಗುಂಕ್ ವಚೊನ್ ಆರಾಯಿಲ್ಲೆಂ ನುಸ್ತೆಂ ಯಾ ಮಾಸ್ಳಿ), ಜೆವಣ್ ಸಾಂಗಾತಾ ಬಸೊನ್ ಜೆಂವ್ಚಿ ರಿವಾಜ್ ಗಾಂವಾಂತ್ ಆಜೂನ್ ಚಾಲು ಆಸಾ. ಮಂಗ್ಳುರಾಂತ್ ಮಾತ್ರ್ ನ್ಹಯ್, ಲಾಗ್ಶಿಲ್ಯಾ ಕೇರಳಾಂತ್ ಆನಿ ತಮಿಳ್ನಾಡಾಂತ್ ವೆವೆಗ್ಳ್ಯಾ ನಾಂವಾಂನಿ ಹಿಂ ಫೆಸ್ತಾಂ ಆಚರ್‍ಶಿತಾತ್.
ಕ್ರಿಸ್ತಾಂವ್ ಲೊಕಾಚೆಂ ಜೆಂ ಮೊಂತಿ ಫೆಸ್ತ್ ಆಸಾ, ತ್ಯಾ ಫೆಸ್ತಾಭೊಂವ್ತಿಂ ಬೋವ್ ಆಪುರ್‌ಬಾಯೆನ್ ಫಾಮಾದ್ ಹಾಸ್ಯ್ ಕವಿ ಸಿಜ್ಯೆಸ್ ತಾಕೊಡೆನ್ ಹಿ ಕವಿತಾ ವಿಣ್ಲ್ಯಾ! ಹೆ ಕವಿತೆಂತ್ ಜ್ಯಾ ನಾಂವಾಂಚೊ ಆನಿ ರಾಂದ್ವಯೆಚೊ ಉಲ್ಲೇಕ್ ಜಾಲಾ, ತ್ಯಾವರ್‍ವಿಂ ಸರ್‍ವಾಂಕ್ ಆಪಾಪ್ಲ್ಯಾ ಮನ್ಶಾಂಚೊ ಉಡಾಸ್ ಯೇವ್ನ್ ತಾಂಚ್ಯಾ ಸಾಂಗಾತಾ ರಾಂದ್ವಯೆಚೆಂ ಜೆವಣ್ ಜೆವ್‌ಲ್ಲೊ ಉಡಾಸ್ ಜಿವೊ ಜಾತಲೊ ಮ್ಹಣ್ಚ್ಯಾಂತ್ ದೋನ್ ಉತ್ರಾಂ ನಾಂತ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮೊಂತಿ ಫೆಸ್ತಾಕ್
ಗೊಸಾಲಾಗೆಲಿಂ ಗೊಸಾಳಿಂ ಆಯ್ಲಿಂ
ಮೊಂತಿ ಫೆಸ್ತಾಕ್
ಪಡ್ವಳಾಗೆಲಿಂ ಪಡ್ವಳಿಂ ಮೆಳ್ಳಿಂ
ಲಾಂಬ್ ಬಾರೀಕ್!
ಕಾರ್ಮಿಣ್‌ಬಾಯೆಚೆಂ ಕಾರೆತೆಂ
ತಿಕ್ಕೆ ಆಡೂಕ್
ಆಬುಟಾಮಾಚೆ ಆಂಬಾಡೆ
ಆಂಬೊಟ್ ಚಾಬೊಂಕ್!
ಸೆರ್ಪಿನ್‌ಬಾಯೆನ್ ಸಾಂಗೊ ಧಾಡ್ಲ್ಯೊ
ತರ್ನ್ಯೊ ಉಲ್ಕಾಟ್
ಬೆನ್ನಾಬಾಪ್ಪುಚಿಂ ಬೆಂಡಾಂ ಸಾಯ್ಬಾ
ಪೂರಾ ಜುಣ್ಕಾಟ್!
