ಸಂಪಾದಕೀಯ್:
ವ್ಹಡ್ಲ್ಯಾ ಸಂಸಾರಾಂತ್ ಲ್ಹಾನ್ ಸಂಸಾರ್ ಬಾಂಧುನ್ ಆಸ್ಚೆ ಮನೀಸ್
ಹ್ಯಾ ಸಂಸಾರಾಚ್ಯಾ ಮನ್ಶಾಂಕ್ ಕಿತೆಂ ಜಾಲಾಂ? ಯೆದ್ಯಾ ವ್ಹಡ್ ಸಂಸಾರಾಂತ್ ತಾಂಚೆ ತಾಂಚೆ ಲ್ಹಾನ್ ಸಾನ್ ಸಂಸಾರ್ ಬಾಂಧುನ್ ಆಸಾತ್ ತೆ. ತಾಂಕಾಂ ಖಂಯ್ಚ್ಯಾಯ್ ಬರ‍್ಯಾ ಕಾಮಾಕ್ ಫುರ‍್ಸತಚ್ ನಾ ಜಾಲ್ಯಾ. ರಸ್ತ್ಯಾರ್ ಎಕ್ಲೊ ಮನೀಸ್ ಪಡೊನ್ ಆಸಾ ತರ್, ‘ಪಾಡ್ ಪಡೊಂ’ ಮ್ಹಣೊನ್ ಆಪ್ಲೆ ವಾಟೆನ್ ಚಲ್ಪಿ ಹ್ಯಾ ಮನ್ಶಾಂಚ್ಯಾ ಮನಾಂಕ್ ಮಾತಿ ಖೆಲ್ಯಾ.
ತರೀ, ಹೆಂ ಪುರಾಯ್ ಕವಿತೆಲಾಗಿಂ ಕಿತ್ಯಾಕ್ ಸಾಂಗಜಾಯ್? ಕಿತ್ಯಾಕ್ ಮ್ಹಳ್ಯಾರ್ ಕವಿತಾ ಮಾತ್ರ್, ಹ್ಯಾ ಕವಿತೆಂತ್ಲ್ಯಾ ಮನ್ಶಾಕ್ ಸಾಂಗಾತ್ ದೀವ್ನ್ ಆಯ್ಲ್ಯಾ. ತಾಚ್ಯಾ ಕಷ್ಟಾ-ಸುಖಾಂತ್ ಲಾಗಿಂ ರಾವ್ಲ್ಯಾ. ತಿಚೆವಿಣೆಂ ತೊ ನಾ. ಸಕ್ಕಡ್ ಸಾಂಗಾತ್ಯಾಂ ಪ್ರಾಸ್ ಕವಿತಾ ಮಾತ್ರ್ ತಾಕಾ ವ್ಹರ್ತಿ ದಾಧೊಸ್ಕಾಯ್ ದೀವ್ನ್ ಆಸಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಏಕ್ ಚೀಟ್ ಮೊಗಾಳ್ ಕವಿತೆಕ್
ಮೊಗಾಳ್ ಕವಿತೆ,
ಅಶಿಂ ಕಶಿಂ ಹಿಂ ಮನ್ಶಾಂ
ತುಜಿ ಶಿತಳ್ ಸಾವ್ಳಿ ಸೊಡೂನ್
ಧಾಂವತ್ ಸುಟ್ಲ್ಯಾಂತ್ ಪಿಶ್ಯಾವರಿ
ಕೆನ್ನಾಚ್ ನಾ ಥಾಂಬ್ಪಿ ಟ್ರೆನೀ ಭಶೆನ್
ಜಲ್ಮಾಪಾಸುನೂಚ್ ಲಾಗ್ಲ್ಯಾತ್
ಚಕ್ರಾಂ
ಪಾಂಯಾಂಕ್ ತಾಂಚ್ಯಾ
ನವ್ ಮ್ಹಯ್ನೆ ನ್ಹಯ್ ಆತಾಂ
ಪಾಂಚ್ ಸ ಮ್ಹಯ್ನ್ಯಾಂತೂಚ್
ಸಂವ್ಸಾರಾಂತ್ ಯೆವ್ಪಾಕ್ ಧಡ್ಪಟ್ಟಾತ್
ತಿಂ ಮನ್ಶಾಂ
ಘರ್ ಸೊಡೂಚ್, ದೆವ್ಳಾಂತೂಯ್
ಸಾತ್ವಿಕತಾಯೆನ್ ವಚ್ನಾತ್ ಮನ್ಶಾಂ
ದರ್ಶನಾ ಖಾತೀರೂಯ್ ತಯಾರ್ ಆಸ್ತಾತ್
ತಾಂಚೆಖಾತೀರ್ ಶೊರ್ಟ್ ಕಟ್ ವಾಟೊ
ಸದ್ಚೆಂ ಶ್ಯೆಡ್ಯೂಲ್ ಡಿಸ್ಟರ್ಬ್ ಜಾಯ್ತ್ ಮ್ಹೂಣ್
ಪ್ರಸಾದಾವಿಣೆಂ ಫಾಟ್ಲ್ಯಾ ಫಾಟೀಂಚ್
ಪಳ್ಟಾತ್ ಹಿಂ ಮನ್ಶಾಂ
ರಸ್ತೊ ನಾಂವಾಚ್ಯಾ ಹ್ಯಾ
ಭಾಗ್ಯವಂತ್ ಸ್ಮಾರಕಾರ್ ಮರ್ತಾತ್ ಮನ್ಶಾಂ
ಮೆಂದು ತಾಂತ್ಯಾಂತಲೆ ಮಂಡೊಳೆ ಭಶೆನ್
ಭಾಯ್ರ್ ಸರ್ತಕಚ್ ಲೊಕ್ತುಬಾಯೆನ್
ನಿಯಾಳತಾತ್ ಮನ್ಶಾಂ
ಜಿತ್ಯಾ ಹಾಡಾಮಾಸಾಚಿಂ.....!
