ಸಂಪಾದಕೀಯ್:

ಬಾಯ್ಲ್ ಆನಿ ದಾದ್ಲ್ಯಾ ಮಧೆಂ ಫರಕ್ ಆಸೊಂಕ್ ನಜೊ, ಫರಕ್ ಕರುಂಕ್ ನಜೊ.

ಹೊ ಸಮಾಜ್ ದಾದ್ಲೊ ಆನಿ ಸ್ತ್ರೀ ಮ್ಹಳ್ಳೊ ಹೆ ರಿತಿಚೊ ಫರಕ್ ಕಿತ್ಯಾ ಕರ‍್ತಾ? ಸಮಾಜ್ ಮಾತ್ರ್ ನ್ಹಯ್, ಆಮ್ಚಿ ಸಂಸ್ಕೃತಿ ಆನಿ ಸಮಡ್ತ್ ಲೆಗುನ್ ಅಶೆಂಚ್ ಚಿಂತ್ತಾ - ದಾದ್ಲೊ ಊಂಚ್, ಬಾಯ್ಲ್ ತಾಚಿ ಚಾಕ್ರಿ ಕರ‍್ಚಿ ಕಾಮೆಲಿ. ದಾದ್ಲೊ ವೀರ್ ಪುರುಷ್, ಬಾಯ್ಲ್ ಸದಾಂ ತಾಚಿ ಗುಲಾಮ್.

ದಾದ್ಲ್ಯಾಚಿ ಆನಿ ಬಾಯ್ಲೆಚಿ ಜಿವಾಚಿ ರಚನಾ ವೆವೆಗ್ಳಿ ಆಸಾ ಹೆಂ ಖರೆಂ. ತಾಂಚ್ಯಾ ಶರೀರಾಚೆ ರಚ್ನೆಕ್ ಲಾಗೊನ್ ತಾಂಚೆಂ ಚಿಂತಪ್ ಕಾಂಯ್ ಸಂದರ್ಭಾಂನಿ ವೆಗ್ಳೆಂ ಆಸೊಂಕ್ ಸಾಧ್ಯ್ ಆಸಾ. ಪುಣ್ ಮನ್ಶಾ ಜಿವಾಕ್ ಜಲ್ಮ್ ದೀಂವ್ಕ್, ನೋವ್ ಮ್ಹಯ್ನೆ ಎಕಾ ಜಿವಾಕ್ ಕುಶಿಂತ್ ವ್ಹಾವಂವ್ಕ್ ತಿಕಾ ಆನಿ ತಿಕಾ ಮಾತ್ರ್ ಸಾಧ್ಯ್ ಆಸಾ. ಹಿ ವಾಸ್ತವತಾ ದಾದ್ಲ್ಯಾ ವರ್ಗಾನ್ ಮಾಂದುನ್ ಘೆಂವ್ಕ್ ಶಿಕಜಾಯ್.

ರಾಜಶ್ರೀ ಸೈಲಾನ್ ಬೋವ್ ಆಪುರ್ಬಾಯೆನ್, ದಾದ್ಲ್ಯಾ ಆನಿ ಸ್ತ್ರೀ ಕುಳಾ ಮಧ್ಲೊ ಫರಕ್ ಆಮ್ಚೆ ಮುಕಾರ್ ದವರ‍್ಲಾ. ತಶೆಂಚ್ ಸ್ತ್ರೀಯೆಚ್ಯಾ ಸಂಕಷ್ಟಾಂವಿಶಿಂ ನದರ್ ಚರೊಂವ್ಕ್ ಆಮ್ಕಾಂ ಉಲೊ ದಿಲಾ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಫರಕ್

ಮ್ಹಜೆ ತುಜೆ ಮದಿಂ
ಕಿತ್ಲೊ ಹೊ ಭೆದ್‌ಭಾವ್
ತುಜ್ಯಾ ಜಲ್ಮಾಕ್
ಹಜಾರ್ ಸರ್ಗ್ ಸುವಾಳೆ
ಮ್ಹಜ್ಯಾ ಜಲ್ಮಾಕ್
ನಿರಾಶೆಚೆಂ ಕಿಣ್ಣ್ ವಾರೆಂ
ತುಂ ಬುದ್ದ್, ಕೃಷ್ಣ್, ಜೆಜು, ಅಲ್ಲಾ
ಹಾಂವ್ ಕೊಣ್ ಕೊಣಚ್ ನ್ಹಯ್
ಘಡ್ಯೆ ಜಾಯ್ತ್
ನಾಂವ್ ಗಾಂವ್ ನಾಶಿಲ್ಲಿ ಕೊಣಾಕ್ ನಾಕಾ
ಆಶಿಲ್ಲಿ ಕೃಷ್ಣಾಲಿ ಭಯ್ಣ್
ಜಿಕಾ ಯುಗಾಂಯುಗಾಂತ್
ಕೃಷ್ಣಾಕ್ ಜಲ್ಮಾಕ್ ಘಾಲ್ಚೆಖಾತೀರ್
ಜಲ್ಮುಚೆಂ ಪಡ್ಟಾ ಮರ‍್ಚೆಂ ಪಡ್ಟಾ
ಅಸೊ ತುಜೆ ಮ್ಹಜೆ ಮದ್ಲೊ ಫರಕ್
ಸುಖಾಚ್ಯಾ ಪರಮೋಚ್ಚ್ ಖಿಣಾಂತ್ ತುಂ ಕರ‍್ತಾ
ಜೀವನಾಚಿ ನಿರ್ಮಣಿ
ವೇದನೆಚ್ಯಾ ಆಕಾಂತಾಳ್ಯಾ
ಘಟಕೆಕೆ ಹಾಂವ್ ಕರ‍್ತಾಂ
ಜೀವನಾಚೆಂ ಸರ್ಜನ್.

-ರಾಜಶ್ರೀ ಮಹಾಬಳೇಶ್ವರ್ ಸೈಲ್