ಸಂಪಾದಕೀಯ್:
ದುಖಾಂ ಗಳೊಂವ್ಚಿ ಪ್ರಕೃತಿ
ಪೃಥ್ವೆಕ್ ಮನ್ಶಾರೂಪ್ ದೀವ್ನ್ ಮನ್ಶಾಕುಳಾಲಾಗಿಂ ಉಲಯ್ಶೆಂ ಕೆಲಾಂ ಹಾಂಗಾಸರ್. ಪ್ರಕೃತೆಕ್ ಲಗ್ತಿ ಜಾಲ್ಲಿ ಏಕ್ ಗಜಾಲ್ ಹಾಂಗಾಸರ್ ಆಸಾ. ಪೃಥ್ವಿ ನಾಸ್ ಕರ್ಚೊ ಮನೀಸ್ ಹಾಂಗಾಸರ್ ಅಪ್ರಾಧಿ ಕಸೊ ಝಳ್ಕತಾ ತರೀ, ತಾಚ್ಯಾ ಬಳಾಮುಕಾರ್ ಪ್ರಕೃತಿ ಸಂಪೂರ್ಣ್ ರಿತಿನ್ ಸಲ್ವಲ್ಯಾ ಮ್ಹಳ್ಳಿ ದಿಸ್ತಾ.
ಇತ್ಲೆಂ ಪಾವನಾತಲ್ಲ್ಯಾಕ್ ಹ್ಯಾ ಗಾಂವಾಂತ್ ಏಕ್ ಸ್ಥಾವರ್ ಉಬೆಂ ಜಾಲಾಂ. ಜಳೊವಾಖಾತೀರ್ ಹೆ ಪ್ರಕೃತೆಚೊ ಮೊಟ್ಯಾ ಮಾಪಾನ್ ನಾಸ್ ಜಾತೇ ಆಸಾ. ಏಕ್ ಆವಯ್ ಆಪ್ಲ್ಯಾ ಭುರ್ಗ್ಯಾಖಾತೀರ್ ತಳ್ಮಳ್ಚೆಬರಿ, ಹಾಂಗಾಸರ್ ಪ್ರಕೃತಿ ಆಪ್ಲ್ಯಾ ಮನ್ಶಾಂ ಖಾತೀರ್ ದುಖಾಂ ಗಳಯ್ತಾ.
ಮೆಲ್ವಿನ್ ಕೊಳಾಲ್‌ಗಿರಿ ಪಯ್ಲೆ ಪಾವ್ಟಿಂ ಕವಿತಾ ಕುಳಾರಾಂತ್ ವಿಶೆವ್ ಘೆಂವ್ಕ್ ಆಯ್ಲಾ. ತಾಕಾ ಆಮಿ ವೇಂಗ್ ಮಾರುನ್ ಹುನೊನಿ ಯೆವ್ಕಾರ್ ದಿತಾಂವ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಪೃಥ್ವೆಚಿಂ ಸವಾಲಾಂ
ಮ್ಹಜಿ ಹಾಡಾಂ ಮೊಡುನ್
ಮ್ಹಾಕಾ ವಿದ್ರೂಪ್ ಕರುಂಕ್
ಮನ್ಶಾ
ತುಂ ಕಿತ್ಯಾಕ್ ಮುಖಾರ್ ಸರ‍್ಲಾಯ್?
ಮ್ಹಜ್ಯಾ ಹರ್ಧ್ಯಾರ್ ಬಸೊನ್
ಮ್ಹಾಕಾಚ್ ಹುಲ್ಪಾವ್ನ್ ನಾಸ್ ಕರುಂಕ್
ಮನ್ಶಾ
ತುಂವೆಂ ಕಿತ್ಯಾಕ್ ಯೋಜನ್ ಘಾಲಾಂಯ್?
ತುಂ ಆನಿ ಹಾಂವ್
ತ್ಯಾ ಎಕಾಚ್ ರಚ್ನಾರಾಚಿ ರಚ್ನಾ ನ್ಹಯ್ಗಿ?
ತುಕಾ ಮ್ಹಜ್ಯಾ ಗೊಪಾಂತ್ ಲಿಪೊವ್ನ್
ಮ್ಹಜಿ ಮೊಗಾಚಿ ಊಬ್ ದೀವ್ನ್
ತುಕಾ ಹಾಂವೆಂ ಪೊಸ್ಲೆಂ ನ್ಹಯ್ಗಿ?
