ಸಂಪಾದಕೀಯ್:

ಭುರ್ಗ್ಯಾಂಚೊ ಸಂಸಾರ್ ಅಸೊ ಆಸ್ಲ್ಯಾರ್ ಕಿತ್ಲೊ ಬರೊ.

ದೆವಾಧಿನ್ ಚಾರ್ಲ್ಸ್ ಆನಿ ತೆರೆಜಾ ರೊಡ್ರಿಗಸ್ ಸ್ಮಾರಕ್ ಸಾತ್ವ್ಯಾ ಅಖಿಲ್ ಭಾರತ್ ಕೊಂಕಣಿ ಕವಿತಾ ವಾಚನ್ ಸರ್ತೆಂತ್ ತಿಸ್ರೆಂ ಇನಾಮ್ ದೊಗಾಂಕ್ ವಾಂಟುನ್ ಗೆಲ್ಲೆಂ. ತಾಂತುಂ ಎಕ್ಲೆಂ ದೇವಶ್ರೀ ಎಸ್. ಕಾಮತ್. ಗೊಂಯ್ಚ್ಯಾ ಇಮ್ಮಾಕುಲೇಟ್ ಗರ್ಲ್ಸ್ ಹೈಸ್ಕೂಲಾಂತ್ ನೊವೆಂತ್ ಶಿಕ್ತಾ.

ದೇವಶ್ರೀನ್ ಭುರ್ಗ್ಯಾಂನಿ ಪಸಂದ್ ಕರ‍್ಚ್ಯಾ ಚೊಕ್ಲೆಟಿಂಚ್ಯಾ ಸಂಸಾರಾಕ್ ಆಪ್ಲೆ ಕವಿತೆ ಮಾರಿಫಾತ್ ಆಮ್ಕಾಂ ಆಪೊವ್ನ್ ವೆಲಾಂ. ಚೊಕ್ಲೆಟಿಚ್ಯಾ ಸಂಸಾರಾಚಿ ತಿಚಿ ಕಲ್ಪನಾಚ್ ವೊರಯ್ಣಾರಾಂಕ್ ಪಸಂದ್ ಜಾಲ್ಲಿ. ಮಾಗೀರ್ ಸುಂದರ್ ರಿತಿನ್ ಹಿ ಕವಿತಾ ತಿಣೆಂ ಮಾಂಡುನ್ ಹಾಡ್ಲ್ಯಾ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಚೊಕ್ಲೆಟಿಂಚೊ ಗಾಂವ್

ಕಾಲ್ ರಾತಿ ಸಪ್ಣಾಂತ್ ಮ್ಹಜ್ಯಾ ಆಯ್ಲೊ ಏಕ್ ಗಾಂವ್
ಕಿತ್ಲೆಂ ಸೊಬಿತ್ ಸುಂದರ್‌ಗೆ ಆಸ್ಲೆಂ ತಾಚೆಂ ನಾಂವ್

'ಚೊಕ್ಲೆಟಿಂಚ್ಯಾ' ಗಾಂವಾಂತ್ ನಾಸ್ಲಿ ಏಕೂಯ್ ಶಾಳಾ
ಜಾಯ್ ತಿತ್ಲೆಂ ನಾಚಾತ್, ಗಾಯಾತ್, ಜಾಯ್ ತಿತ್ಲೆಂ ಖೆಳಾತ್

ಝಾಡಾಂ ಪೆಡಾಂ ಆಸ್ಲಿಂ ಸಗ್ಳಿಂ ಪಾಚ್ವಿಂಚಾರ್
ಪುಣ್ ಚೊಕ್ಲೆಟಿಚಿಂ ಪಾನಾಂ, ಪುಲಾಂ, ಸಗ್ಳ್ಯಾ ರುಕಾ ಖಾಂದ್ಯಾರ್

ಭುರೂಭುರು ಪಡ್ಪಿ ಪಾವ್ಸ್ ಆಸ್ಲೊ ಸಾಂಗಾ ಕಸ್ಲೊ?
ಭಾರೀಕ್ ಧಾರ್, ಮೊಟಿ ಧಾರ್.. ಸಗ್ಳೋಚ್ ಚೊಕ್ಲೆಟಿಚೊ

ಫುಡೆಂ ವಚೊನ್ ಪಳಯ್ತ್ ಜಾಲ್ಯಾರ್ ದಿಸ್ಲಿಂ ಸುಂದರ್ ಘರಾಂ
ಆಸ್ಲಿಂ ಚೊಕ್ಲೆಟಿಚೀಂಚ್ ಜನೆಲಾಂ, ಚೊಕ್ಲೆಟಿಚೀಂಚ್ ದಾರಾಂ

ಖಾವ್ಪಾಕ್ ಮ್ಹಣ್ ಘಾಲೊ ಹಾತ್, ಆಯ್ಲೊ ಏಕ್ ವ್ಹಡ್ ಆವಾಜ್!

'ಖಾವ್ಪಾಕ್ ಜಾಯ್ ಹ್ಯೊ ಚೊಕ್ಲೆಟಿ ತರ್, ಆಯ್ಕುಂಕ್ ದೀವ್ನ್ ಕಾನ್
ಘರ್‍ಚ್ಯಾಂಕ್ ಸೊಡುನ್ ರಾವೂನ್ ಹಾಂಗಾ, ಕರ್‍ಚೆಂ ಪಡ್ಟಲೆಂ ಸಗ್ಳೆಂ ಕಾಮ್'

'ನಾ ನಾ ಸೊಡ್ ಮ್ಹಾಕಾ' - ಆಡ್ಡೀತ್ ಹಾಂವೆಂ ಮಾರ್‍ಲಿ ಧಾಂವ್
ಜಾಗ್ ಆಯ್ಲಿ ತುಟ್ಲೆಂ ಸಪಣ್ ದೊಳೆ ಚೊಳೀತ್ ಉಟ್ಲೆಂ ಹಾಂವ್.

-ದೇವಶ್ರೀ ಎಸ್. ಕಾಮತ್, ನೊವಿ ಕ್ಲಾಸ್
ಮೇರಿ ಇಮ್ಮಾಕುಲೇಟ್ ಗರ್ಲ್ಸ್ ಹೈಸ್ಕೂಲ್, ಪಣಜಿ, ಗೊಂಯ್

संपादकीय: