ಸಂಪಾದಕೀಯ್:
ಅರ್ಥ್ ನಾತಲ್ಲ್ಯಾ ಸಂಬಂಧಾಂಚೆಂ ಘರ್ ಬಾಂದ್ತಾನಾ
ಏಕ್ ಕೊನ್ಸೊ ಘೊವಾಚೊ, ಏಕ್ ಕೊನ್ಸೊ ಬಾಯ್ಲೆಚೊ, ಏಕ್ ಕೊನ್ಸೊ ಭುರ್ಗ್ಯಾಂಚೊ. ತಿತ್ಲ್ಯಾರ್ ಸಂಪದ್ಲೆಂ. ಆವಯ್ ಬಾಪಯ್ಕ್ ಜಾಗೊ ನಾ. ತಾಂಣಿ ಸ್ವಾಸ್ ಸಾಂಬಾಳುನ್ ಜಾಗೊ ಸೊಧಿಜಾಯ್. ಫಕತ್ ಆಶ್ರಮ್ ತಾಂಕಾಂ ಗತ್.
ಮನ್ಶಾಕ್ ಆಜ್ ಮೊಲ್ ನಾ. ಸಂಬಂಧಾಂಕ್ ಆಜ್ ಅರ್ಥ್ ನಾ. ಹ್ಯಾ ಮೊಲಾಂಚಿ, ಹ್ಯಾ ಅರ್ಥಾಂಚಿ ಸಮ್ಜಣಿ ಆಸಲ್ಲೊ ಕವಿ, ಪ್ರಾಯ್ವಂತಾಂಕ್ ಆಪ್ಣಾಕ್ ದಿಯಾ ಮ್ಹಣ್ತಾ. ವೃದ್ಧಾಶ್ರಮಾಚಿ ವಣದ್ ಬಾಂದುಂಕ್ ಜಾಯ್ ತಾಕಾ.
ರಾಜಯ್ ಪವಾರಾಚಿ ಸೊಭಿತ್ ಕವಿತಾ ಹಾಂಗಾಸರ್ ತುಮ್ಚೆಖಾತೀರ್ ದಿಲ್ಯಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಚವ್ತೊ ಕೊನ್ಸೊ ಘರಾಚೊ
ದರೆಕ್ಲ್ಯಾನ್ ಹಾಂಗಾ
ಘೊವ್-ಬಾಯ್ಲ್-ಭುರ್ಗಿಂ
ಹಾಂಚೆಚ್ ತ್ರಿಕೋನ್ ರಚ್ಲ್ಯಾತ್
ಆನಿ ಘರಾಂತ್ಲ್ಯಾ ಜಾಣ್ತ್ಯಾಂಕ್
ಚವ್ತ್ಯಾ ಕೊನ್ಶಾಕ್ ಉಡಯ್ಲ್ಯಾತ್
ಖರೆಂ ಘರ್ ತ್ರಿಕೋನಿ ನ್ಹಯ್ -
ತೆಂ ಚವ್ಕೋನಿ ಆಸ್ತಾ
ಪೂಣ್,,, ಆತಾಂ
ತ್ರಿಕೋನಿ ಘರಾಂ ರಚ್ಪಾಚಿ ಕಲಾ
ಜಾಯ್ತ್ಯಾ ಜಣಾಂಕ್ ಜಮ್‌ಪಾಕ್ ಲಾಗ್ಲ್ಯಾ
ತುಮಿ ಚವ್ತ್ಯಾ ಕೊನ್ಶಾಕ್ ಉಡಯಿಲ್ಲೆ
ಸಗ್ಳೆ ಜಾಣ್ಟೆಲೆ ದಿಯಾತ್ ಮ್ಹಾಕಾ
ಹಾಂವ್ ವ್ಹರ್ತಾಂ ತಾಂಕಾಂ
ಪೂಣ್, ಏಕ್ ಸಾಂಗ್ತಾಂ....