ಮ್ಹಜ್ಯಾ ಅಮಾಯ್ಪಣಾಂತ್ ಕಿತೆಂ ಉಣೆಂ ಜಾಲೆಂ ತುಕಾ?
ಸರ್ವಸ್ವ್ ತುಕಾ ದಿಲ್ಲ್ಯಾ ಮ್ಹಾಕಾ
ಆಜ್ ಉಜೊ ಘಾಲ್ನ್ ಹುಲ್ಪಾಂವ್ಕ್
ಕಿತ್ಯಾಕ್ ಭಾಯ್ರ್ ಸರ‍್ಲಾಯ್?
ವಾರೆಂ-ವಾದಾಳ್ ಯೆತಾನಾ
ಘಡ್ಗಡೊ-ಝಗ್ಲಾಣೆಂ ಆಪ್ಟತಾನಾ
ತುಕಾ ಹಾಂವೆಂ ರಾಕ್ಲೆಂ ನ್ಹಯ್ಗಿ?
ಭುಕೆವ್ನ್ ಖಾಣಾಕ್ ಅತ್ರೆಗ್ತಾನಾ
ಭಲಾಯ್ಕಿ ಅಸ್ಕತ್ ಜಾತಾನಾ
ತುಕಾ ಹಾಂವೆಂ ಸಾಂಬಾಳ್ಳೆಂ ನ್ಹಯ್ಗಿ?
ಮ್ಹಜೆ ಜತ್ನೆಂತ್ ಕಿತೆಂ ಉಣೆಂ ಜಾಲೆಂ ತುಕಾ?
ಜೀವ್‌ಚ್ ತುಕಾ ದಿಲ್ಲ್ಯಾ ಮ್ಹಾಕಾ
ಆಜ್ ಉಜೊ ಘಾಲ್ನ್ ಹುಲ್ಪಾಂವ್ಕ್
ಕಿತ್ಯಾಕ್ ಭಾಯ್ರ್ ಸರ‍್ಲಾಯ್?
ಮ್ಹಾಕಾಚ್ ತುಂವೆಂ ವಾಂಟೆ ಕರುನ್
ಲಾಕಾ-ಲಾಕಾಂನಿ ವಿಕುನ್
ತುಂ ಗಿರೇಸ್ತ್ ಜಾಲೊಯ್ ನ್ಹಯ್ಗಿ?
ಮ್ಹಜಿ ಪಾಚ್ವಿ ಸೊಭಾಯ್ ಕಾತರ್ನ್
ಮಾತಿಯೆ ಭಿತರ‍್ಲೆಂ ಭಂಡಾರ್ ಉಸ್ತುನ್
ಸಂಸಾರಾಕ್ ತುಂ ರಾಯ್ ಜಾಲೊಯ್ ನ್ಹಯ್ಗಿ?
ಮ್ಹಜ್ಯಾ ಸಾಕ್ರಿಫಿಸಾಂತ್ ಕಿತೆಂ ಉಣೆಂ ಜಾಲೆಂ ತುಕಾ?
ಹಾಂವ್‌ಚ್ ತುಜಿಂ ಜಾಲ್ಲ್ಯಾ ಮ್ಹಾಕಾ
ಆಜ್ ಉಜೊ ಘಾಲ್ನ್ ಹುಲ್ಪಾಂವ್ಕ್
ಕಿತ್ಯಾಕ್ ಭಾಯ್ರ್ ಸರ‍್ಲಾಯ್?
ರಗ್ತಾಚ್ಯೊ ಝರಿ ವ್ಹಾರೊವ್ನ್
ಪೆಲ್ಯಾಚೊ ಜೀವ್ ಫುಟೊವ್ನ್
ಜಿಯೆಲೊಯ್ ತುಂ ಮ್ಹಜ್ಯಾ ಗೊಪಾಂತ್
ಜಾತ್, ಮತ್ ಮ್ಹಣ್ ಬೊಬಾಟ್ ಮಾರುನ್
ಕೆಲೊ ತುಂವೆಂ ಆಮ್ಚ್ಯಾ ರಚ್ನಾರಾಕ್ ಅಕ್ಮಾನ್
ಮ್ಹಜೆ ಸೊಸ್ಣಿಕಾಯೆಂತ್ ಕಿತೆಂ ಉಣೆಂ ಜಾಲೆಂ ತುಕಾ?
