ಅಸಲೆಂ ಸ್ವಪಣ್ ದಿ!

ಸಂಪಾದಕೀಯ್:

ಅರ್ಥ್ ಸೊಧುಂಕ್ ವಚೊನ್ ಝಾಂಟಾಂನಿ ಶಿರ‍್ಕೊಂಚೆಂ

ನಿಜಾಯೆ ಭಾಯ್ಲ್ಯಾ ಎಕಾ ಅತೀವಾಸ್ತವಾಂತ್ ಹಾಂಗಾಚೊ ಮನೀಸ್ ಜಿಯೆವ್ನ್ ಆಸಾ. ನಿಜಾಯೆಂತ್ ತಾಚೆಂ ಬರೆಂ ಜಾಲ್ಲೆಂನಾ. ದೆಕುನ್ ಹಿ ನಿಜಾಯ್ ಸ್ವಪಣ್ ಜಾಲ್ಲಿ ತರ್ ಕಿತ್ಲೆಂ ಬರೆಂ ಆಸಲ್ಲೆಂ ಮ್ಹಣೊನ್ ತೊ ಚಿಂತಾ. ಪುಣ್ ಆನ್ಯೇಕೆ ಘಡ್ಯೆ ತೊ ಸನಿನ್ ಜಾತಾನಾ, ಪರ‍್ತ್ಯಾನ್ ತಿಚ್ ದೂಖ್.

ಹಿ ಕವಿತಾ, ವಿರಾರ್ ಕರ್ನ್ ಸೊಡ್ಚಿ ಕವಿತಾ. ಹಿ ಕವಿತಾ ಸಮ್ಜೊಂಕ್ ವಚೊನ್ ಅರ್ಥ್ ಸುಟ್ತಾನಾ ಝಾಂಟಾಂನಿ ಶಿರ್ಕತಾಯ್. ಲ್ಯಾನ್ಸಿ ಪಿಂಟೊ ನಾಯಕಾನ್ ವೆಗ್ಳೆ ಥರೆಚಿ ಏಕ್ ಕವಿತಾ ಬರಯ್ಲ್ಯಾ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ

ಅಸಲೆಂ ಸ್ವಪಣ್ ದಿ!

ತುಂ ಮ್ಹಜ್ಯೆ ಜಿಣ್ಯೆಂತ್ಲೆಂ,
"ಖೊಟೆಂ ಸ್ವಪಣ್"
ಅಶೆಂ ಮ್ಹಳ್ಯಾರ್ ಖಂಡಿತ್,
‘ತಾಕಾ’ ಬೆಜಾರ್ ಜಾತಾ.
ತೆಂ "ಹಾಂವ್" ಜಾಣಾಂ !

ತುಂ ’ಮ್ಹಜ್ಯೆ’ ಜಿಣ್ಯೆಂತ್ಲೆಂ,
"ಖೊಟೆಂ" ಮ್ಹಳ್ಯಾರ್...
‘ಸ್ವಪ್ಣಾಕ್ ಬೆಜಾರ್ ಜಾತಾ.
‘ತೆಂ’ ಮ್ಹಾಕಾಯ್ ಬೆಜಾರ್ ಜಾತಾ.

ತುಂ ಮ್ಹಜ್ಯೆ ಜಿಣ್ಯೆಂತ್ಲೆಂ ಜಾವ್ನ್
"ಖೊಟೆಂ" ಜಾಲಾಂಯ್ ..!
ಅಶೆಂ ಮ್ಹಣೊಂಕ್ ಕಾಳ್ಜಾಕ್
ಪುಟ್ವನಾ ಆನಿ ನಾಟ್ವನಾ
ಕಿತೆಂ ಕರುಂ?

ತುಂ ಮ್ಹಜ್ಯೆ ಜಿಣ್ಯೆಂತ್
ಆಯಿಲ್ಲಿ ಚೂಕ್?
ವ್ಹ ಸ್ವಪಣ್ ಜಾಲ್ಲಿ ಚೂಕ್?
ಮ್ಹಾಕಾ ಕಿತ್ಯಾಕ್ ಬಾವ್ಡ್ಯಾಕ್
ಅಸಲಿ ದೂಖ್?

"ಸ್ವಪಣ್" ಜಾಲ್ಲೆಂ ತರ್,
ಸ್ವಪ್ಣಾಕ್ ಆನಿ ತುಕಾ ವಿಸ್ರಾತೊಂ.
ಮ್ಹಜ್ಯಾ ನಶಿಬಾಕ್ ದುರ‍್ಸಾತೊಂ.
ಜಿಣ್ಯೆಕ್ ಘಡ್ಯೆನ್ ವಿಸರ‍್ತೊಂ.
ಪುಣ್ ಸತ್ ಗಜಾಲ್...
ಜಿಣಿ ಸ್ವಪಣ್ ನ್ಹಯ್!!
ಸ್ವಪ್ಣಾಂತ್ ಏಕ್ ಜಿಣಿ ಆಸ್ತಾ.
ಸ್ವಪ್ಣಾಂತ್ ಜಿಣೆಂ ದಿಸ್ತಾ.
ಆಪ್ಲೆಂ ಕರ್ಮ್ ಹಾಸ್ತಾ,
ನಾಲಿಸಾಯ್ ಸದಾಂ ಧೊಸ್ತಾ.

ಸ್ವಪ್ಣಾಂ ದೀನಾಕಾ ದೆವಾ.
"ಬರಿ" ಜಿಣಿ ದಿ.
ಬರೆ ಜಿಣಿಯೆಂತ್ ಮ್ಹಜ್ಯೆ,
ಬರಿ ಸಾಂಗಾತಿಣ್ ದಿ.
ಸಾಂಗಾತಿಣ್ ಮ್ಹಜೊ ಗಳೊ ಚಿಡ್ಡಿತಾನಾಂಯ್,
"ಸಂಭೋಗಾ"ಚೊ ಅನ್ಭೋಗ್ ದಿ.
ಅಸಲೆಂ ಸ್ವಪಣ್ ದಿ.
ಅಸಲೊ ಮೋಗ್ ದಿ.

ಹಾಂವ್ ತೊ ದಾದ್ಲೊ,
ಆದಾಂವ್ "ಸಂಯ್ಭಾನ್" ಆದ್ಲೊ.
ಮೋಗ್ ಕರುಂಕ್ ಬಾಯ್ಲೆಚೊ,
ಹ್ಯಾ ಜಲ್ಮಾಂತ್ ಜಲ್ಮಲ್ಲೊ.
ಜಲ್ಮೊಂಕ್ ಆನಿಕೀ ಆಶೆತಾಂ.
ಬಾಯ್ಲೆಚೊ ಮೋಗ್ ಮೆಳ್ಳ್ಯಾರ್,
ಬಾಯ್ಲ್ "ಮ್ಹಜಿಚ್" ಕಳ್ಳ್ಯಾರ್.
ಅಸಲೆಂ ಸ್ವಪಣ್ ದಿ.

-ಲ್ಯಾನ್ಸಿ ಪಿಂಟೊ ನಾಯಕ್, ಕುಲ್ಶೇಕರ್.