ಸಂಪಾದಕೀಯ್:

ಆಪ್ಣಾವಿಶಿಂ ಸೊಧುನ್ ಕಾಡುಂಕ್ ಸಕನಾತಲ್ಲೊ ಮನೀಸ್

ಮನ್ಶಾಚೆಂ ಜಿವಿತ್ ಮಿಸ್ತೆರಾಂಚೆಂ. ಹ್ಯಾ ಜಗಾಂತ್ ಥೊಡಿಶಿಂ ವರ್ಸಾಂ ತೊ ಜಿಯೆತಾ ತರೀ ಸಂಸಾರಾವಿಶಿಂ ಸೊಡ್ಯಾಂ, ಆಪ್ಣಾವಿಶಿಂಚ್ ಸಮ್ಜೊಂಕ್ ಸಕನಾ. ಜಾಯ್ತೆ ಪಾವ್ಟಿಂ ಆಪ್ಣಾವಿಶಿಂ, ಆಪ್ಣಾಚ್ಯಾ ಅಸ್ಥಿತ್ವಾವಿಶಿಂ ಚಿಂತಿಜಾಯ್, ಸವಾಲಾಂ ವಿಚಾರಿಜಾಯ್ ಮ್ಹಳ್ಳೇಂಯ್ ತಾಕಾ ಭೊಗನಾ.

ಹೆ ಕವಿತೆಂತ್ಲ್ಯಾ ಮನ್ಶಾಚಿ ಗತ್ ಜಾಲ್ಯಾರಿ ತಿಚ್. ಆಪ್ಲೆ ಜಿಣ್ಯೆಚೆ ಮಿಸ್ತೆರ್ ಸಮ್ಜೊಂಕ್ ಸಕನಾಸ್ತಾಂ ತೊ ದೆದೆಸ್ಪೊರ್ ಜಾಲಾ. ಪುಣ್ ತಾಣೆಂ ತಾಚಿಂ ಸೊಧ್ನಾಂ ರಾವಂವ್ಕ್ ನಾಂತ್.

ಪ್ರಸನ್ನ್ ನಿಡ್ಡೋಡಿ ಕವಿತಾ ಶೆತಾಂತ್ ಆಪ್ಲಿಚ್ ಆಪುರ್ಬಾಯೆಚಿ ಮ್ಹೊರ್ ದಾಂಬೂನ್ ಆಸಾ ಮ್ಹಳ್ಳ್ಯಾಕ್ ಆಯ್ಲೆವಾರ್ ಪರ್ಗಟ್ ಜಾಲ್ಲ್ಯೊ ತಾಚ್ಯೊ ಕವಿತಾ ಸಾಕ್ಸ್.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಜಿಣ್ಯೆ ಮಿಸ್ತೆರ್......!

ಹಾಂವ್ ಸೊದ್ತಾಂ
ಮ್ಹಾಕಾಚ್, ವರ್ಸಾಂ ಥಾವ್ನ್......
ಆಜೂನ್ ಸೊದ್ತಾಂ
ಮ್ಹಜ್ಯಾ ವ್ಯಕ್ತಿತ್ವಾಚಿಂ ನೆಮಾಂ
ಹಾಂವ್ ಆಜೂನ್ ನೆಣಾಂ

ಶರೀರ್ ಉಬೆಂ ಭಾರ್ಕಾಯೆಚ್ಯಾ ದೊರ‍್ಯಾರ್
ಪಲ್ತಡಿ ದೀಶ್ಟ್ ವಚನಾ
ಪರತ್ ಪರತ್ ದೀಶ್ಟ್ ಲಾಂವ್ಕ್ ಉರ್ಡತಾಂ
ಕಾಳೊಕಾ ಭುಂಯಾರಾಂತ್ ಶಿರ್ಕತಾಂ...

ವರ್ಸಾನ್ ವರಸ್ ಹಾಂವ್
ರಾವಣಾಕ್ ಜಳಯ್ತಾಂ
ಜೆಜುಕ್ ಖುರ್ಸಾಯ್ತಾಂ
ಗಣ್ಪತಿಚೆಂ ವಿಸರ್ಜನ್ ಕರ‍್ತಾಂ
ರಮ್ಝಾನಾಕ್ ಉಪಾಸ್ ಧರ‍್ತಾಂ
ತರೀ.......
ಪರತ್ ಪರತ್ ತೆ ಯೆತಾತ್
ಮತಿ ಪಡ್ದ್ಯಾರ್ ಚಿತ್ರಾಂ ಸೊಡಯ್ತಾತ್....!

ವರ್ಸಾಂ ಸಂಪ್ಲಿಂ.....
ಕಿತ್ಯಾಕ್ ಗಿ ಕಳನಾ-ಮ್ಹಜ್ಯಾ ಭಿತರ‍್ಲೊ
ರಾವಣ್ ಜಳಾಚ್ ನಾ
ಜೆಜು ಜಲ್ಮಾಚ್ ನಾ
ಗಣ್ಪತಿ ಬುಡಾಚ್ ನಾ
ಚಂದ್ರೆಮ್ ದಿಸಾಚ್ ನಾ
ಚಾರ್ ಚವ್ಗಾಂ ಮಧೆಂ
ಮತಿ ಪಡ್ದ್ಯಾಚ್ಯಾ ಬ್ರೆಕೆಟಿ ಆವಾರಾಂತ್
ಆಜೂನ್ ಸೊದ್ತಾಂ, ಮ್ಹಾಕಾಚ್ ...
ಪರತ್ ಪರತ್ ಸೊದ್ತಾಂ.........!!!!