ಹಾಂವ್ ಮ್ಹೆಳ್ಯಾ ವೊಂಟಾಂಚೊ

ಸಂಪಾದಕೀಯ್:

ವೋಂಟ್ ಮ್ಹೆಳ್ಳ್ಯಾತ್, ಘಾಸುನ್ ನಿತಳ್ ಕರುಂಕ್ ಯೆಂವ್ಚೆಂ ನಾಕಾ!

ಹೆಂ ಕಿತೆಂ ವೋಂಟ್ ಮ್ಹೆಳ್ಳ್ಯಾತ್? ವೋಂಟ್ ಕಶೆ ಮ್ಹೆಳ್ಟಾತ್? ಕಾಂಯ್ ಚೋರ್ನ್ ಖೆಲಾಂ? ಕೊಣಾಚಿ ಪರ್ವಣ್ಗಿ ನಾಸ್ತಾಂ ಪೊಲ್ಯಾಂಚೆರ್ ಯಾ ಹೆರ್ ಖಂಯ್ ಉಮೆ ವೊತ್ಲ್ಯಾತ್? ಪಿಯೆನಾ ಮ್ಹಳ್ಳೊ ಸೊರೊ ಪಿಯೆಲಾ? ಬುರ್ಶೆಂ ಲೆಂವ್ಲಾಂ ಯಾ ಚಿಂವ್ಲಾಂ? ಕಾಂಯ್ ಹ್ಯಾ ವೊಂಟಾಂ ಥಾವ್ನ್ ದುಖಂವ್ಚಿಂ ಉತ್ರಾಂ ಭಾಯ್ರ್ ಪಡ್ಲ್ಯಾಂತ್? ಕಿತೇಂಯ್ ಜಾಂವ್, ಕವಿಚೆ ವೋಂಟ್ ಮ್ಹೆಳ್ಳ್ಯಾತ್!

ಆತಾಂ ತಾಣೆಂ ಮೊನ್ಕೊ ಘೊಟ್ಲಾ. ಕೊಣಾಯ್ ಲಾಗಿಂ ತೋಂಡ್ ಉಘಡ್ಚ್ಯಾ ಪ್ರಾಸ್, ಮೌನಾಚ್ಯಾ ಕೊಪಾಂತ್ಲೆಂ ಪಿಯೆಂವ್ಚೆಂ ಕಿತ್ಲೆಂಕೀ ಬರೆಂ ಮ್ಹಣೊನ್ ತಾಚಿ ಸಮ್ಜಣಿ ತಾಚ್ಯಾ ಎಕಾ ಅನ್ಭೋಗಾಂತ್ಲ್ಯಾನ್ ತಾಣೆಂ ಜೊಡ್ಲ್ಯಾ. ಕೊಣಾಯ್ಚಿ ಫುಸ್ಲಾವ್ಣಿ ಹಾಂಗಾ ಚಲನಾ. ಕೊಣೇಂಯ್ ಆಪ್ಣಾಕ್ ಧೊಸ್ಚೆಂ ನಾಕಾ ಮ್ಹಣ್ ತೊ ಚೇತಾವ್ಣಿ ದಿತಾ.

ಮಾಗೀರ್ ಮನ್ಶಾಚೆಂ ವೆಕ್ತಿತ್ವ್ ಏಕ್ ರೂಪ್ ಜೊಡ್ತಾ ಅಶೆಂಚ್ ನ್ಹಯ್?

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಹಾಂವ್ ಮ್ಹೆಳ್ಯಾ ವೊಂಟಾಂಚೊ

ಪರತ್ ಮ್ಹಾಕಾ ಉಲಂವ್ಕ್ ಲಾಯ್ನಾಕಾ
     ಹಾಂವ್ ಮ್ಹೆಳ್ಯಾ ವೊಂಟಾಂಚೊ

ಮೌನ್‍ಚ್ ಮ್ಹಜಿ ಸಾಂಗಾತಿಣ್, ಪುಣ್ ಮೊನಿ ನ್ಹಯ್
     ತುಕಾ ಸಾಧ್ಯ್ ತರ್ ತಿಕಾ ಭೆಟ್, ಮ್ಹಾಕಾ ಧೊಶಿನಾಕಾ
          ಮ್ಹಾಕಾ ಪರತ್ ಉಲಂವ್ಕ್ ಲಾಯ್ನಾಕಾ
               ಹಾಂವ್ ಮ್ಹೆಳ್ಯಾ ವೊಂಟಾಂಚೊ

ಮಾಜ್ರಾ ಪಿಲಾಂಕ್ ಕಿತ್ಲೆಂ ಗೊಪಾಂತ್ ಆರಾಯ್ಲ್ಯಾರಿ
     ಮಾಸ್ಳೆ ಕಾಂಟೊ ದೆಖ್ಲ್ಯಾರ್ ಉಡೊನ್ ಧಾಂವ್ತಾತ್
          ಶಿತ್ ಚಿಲ್ಲುನ್ ಕಾಂಟೊ ರುಚಿನ್ ಚಿಂವ್ತಾತ್
               ತುಂ ಪುಸ್ಲಾಂವ್ಕ್ ಪರತ್ ಯೇನಾಕಾ
                    ಹಾಂವ್ ಮ್ಹೆಳ್ಯಾ ವೊಂಟಾಂಚೊ

ದಾರಾಕ್ ಮ್ಹಜ್ಯಾ ಉತ್ರಾಂ ತೊರ್‍ಣಾಂ ಸುಂರ್ಗಾರ್,
     ಜಸೊ ಮರ್‍ಣಾಪೆಟೆಕ್ ಫುಲಾಂಚೊ
          ಫಾಲ್ಯಾಂಚೊ ದೀಸ್ ನ್ಹಯ್ ತಾಂಚೊ
               ತುಂ ಪರತ್ ಕುಟ್ಟುನ್ ಉಲಯ್ನಾಕಾ
                    ಹಾಂವ್ ಮ್ಹೆಳ್ಯಾ ವೊಂಟಾಂಚೊ

ಮ್ಹಾಕಾ ಮೌನಾಚ್ಯಾ ಕೊಪಾಂತ್ಲೆಂ ಪಿಯೆಂವ್ಕ್ ಸೊಡ್
     ಆಮಾಲಿ ಕಾಂಯ್ ಜಾಂವ್ಚೊ ನಾಂ
          ಗರ್ಜ್ ಪಡ್ಲಿ, ತುರ್‍ತ್ ಉಡಾಸ್ ಕಾಡ್
               ಮೌನ್‌ಪಣಿಂ ಮಾಗುನ್ ಧಾಡ್ತಾಂ
                    ವೆವ್ಹಾರ್ ನ್ಹಯ್ ಹೊ ವೊಂಟಾಂಚೊ.

-ಜೊ. ಸಿ. ಸಿದ್ದಕಟ್ಟೆ, ಕಾರ್‍ಮೆಲಿತ್　

-जो. सी. सिद्दकट्टे, कार‍मेलीत