‘ಮೆಲೊ ಮರುಂ ಥಂಯ್ ಪಾಡ್ ಪಡುಂ’
ಮ್ಹುಣೀತ್ ಚಲ್ಪಾಕ್ ಲಾಗ್ತಾತ್
ಭಟೊ ಭಟೊ ಆಪ್ಲ್ಯೊಚ್ ವಾಟೊ
15 ಎಗಸ್ಟ್, 26 ಜಾನೆರಾಕೂಚ್
ಚುಕುನ ಲೆಗೀತ್ ಉಬಿಂ ರಾವ್ನಾತ್
ದೊನ್ ಮಿನ್ಟಾಂ ರೆಸ್ಪೆದಾನ್
ಗಾಯ್ನಾತ್ ರಾಷ್ಟ್ರಗೀತೂಯ್ ಆತ್ಮಿಯತಾಯೆನ್
ಬೆಜಾರೂನ್ ಆಡ್ಡತಾತ್ 54 ಸೆಕಂದ್
ಕಾನಾರ್ ಸಾದ್ತಾತ್
ಫಕತ್
ಸುಕೆ ಶಬ್ದ್
ಆನಿ ಉಪ್ರಾಂತ್
ಕಂಪಲ್ಶನಾಚ್ಯಾ ಜಂವ್ಜಾಳ್ಯಾಂತ್ಲ್ಯಾನ್
ಸಹಿಸಲಾಮತ್ ಸುಟಿಲ್ಲ್ಯಾಚೊ ಮೊಠ್ಠೊ ಸುಸ್ಕಾರೊ
ಇತ್ಲೆಂಚ್ ನ್ಹಯ್ ಮೊಗಾಳ್ ಕವಿತೆ
ಫುಡೆಂ ಆಯ್ಕ್ :
ಗೆಲೊಚ್ ಕೊಣೂಯ್ ಸಂವ್ಸಾರ್ ಸೊಡೂನ್ ಜಾಲ್ಯಾರ್
ಸದ್ದ್ಯಾ ಜಮ್ನಾ, ಲಿವ್ಹ್ ಮೆಳ್ನಾ
ಮಾತ್ಶೆಂ ಸಾಂಬಾಳೂನ್ ಘೆಯಾತ್
ಚಲ್ಯಾಚೊ ದೆರೆಪೆತ್ ಈಮೆಲ್
ಗಲ್ಫಾಂತ್ಲ್ಯಾನ್
‘ನಾ, ತಶೆಂ ಧಾ ಬಾರಾ ದೀಸ್ ಘರಾ ರಾವ್ಚೆಂ ಪಡ್ಟಲೆಂ
ಪೂಣ್, ಮದಿಂ ಯೆವ್ನ್ ವಚನ್ ಹಾಂವ್’
ಅರ್ಧಾಗಿಣೀಚೊ ಬೊಸಾಕ್ ಎಸ್ಸೆಮ್ಮೆಸ್
ಸುತ್ಕಾಚ್ಯಾ ಘರಾಂತ್ಲ್ಯಾನ್
ಕವಿತೆ,
ಅಶಿಂ ಹಿಂ ಆಪ್ ಮತ್ಲಬಿ ಮನ್ಶಾಂ
ತುಜೊ ನಿವಾಂತ್ ಆಲಾಶಿರೊ ಸೊಡೂನ್
ಎಕಾಮೆಕಾಕ್ ಘೆವ್ನ್ ಪಳ್ಪಾಕ್ ಲಾಗ್ಲ್ಯಾತ್
ಸಾಮುಹೀಕ್ ಜಳ್ಪಾಕ್ ಲಾಗ್ಲ್ಯಾಂತ್
ಸುವಾರ್ಥಾನ್ ಲೊಳ್ಪಾಕ್ ಲಾಗ್ಲ್ಯಾಂತ್
ದೆಖೂನ್ ಮೊಗಾಳ್ ಕವಿತೆ,
ತುಂ ಯೊ............
