ಸರ್ಜರಿ

ಸಂಪಾದಕೀಯ್:

ಬಿಸ್ಲೆರಿ ಉದ್ಕಾಂತ್ ನ್ಹಾತಲ್ಯಾಕ್ ನೇತ್ರಾವತಿ ಸುಕ್ಲ್ಯಾರ್ ಫರಕ್ ಪಡನಾ

ನೇತ್ರಾವತಿಚೆಂ ಉದಕ್ ವೆಗ್ಳ್ಯಾ ವಾಟಾಂನಿ ವ್ಹಾಳೊಂಕ್ ಕರುನ್, ಕರಾವಳಿ ಲೊಕಾಚೆ ತಾನೆಚೆರ್ ಖೆಳೊಂಕ್ ರಾಜಕೀಯ್ ಫುಡಾರಿ ಫುಡೆಂ ಸರ‍್ಲ್ಯಾತ್. ವೀರಪ್ಪ ಮೊಯ್ಲಿ, ಆಮ್ಚ್ಯಾಚ್ ಗಾಂವ್ಚೊ. ಪುಣ್ ಚಿಕ್ಕಬಳ್ಳಾಪುರಾಕ್ ಪ್ರತಿನಿಧಿತ್ವ್ ಕರ‍್ತಾ. ತಾಕಾ ಹ್ಯಾ ಉದ್ಕಾಚೆರ್ ಖೆಳ್ ಖೆಳೊಂಕ್ ಜಾಯ್. ಕರ್ನಾಟಕಾಂತ್ ಬಿಜೆಪಿ ಸರ್ಕಾರ್ ಆಸ್ತಾನಾ, ನೇತ್ರಾವತಿ ನಂಯ್ಚಿ ವಾಟ್ ಬದ್ಲೊಂಕ್ ಮಾಂಡ್ಣಿ ಜಾಲ್ಲಿ. ತಾಂಕಾಂಯ್, ಪ್ರತ್ಯೇಕ್ ಜಾವ್ನ್ ಸದಾನಂದ ಗೌಡಾಕಯ್ ಹೊ ಖೆಳ್ ಖೆಳೊಂಕ್ ಜಾಯ್. ಬೆಂಗ್ಳುರಾಂತ್, ಡೆಲ್ಲಿಂತ್ ರಾವೊನ್ ಬಿಸ್ಲೆರಿ ಉದ್ಕಾನ್ ನ್ಹಾಂವ್ಚ್ಯಾ ಲೊಕಾಕ್ ಹಾಚೊ ಫರಕ್ ಖಂಯ್ ಪಡ್ತಾ?

ಆಪ್ಲೆ ಗುಪೀತ್ ಶೆವೊಟ್ ಜ್ಯಾರಿ ಕರುಂಕ್ ರಾಜಕೀಯ್ ಮುಕೆಲಿ ಖಂಯ್ಚ್ಯಾಯ್ ಪಾಂವ್ಡ್ಯಾಕ್ ಪಾವೊಂಕ್ ಲಜೆನಾಂತ್. ತಾಂಕಾಂ ಮಾಗೀರ್ ಲಜ್ ಖಂಯ್ ಆಸಾ? ನೇತ್ರಾವತಿ ಮ್ಹಳ್ಯಾರ್ ಕರಾವಳಿ ಪ್ರದೇಶಾಂತ್ಲ್ಯಾ ಲೊಕಾಚೊ ಉಸ್ವಾಸ್. ತಿಕಾ ಪಿಳ್ಚೆಂ ಕಾಮ್ ರಾವಯ್ಜಾಯ್ ಮ್ಹಣೊನ್ ದಕ್ಷಿಣ ಕನ್ನಡ ಜಿಲ್ಲ್ಯಾಂತ್ ಮಾರ್ಚ್ 3 ತಾರಿಕೆರ್ ಸಗ್ಳೆಂ ಮಂಗ್ಳುರ್ ಶಹರ್ ಬಂಧ್.

ಜಾಗ್ ಹಾಡ್ಚಿ ಆಂಡ್ರ್ಯೂಚಿ ಸಾಂದರ್ಭಿಕ್ ಕವಿತಾ ಹಾಂಗಾಸರ್ ದಿಲ್ಯಾ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಸರ್ಜರಿ!

ಆಯ್ತೆ ರಾವ್ಲ್ಯಾತ್ ಧವೆಂ ನ್ಹೆಸೊನ್
ಆಮ್ಚೆ ಪ್ರತಿನಿಧಿ, ಚಲೊವ್ನ್ ವ್ಹರುಂಕ್
ಕಾರ್ಯಾ ವಿಧಿ ಬೈಪಾಸ್ ಸರ್ಜರೆಚಿ

ಶಸ್ತ್ರಾಂ ಅಸ್ತ್ರಾಂ ಆನಿ ಮೊಟೆ ನಳ್
ಯಂತ್ರಾಂ ತಂತ್ರಾಂ ಸರ್ವ್ ತಯಾರ್
ವಾಂಚ್ಲ್ಯಾರ್ ವಾಂಚ್ಲಿ ಮುಗ್ದ್ ನೇತ್ರಾವತಿ...

ವಾಂಚೊನ್ ಉರ್‍ಲಿ ತರ್ ಬಾವ್ಡಿ...

ಪೊರ್ವಾಂ ಥಾವ್ನ್ ಧಮ್ಮ್ ಬಾಂದುನ್
ನಳಾಂನಿ ವ್ಹಾಳ್ತಲಿ, ಗಳ್ಯಾಂನಿ ದೆಂವ್ತಲಿ
ನಿಸ್ಸಂತಾನ್ ವನಾಂ ಪ್ರಾಣಿ ಪಾಸ್ಳೆಂತ್ಲಿಂ!

ಕೆದ್ನಾಂ ತಾನ್ ಭಾಗತ್ ಅಬ್ಲೆಶಿ ಮನ್ಶಾಂಚಿ?
ಧವೆಂ ನ್ಹೆಸಲ್ಲ್ಯಾಂಕ್ ಬಶಿ ಭಾಂಗರಾಚಿ!

-ಆಂಡ್ರ್ಯೂ ಎಲ್. ಡಿ’ಕುನ್ಹಾ