..... ತುಮ್ಚ್ಯಾ ಭುರ್ಗ್ಯಾಂಕ್
ನ್ಹೀದ್ ಪಡ್ಚಿನಾ
ತೆನ್ನಾಂ ಮಾತ್, ಹ್ಯಾ ಜಾಣ್ತ್ಯಾಂಕ್
ಸೊಧುಂಕ್ ಯೇನಾಕಾತ್ ಮ್ಹಜೆಕಡೆನ್
ಹಾಂವ್ ಎಕ್ಲ್ಯಾಕಯ್
ತುಮ್ಚೆ ಸುವಾದೀನ್ ಕರ್‍ಚೊ ನಾ.
ತ್ಯಾ ಜಾಣ್ತ್ಯಾಂಚೆಂ
ಕಿತೆಂ ಕರ್‍ತಲೊಂ ಮ್ಹಣ್ ವಿಚಾರ್‍ತಾತ್?
ಹಾಂವ್ ತಾಂಕಾಂ
ಚಿರೆ ಕಶೆ ದಾಳ್ಟಲೊಂ
ಎಕಾಚೆರ್ ಏಕ್
ಆನಿ ಉಬಾರ್‍ತಲೊಂ
ಏಕ್ ವ್ಹಡ್ಲೊ ವೃದ್ಧಾಶೃಮ್!
ಕಿತ್ಯಾ ಖಾತೀರ್?
ತುಮ್ಚಿಂಚ್ ಭುರ್ಗಿಂ
ತ್ರಿಕೋನಿ ಘರಾಂ ರಚ್ತಲಿಂ
ತೆನ್ನಾಂ
ತುಮ್ಕಾಂ ಯೇವ್ನ್ ರಾಂವ್ಚೆಂ ಖಾತೀರ್!
-ರಾಜಯ್ ಪವಾರ್
संपादकीय:
अर्थ नातल्ल्या संबंधांचें घर बांदताना
एक कोन्सो घोवाचो, एक कोन्सो बायलेचो, एक कोन्सो भुरग्यांच्यो. तितल्यार संपदलें. आवय बापायक जागो ना. तांणी स्वास सांबाळून जागो सोधिजाय. फकत आश्रम तांकां गत.
मनशाक आज मोल ना. संबंधांक आज अर्थ ना. ह्या मोलांची, ह्या अर्थांची समजणी आसल्लो कवी, प्रायवंतांक आपणाक दिया म्हणता. वृद्धाश्रमाची वणद बांदुंक जाय ताका.
राजय पवाराची सोभीत कविता हांगासर तुमचेखातीर दिल्या.
-मेल्विन रोड्रीगस
कविता:
चवतो कोन्सो घराचो
दरेकल्यान हांगा
घोव-बायल-भुर्गीं
हांचेच त्रिकोन रचल्यात
आनी घरांतल्या जाणत्यांक
चवत्या कोनशाक उडयल्यात
खरें घर त्रिकोनी न्हय -
तें चवकोनी आसता
पूण,,, आतां
त्रिकोनी घरां रचपाची कला
जायत्या जणांक जमपाक लागल्या
तुमी चवत्या कोनशाक उडयिल्ले
सगळे जाणटेले दियात म्हाका
हांव व्हर्तां तांकां
पूण, एक सांग्तां....
..... तुमच्या भुर्ग्यांक
न्हीद पडचिना
तेन्नां मात, ह्या जाणत्यांक
सोधुंक येनाकात म्हजेकडेन
हांव एकल्याकय
तुमचे सुवादीन करचो ना.
त्या जाणत्यांचें
कितें करतलों म्हण विचारतात?
हांव तांकां
चिरे कशे दाळटलों
एकाचेर एक
आनी उबारतलों
एक व्हडलो वृद्धाशृम!
कित्या खातीर?
तुमचिंच भुर्गीं
त्रिकोनी घरां रचतलीं
तेन्नां
तुमकां येवन रांवचें खातीर!
-राजय पवार