ಸಂಪಾದಕೀಯ್:
ಹರ್ಧ್ಯಾರ್ ಕಾನ್ ದವರ್ನ್ ಕಾಳ್ಜಾಚೆ ದಡ್ದಡೆ ಲ್ಯಾಪ್ಟೊಪ್ ಮೆಜುಂಕ್ ಸಕ್ತಾ?
ಘೊವ್ ಪರ್ಗಾವಾಂತ್. ಬಾಯ್ಲ್ ಗಾಂವಾಂತ್. ಕೊಣ್ ಮ್ಹಣ್ತಾ ತಿಂ ಪಯ್ಸ್ ಆಸಾತ್ ಮ್ಹಣೊನ್? ಲ್ಯಾಪ್ಟೊಪ್ ಆಸಾ ನ್ಹಯ್! ವೀಡಿಯೊ ಚ್ಯಾಟಿಂಗಾಂತ್ ಸದಾಂಯ್ ಪಳೆವ್ಯೆತ್ ನ್ಹಯ್! ಸದಾಂಯ್ ಉಲೊವ್ಯೆತ್ ನ್ಹಯ್!
ಆಧುನಿಕ್ ತಂತ್ರಗಿನ್ಯಾನಾನ್ ಎಕುರ್ಪಣ್ ಉಣೆಂ ಕರುಂಕ್ ಮನ್ಶಾಕುಳಾಕ್ ಜಾಯ್ತ್ಯಾ ಸವ್ಲತೆಂಚ್ಯೊ ದೇಣ್ಗ್ಯೊ ದಿಲ್ಯಾತ್ ಖರೆಂ. ಪುಣ್ ಬಾಯ್ಲೆಕ್, ಘೊವಾಕ್ ಆಪ್ಡುಂಕ್ ಮೆಳ್ತಾ ಕಾಂಯ್? ಉಸ್ವಾಸಾಚಿ ಊಬ್ ಲ್ಯಾಪ್ಟೊಪ್ ದೀಂವ್ಕ್ ಸಕ್ತಾ? ಹರ್ಧ್ಯಾರ್ ಕಾನ್ ದವರ್ನ್ ಕಾಳ್ಜಾಚೆ ದಡ್ದಡೆ ಹೆಂ ಲ್ಯಾಪ್ಟೊಪ್ ಮೆಜುಂಕ್ ಸಕ್ತಾ?
ಲಗ್ನಾಚೊ ಸಂಬಂಧ್ ಲ್ಯಾಪ್‍ಟೊಪಾಚೆ ಸವ್ಲತೆ ಮುಕಾರ್ ಲಿಲಾಂವ್ ಘಾಲ್ಚ್ಯಾ ದಾದ್ಲ್ಯಾನ್ (ಆನಿ ಬಾಯ್ಲೆನ್ ಸೈತ್) ಬಾಯ್ಲೆಚ್ಯಾ ಭೊಗ್ಣಾಂಲಾಗಿಂ ಖೆಳ್ ಖೆಳನಾಸ್ತಾಂ, ಜಿವಿತಾಚ್ಯಾ ಮೊಲಾಂಕ್ ಉಕ್ಲುನ್ ಧರಿಜಾಯ್ ಆನಿ ಸ್ಕ್ರೀನಾಚೆರ್ ಝಳ್ಕೊಂಚೆಂ ರಾವೊವ್ನ್ ಸ್ವತಾ ತಿಕಾ ವೆಂಗೆಂತ್ ಧರ‍್ಚೆಂ ಪ್ರೇತನ್ ಕರಿಜಾಯ್ ಮ್ಹಣೊನ್ ಹಿ ಕವಿತಾ ಸಾಂಗ್ಚೆಂ ದಿಸ್ತಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಅಸ್ಪರ್ಶ್
ಲ್ಯಾಪ್‍ಟೊಪಾ ಮುಖಾರ್ ಬಸೊನ್ ಮೊಗಾ
ಉಲವ್ಯೆತ್, ಪಳವ್ಯೆತ್ ವೊರಾಂನಿ ವೊರಾಂ
ಉಮಾಳಲ್ಲೆಂ ದೂಖ್ ಹಾಸ್ಯಾಂತ್ ಜಿರ್‍ತಾ
ತುಜೆ ವೆಂಗೆಂತ್ ಮಾತ್ರ್ ತೆಂ ಗಳ್ತಾ….
ಯೆ ವೆಗಿಂ…ಕಾಳ್ಜಾ ಉಡ್ಯೊ ಉಮ್ಯಾಂನಿ ಮೆಜುನ್
ಗಳಯ್ತಾಂ ಜಿರಲ್ಲಿಂ ದುಖಾಂ ಎಕಾಚ್‍ಫರಾ…
ಸಾತ್ ದರ್ಯಾಂ ಪಯ್ಸ್ ಥಾವ್ನ್ ತಾಳೊ
ವೊರಾಂ ವೊರಾಂ ಆಯ್ಕಾಲ್ಯಾರಿ ಮೊಗಾ
ಸಾಂಗ್ ಕಶೆಂ ಭೊಗುಂ ತುಜೊ ಸ್ವಾಸ್
ಸಾತ್ ದರ್ಯಾಂ ಪಯ್ಶಿಲೆಂ ಮುಖಮಳ್
ಪಳೆವ್ನಚ್ ರಾಂವ್ಚಿ ಆಶಾ ಮೊಗಾ
ಸಾಂಗ್ ಕಶೆಂ ಭೊಗುಂ ತುಜೊ ಪರ್ಮಳ್
ತುಜೊ ಪರ್ಮಳ್, ತುಜೊ ಸ್ವಾಸ್
ಉತ್ರೊಂಕ್ ಸಕನಾಮೂ ಲ್ಯಾಪ್ಟೊಪ್ ಸ್ಕ್ರೀನ್
ಕಿತ್ಲೆಂಯ್ ಉಲವ್ಯೆತ್, ಕಿತ್ಲೆಂಯ್ ಪಳವ್ಯೆತ್
ಕಶೆಂ ಮೊಗಾ ತುಕಾ ಆಪಡ್ಯೆತ್?