ಹೆಂ ಸಗ್ಳೆಂ ಪಳೆವ್ನ್ ಥಂಡ್ ಆಸಲ್ಲ್ಯಾ ಮ್ಹಜೆರ್
ಆಜ್ ಉಜೊ ಘಾಲ್ನ್ ಹುಲ್ಪಾಂವ್ಚೊ ಸ್ಥಾವರ್ ಬಾಂಧುಂಕ್
ಕಿತ್ಯಾಕ್ ತುಂ ಮುಖಾರ್ ಸರ‍್ಲಾಯ್?
ಮ್ಹಜ್ಯಾ ಸವಾಲಾಂಕ್ ಜಾಪ್ ದಿಶಿಗಿ
ಹೇ ಮನ್ಶಾ?
-
ಮೆಲ್ವಿನ್, ಕೊಳಾಲ್‌ಗಿರಿ
संपादकीय:
दुखां गळोंवची प्रकृती
पृथ्वेक मनशारूप दीवन मनशाकुळालागीं उलयशें केलां हांगासर. प्रकृतेक लगती जाल्ली एक गजाल हांगासर आसा. पृथ्वी नास करचो मनीस हांगासर अप्राधी कसो झळकता तरी, ताच्या बळामुकार प्रकृती संपूर्ण रितीन सलवल्या म्हळ्ळी दिसता.
इतलें पावनातल्ल्याक ह्या गांवांत एक स्थावर उबें जालां. जळोवाखातीर हे प्रकृतेचो मोट्या मापान नास जाते आसा. एक आवय आपल्या भुरग्यां खातीर तळमळचेबरी, हांगासर प्रकृती आपल्या मनशां खातीर दुखां गळयता.
मेल्विन कोळालगिरी पयले पावटीं कविता कुळारांत विशेव घेवंक आयला. ताका आमी वेंग मारून हुनोनी येवकार दितांव.
-मेल्विन रोड्रिगस
कविता:
पृथवेचीं सवालां
म्हजी हाडां मोडून
म्हाका विद्रूप करुंक
मनशा
तूं कित्याक मुखार सरलाय?
म्हज्या हरध्यार बसोन
म्हाकाच हुलपावन नास करुंक
मनशा
तुंवें कित्याक योजन घालांय?
तूं आनी हांव
त्या एकाच रचनाराची रचना न्हयगी?
तुका म्हज्या गोपांत लिपोवन
म्हजी मोगाची ऊब दीवन
तुका हांवें पोसलें न्हयगी?
म्हज्या अमायपणांत कितें उणें जालें तुका?
सर्वस्व तुका दिल्ल्या म्हाका
आज उजो घालन हुल्पावंक
कित्याक भायर सरलाय ?
वारें-वादाळ येताना
घडगडो-झगलाणें आपटताना
तुका हांवें राकलें न्हयगी?
भुकेवन खाणाक अत्रेगताना
भलायकी अस्कत जाताना
तुका हांवें सांबाळ्ळें न्हयगी?
म्हजे जतनेंत कितें उणें जालें तुका?
जीवच तुका दिल्ल्या म्हाका
आज उजो घालन हुल्पावंक
कित्याक भायर सरलाय?
म्हाकाच तुंवें वांटे करून
लाका-लाकांनी विकून
तूं गिरेस्त जालोय न्हयगी?
म्हजी पाचवी सोभाय कातर्न
मातिये भितरलें भंडार उसतून
संसाराक तूं राय जालोय न्हयगी?
म्हज्या साक्रिफिसांत कितें उणें जालें तुका?
हांवच तुजीं जाल्ल्या म्हाका
आज उजो घालन हुल्पावंक
कित्याक भायर सरलाय ?
रगताच्यो झरी व्हारोवन
पेल्याचो जीव फुटोवन
जियेलोय तूं म्हज्या गोपांत
जात, मत म्हण बोबाट मारून
केलो तुंवें आमच्या रचनाराक आकमान
म्हजे सोसणिकायेंत कितें उणें जालें तुका?
हें सगळें पळेवन थंड आसल्ल्या म्हजेर
आज उजो घालन हुल्पांवचो स्थावर बांधुंक
कित्याक तूं मुखार सरलाय ?
म्हज्या सवालांक जाप दिशिगी
हे मनशा?
-मेल्विन, कोळालगिरी