ತೆಜ್ಜುಬಾಯೆನ್ ದಿಲ್ಲಿಂ ತೆಂಡ್ಲಿಂ
ಸಕ್ಕಡ್ ಕಿಡ್ಯಾರಿಂ
ಬಿಜ್ಜು ಮಾವ್ಶೆನ್ ತೊವ್ಶಿಂ ಹಾಡ್ಲಿಂ
ಚಾಪ್ಪೆ ಜಿಬೆರಿಂ!
ಬಾಬಿಯಾಮಾನ್ ಬಿಂಬ್ಲಿಂ ದಿಲಿಂ
ಆಂಬೊಟ್ ಪುಲ್ಚಾಟ್
ಬೆನ್ನಿಬಾಯೆನ್ ಬೊಬ್ಳಿಂ ಧಾಡ್ಲಿಂ
ಸಕ್ಕಡ್ ಕೊಜ್ಯಾಂಟ್!
ದೆಲ್ಫಿನ್ ಬಾಯೆನ್ ಧಾಡ್ಲೊ ದೆಂಟೊ
ಕೊಯ್ತೊ ಲಾಗನಾ
ಆಲ್ಲಿಬಾಯೆಚೆಂ ಪರ್ನೆಂ ಆಳುಂ
ಕುಂಡ್ಲ್ಯಾಂತ್ ಶಿಜನಾ!
ಮಿಲ್ಲಿ ವೊನಿಯೆನ್ ದಿಲ್ಲಿ ಮಿರ್‍ಸಾಂಗ್
ಚಿಮ್ಟಿ ತಿಕ್ಸಾಣ್ ನಾ
ಸೆಲ್ಲಿಬಾಯೆಚಿ ಚಿಂಚೆ ಆಮ್ಸಾಣ್
ನಿಸ್ತ್ಯಾಕ್ ನಾಟ್ವನಾ!
ಕುಲಾಸಾಮಾಚೊ ವ್ಹಡ್ಲೊ ಕುವಾಳೊ
ಭಾಯ್ಲ್ಯಾನ್ ಸೊಭಿತ್
ಕಾತರ್‍ನ್ ಜರ್ ಪಳೆಲೊ
ಕುಸ್ಲಾ ಗುಪೀತ್!
ಮಸ್ಕರೆಞಾಚ್ಯೊ ಮುಸ್ಕಾಸಾಂಗೊ
ಲಾಂಬ್ ಬೊಡಿಯೊ
ತಾಸುನ್ ಜರ್ ಕಾತರ್‍ಲ್ಯೊ
ಬಾರೀಕ್ ಕಾಡಿಯೊ!
ಸಿಕೇರಿಂಗೆಲಿ ಪಿಕಿ ಪೊಪಾಯ್
ಸೊಭಿತ್ ರಂಗಾಳ್
ಕಾತರ್‍ನ್ ಜರ್ ಪಳೆಲಿ
ಕಿಡೆಗಾ ಧಾರಾಳ್!
ಲೊಬಾಂಗೆಲೊ ಲಾಂಬ್ ಕೊಬು
ಪಳೆಂವ್ಕ್ ರೊಸಾಳ್
ಚಾಬೊನ್ ಚಾಬೊನ್ ದಾಂತ್ ಕುಡ್ಕೆ
ಜುಣ್ಕಾಟ್ ಮುಸಾಳ್!
ಪಾಯ್ಸಾಂಗೆಲೆಂ ಪಾತಳ್ ವೋರ್ನ್
ಪಿಯೆಂವ್ಕ್ ರುಚಿಕ್
ಚಡ್ ಪಿಯೆಲ್ಯಾರ್ ಪೊಟ್ ನಿತಳ್
ಪುರೊ ಆಜಿಕ್!
-ಸಿಜ್ಯೆಸ್ ತಾಕೊಡೆ