ಜಿಣ್ಯೆ ಗ್ರಾಸಾನಚ್ ಜಿಣ್ಯೆಕ್ ಘಾಲಾ ಘಾಸ್
ಲ್ಯಾಪ್‍ಟೊಪಾ ಉಬೆನಚ್ ಉತರ‍್ಲೆಂಮೂ ವರ್ಸ್
ತಾಂತ್ರಿಕ್ ಕುತಂತ್ರಾಂನಿ ಭೊಗ್ಣಾಂಚೆ ಸತ್ತ್ಯಾನಾಸ್
ಘೆಟೆ ಜಾಯ್ನಾ ಜಾಂವ್ ದುಖಾಂ
ಸ್ಕ್ರೀನಾರಚ ಖಂಚನಾ ಜಾಂವ್ ಮುಖಾಂ
ಯೇ ಮೊಗಾ..ಪುರೊ ಹೊ ಲ್ಯಾಪ್‍ಟೊಪಾ ಸ್ಪರ್ಶ್
ಲಾಸ್ತಾ ಅತ್ಮೊ ಎಕ್ಸುರ್ಪಣಾ ಸೊರ್ಮುಣಾ ಸಂಘರ್ಶ್
ತುಜಾ ಸ್ಪರ್ಶಾವಿಣೆಂ ಮೊಗಾ ಜಾಲ್ಯಾಂ ಅಸ್ಪರ್ಶ್
-ಎಂಡ್ರ್ಯೂ ಎಲ್. ಡಿಕುನ್ಹಾ
संपादकीय:
हर्ध्यार कान दवर्न काळजाचे दडदडे ल्यापटोप मेजुंक सक्ता?
घोव पर्गावांत. बायल गांवांत. कोण म्हणता तीं पयस आसात म्हणोन? ल्यापटोप आसा न्हय! वीडियो च्याटिंगांत सदांय पळेव्येत न्हय! सदांय उलोव्येत न्हय!
आधुनीक तंत्रगिन्यानान एकुर्पण उणें करुंक मनशाकुळाक जायत्या सवलतेंच्यो देणग्यो दिल्यात खरें. पूण बायलेक, घोवाक आपडुंक मेळता कांय? उस्वासाची ऊब ल्यापटोप दीवंक सक्ता? हर्ध्यार कान दवर्न काळजाचे दडदडे हें ल्यापटोप मेजुंक सक्ता?
लग्नाचो संबंध ल्यापटोपाचे सवलते मुकार लिलांव घाल्च्या दादल्यान (आनी बायलेन सैत) बायलेच्या भोगणांलागीं खेळ खेळनासतां, जिविताच्या मोलांक उकलून धरिजाय आनी स्क्रीनाचेर झळकोंचें रावोवन स्वता तिका वेंगेंत धर्चें प्रेतन करिजाय म्हणोन ही कविता सांगचें दिसता.
-मेलवीन रोड्रिगस
कविता:
अस्पर्श
ल्यापटोपा मुखार बसोन मोगा
उलव्येत, पळव्येत वोरांनी वोरां
उमाळल्लें दूख हास्यांत जीरता
तुजे वेंगेंत मात्र तें गळता….
ये वेगीं…काळजा उड्यो उम्यांनी मेजून
गळयतां जिरल्लीं दुखां एकाचफरा…
सात दऱ्यां पयस थावन ताळो
वोरां वोरां आयकाल्यारी मोगा
सांग कशें भोगूं तुजो स्वास
सात दऱ्यां पयशिलें मुखमळ
पळेवनच रांवची आशा मोगा
सांग कशें भोगूं तुजो पर्मळ
तुजो पर्मळ, तुजो स्वास
उत्रोंक सकनामू ल्यापटोप स्क्रीन
कितलेंय उलव्येत, कितलेंय पळव्येत
कशें मोगा तुका आपड्येत?
जिण्ये ग्रासानच जिण्येक घाला घास
ल्यापटोपा उबेनच उतर्लेंमू वर्स
तांत्रीक कुतंत्रांनी भोगणांचे सत्त्यानास
घेटे जायना जांव दुखां
स्क्रीनारच खंचना जांव मुखां
ये मोगा..पुरो हो ल्यापटोपा स्पर्श
लासता अत्मो एक्सुर्पणा सोर्मुणा संघर्श
तुजा स्पर्शाविणें मोगा जाल्यां अस्पर्श
-एंडऱ्यू एल. डिकुन्हा