ನೇತಾ, ವೋಟ್ ಆನಿ ಆಮ್ ಆದ್ಮಿ

ಸಂಪಾದಕೀಯ್:

ಕುರು ಕುರು ಕಾನಾ, ಆಯ್ಲಿಂ ಇಲೆಕ್ಷನಾಂ

ಆಮ್ಚ್ಯಾ ರಾಜಕೀ ಫುಡಾರ‍್ಯಾಂನಿ ಆಮ್ಚೊ ಗಾಂವ್ ಕಸೊ ಸುಕಯ್ಲಾ ಮ್ಹಣ್ಚೆವಿಶಿಂ ಹಿ ಕವಿತಾ ಸಾಂಗ್ತಾ. ತರೀ ಹರ‍್ಯೆಕ್ ಪಾವ್ಟಿಂ ಆಮ್ಕಾಂ ವೋಟ್ ಘಾಲುಂಕ್ ಮೆಳ್ತಾನಾ, ಬಿರಿಯಾನಿಚ್ಯಾ ಆಶೆಕ್ ಬಳಿ ಪಡನಾಸ್ತಾಂ, ಸಿಸ್ಟಮಾಚ್ಯಾ ಬಾಪಾಯ್ನ್ ಸೈತ್ ತಕ್ಲಿ ಬಾಗಾಯ್ಶೆಂ ಕರುಂಕ್ ಆಮ್ಚೆ ವರ್ವಿಂ ಸಾಧ್ಯ್ ಆಸಾ ಮ್ಹಳ್ಳೊ ಆಶಾವಾದ್ ಹಿ ಕವಿತಾ ಸಾಂಗ್ತಾ.

ಹಾಂಗಾಸರ್ ವೊಟಾಚಿ ಶಾಯ್ ಏಕ್ ವಿಶೆಸ್ ಸಕ್ತೆಚಿ ಗಜಾಲ್ ಯಾ ವಸ್ತ್ ಮ್ಹಳ್ಳೆಬರಿ ಚಿತ್ರಿತ್ ಜಾಲ್ಯಾ.

ಎಲಿಸಾಂವಾಚ್ಯಾ ಸಂದರ್ಭಾರ್ ಲೊಕಾಕ್ ಜಾಗೊಂವ್ಕ್ ಆಯಿನ್ನ್ ಕವಿತಾ

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ನೇತಾ, ವೋಟ್ ಆನಿ ಆಮ್ ಆದ್ಮಿ

ವೊಟಾಚೊ ಗುರ್ತ್ ಜಾಲ್ಲಿ ಶಾಯ್
ವೊಟಾ ಪಯ್ಲೆಂ ಪಡ್ಲಿ ತಾಚ್ಯಾ ತೊಂಡಾರ್
ಮ್ಹಜ್ಯಾ ಬೊಟಾಚಿ ಶಾಯ್ ಮಾಜ್ವಲಿನಾ ಧುಲ್ಯಾರೀ
ಮುಸ್ಕರಾರ್ ಪಡ್ಲಲಿ ಶಾಯ್ ಮಾಜ್ವಲಿ ದುಸ್ರೆಚ್ ಘಡ್ಯೆರಿ!

ಬಾಯ್ಲಾಂ ಬಾವ್ಡಿಂ ರಾವ್ಲ್ಯಾಂತ್ ಉಬಿಂ ಘೆವುನ್ ಮೊಡ್ಕೆ
ಕೆದ್ನಾಂ ಪಡತ್ ಥೆಂಬೊ, ಸುಕಲ್ಲಿ ನಳಿ ಭಿಜಂವ್ಕ್
ದೆವೊಂವ್ಕ್ ಉದ್ಕಾ ಥೆಂಬೊ, ಸುಕ್ಲಲೊ ನಳ್ ರಾಕ್ತಾ ನೇತಾಕ್
ಜಶೆಂ ರೈತ್ ತಕ್ಲಿ ಉಕ್ಲುನ್ ರಾಕತ್ ಲಾವ್ನ್ ದೀಷ್ಟ್ ಮೊಳ್ಬಾಕ್!

ಬೊಟಾಚಿ ಶಾಯ್ ಮ್ಹಜ್ಯಾ ಆಜೂನ್ ನಾ ಮಾಜ್ವೊಂಕ್
ನಪಯಿಂಚ್ ಜಾಲಾ ಜಿಕಲ್ಲೊ ನೇತಾ ಬಾನಾವ್ನ್ ಲೊಕಾಕ್
ದುಬ್ಳೊ ಸೊದ್ತಾ ಕೆದ್ನಾಂ ಮೆಳತ್ ಕೊಕೊ ಪೊಟಾಕ್
ನೇತಾ ಆಜೂನ್ ಮೆಜ್ತಾ ವೇದಿರ್ ಘಾಲ್ಲೆ ಶೊಲ್ ನೊಟಾಕ್!

ದುಬ್ಳ್ಯಾಚೆ ಬಶಿಯೆರ್ ಜೆದ್ನಾಂ ಬಿರಿಯಾನಿ ದಿಸ್ತಾ
ವೋಟ್ ಕರ‍್ಚೆ ದೀಸ್ ಖರೆಂಚ್ ಆಯ್ಲ್ಯಾತ್ ಮಿಸ್ತಾ
ಹಾಂವ್ ಆನಿ ತುಂ ಏಕ್ ಮತ್ ಜಾಲ್ಯಾರ್ ಮನ್ಶಾ
’ಸಿಸ್ಟಮಾ’ಚ್ಯಾ ಬಾಪಾಯ್ಕಿ ತಕ್ಲಿ ಬಾಗಾಂವ್ಕ್ ಪಡ್ತಾ!

-ಪ್ರಸನ್ನ್ ನಿಡ್ಡೋಡಿ