ಭಾಯ್ರ್ ಪಡಟ್ಲ್ಯಾ ಅಡಾಂಗ್ಯಾ ಪಾವ್ಸಾವರಿ
ಯೊ
ಆಮ್ಚೆಂ ಕಾಳೀಜ್ ಭಿಜೊವ್ಪಾಕ್ ಯೊ
ಆಮ್ಚ್ಯಾಂತ್ ಮನೀಸಪಣ್ ರೂಜೊವ್ಪಾಕ್ ಯೊ
-ಹನುಮಂತ್ ಚೊಪ್ಡೆಕಾರ್
संपादकीय:
व्हडल्या संसारांत ल्हान संसार बांधून आसचे मनीस
ह्या संसाराच्या मनशांक कितें जालां? येद्या व्हड संसारांत तांचे तांचे ल्हान सान संसार बांधून आसात ते. तांकां खंयच्याय बर्या कामाक फूरसतच ना जाल्या. रसत्यार एकलो मनीस पडोन आसा तर, ‘पाड पडों’ म्हणोन आपले वाटेन चलपी ह्या मनशांच्या मनांक माती खेल्या.
तरी, हें पुराय कवितेलागीं कित्याक सांगजाय? कित्याक म्हळ्यार कविता मात्र, ह्या कवितेंतल्या मनशाक सांगात दीवन आयल्या. ताच्या कष्टा-सुखांत लागीं रावल्या. तिचेविणें तो ना. सक्कड सांगात्यां प्रास कविता मात्र ताका व्हर्ती दाधोसकाय दीवन आसा.
-मेल्विन रोड्रीगस
कविता:
एक चीट मोगाळ कवितेक
मोगाळ कविते,
अशीं कशीं हीं मनशां
तुजी शितळ सावळी सोडून
धांवत सुटल्यात पिश्यावरी
केन्नाच न थांबपी ट्रेनीभशेन
जल्मापासुनूच लागल्यात
चक्रां
पांयांक तांच्या
णव म्हयने न्हय आतां
पांच स म्हयन्यांतूच
संवसारांत येवपाक धडपडटात
तीं मनशां
घर सोडूच देवळांतूय
सात्विकतायेन वचनात मनशां
दर्शना खातीरूय तयार आसतात
तांचेखातीर शॉर्ट कट वाटो
सदचें श्यॅड्यूल डिस्टर्ब जायत म्हूण
प्रसादाविणें फाटल्या फाटींच
पळटात हीं मनशां
रस्तो नांवाच्या ह्या
भाग्यवंत स्मारकार मरतात मनशां
मेंदू तांतयांतले मंडोळे भशेन
भायर सरतकच लोक्तुबायेन
नियाळतात मनशां
जित्या हाडामासाचीं.....!
‘मेलो मरूं थंय पाड पडूं’
म्हुणीत चलपाक लागतात
भटो भटो आपल्योच वाटो
15 ऑगस्ट, 26 जानेराकूच
चुकुनलेगीत उबीं रावनात
दोन मिनटां रेस्पेदान
गायनात राष्ट्रगीतूय आत्मियतायेन
बेजारून आड्डतात 54 सेंकद
कानार सादतात
फकत
सुके शब्द
आनी उपरांत
कम्पल्शनाच्या जंवजाळ्यांतल्यान
सहिसलामत सुटिल्ल्याचो मोठ्ठो सुस्कारो
इतलेंच न्हय मोगाळ कविते
फुडें आयक :
गेलोच कोणूय संवसार सोडून जाल्यार
सद्द्या जमना, लिव्ह मेळना
मात्शें सांबाळून घेयात
चल्याचो देरेपॅत ईमेल
गल्फांतल्यान
‘ना, तशें धा बारा दीस घरा रावचें पडटलें
पूण, मदीं येवन वचन हांव’
अर्धागिणीचो बॉसाक एसएमएस
सुतकाच्या घरांतल्यान
कविते,
अशीं हीं आपमतलबी मनशां
तुजो निवांत आलाशिरो सोडून
एकामेकाक घेवन पळपाक लागल्यात
सामुहीक जळपाक लागल्यांत
सुवार्थान लोळपाक लागल्यांत
देखून मोगाळ कविते,
तूं यो............
भायर पडटल्या अडांग्या पावसावरी
यो
आमचें काळीज भिजोवपाक यो
आमच्यांत मनीसपण रूजोवपाक यो
-हनुमंत चोपडेकार