ಸಂಪಾದಕೀಯ್:
ಪೊಸೊಭರ್ ಹಾಸೊ, ತೊಂಡಾರ್ ನಾತ್ಲಲೊ ಪಿಸೊ
'ಹಾಸೊ' ಮ್ಹಳ್ಳೆ ಸಂಗ್ತಿಕ್ ದುಡು ಫಾರಿಕ್ ಕರುಂಕ್ ನಾಂತ್ ತರೀ, ಸಂಸಾರಾಂತ್ ಲಾಬ್ಚ್ಯಾ ಸರ್‍ವಯ್ ವಸ್ತುಂ ಪ್ರಾಸ್ ತೊ ಮ್ಹಾರ್‍ಗಾಯೆಚೊ ಜಾಲಾ. ದೆಕುನ್‌ಚ್ ಆಮ್ಕಾಂ ಪಡ್ವಳ್ಯಾಬರಿ ಲಾಂಬ್ಲಲಿಂ ತೊಂಡಾಂ, ಶೆಣ್ಕುಟಾಂ ಥಾಪ್ಲಲಿಂ ಮುಖಮಳಾಂ ಚಡಿತ್ ಪಳೆಂವ್ಕ್ ಮೆಳ್ತಾತ್ ಶಿವಾಯ್ ಏಕ್ ಆಮುರ್‌ಪಿಕೊ ಹಾಸೊ ಆಸ್ಚೆಂ ಮುಖಮಳ್ ಪಳೆಂವ್ಕ್ ಮೆಳನಾ. 'ಹಾಸೊಂಕ್ ಕಳನಾತ್‌ಲ್ಲೊ ತೊ ಪಿಸೊ' ಮ್ಹಳ್ಳಿ ಸಾಂಗ್ಣಿ ಕಾಂಯ್ ಫಟ್ಕಿರಿ ನ್ಹಯ್. ಹಾಸೊಂಕ್ ಕಳ್ಚ್ಯಾ ಮನ್ಶಾಚೆ ಯಶಸ್ವೆಮುಕಾರ್ ಹಾಸೊಂಕ್ ಕಳನಾತ್ಲಲ್ಯಾ ಮನ್ಶಾಚಿ ಯಶಸ್ವಿ ಮೆಜ್ಚಿ ಜಾಲ್ಯಾರ್ ಹೆ ಸಾಂಗ್ಣೆಚೆಂ ಸತ್ ಆಮ್ಕಾಂ ಕಳಿತ್ ಜಾತಲೆಂ.
ಹ್ಯಾ ಹಾಸ್ಯಾವಿಶಿಂ ಕವಯಿತ್ರಿ ಆಸ್ಮಾ ಮೂಡಬಿದ್ರಿನ್ ಹಿ ಕವಿತಾ ಪೇಶ್ ಕೆಲ್ಯಾ. ಹಿ ವಾಚ್ತಾನಾ ತುಮ್ಕಾಂ ಹಾಸೊ ಯೆಂವ್ಚ್ಯೊನಾಂತ್ ತರಿ, ಹಾಸ್ಯಾಂಚ್ಯಾ ಮಹತ್ವಾವಿಶಿಂ ತುಮಿ ಚಿಂತುಂಕ್ ಸುರು ಕರ್‍ತಲ್ಯಾತ್ ಆನಿ ತ್ಯಾ ಮಾರಿಫಾತ್ ಸವ್ಕಾಸ್ ಸಕಾಳಿಂಚ್ಯಾ ಸುಕ್ರಾನ್ ಪೃಥ್ವೆಚ್ಯಾ ಮಾತ್ಯಾರ್ ಪ್ರಕಾಸ್ ಫಾಂಕಯಿಲ್ಲೆಬರಿ ತುಮ್ಚ್ಯಾ ತೊಂಡಾಂಚೆರ್ ಹಾಸೊ ಫುಲಂವ್ಕ್ ಸೊಡ್ತಲ್ಯಾತ್ ಮ್ಹಳ್ಳಿ ಗ್ಯಾರಂಟಿ ಮ್ಹಾಕಾ ಆಸಾ.
ಆಸ್ಮಾ, ಮೂಡಬಿದ್ರಿ ಬೋವ್ ತರ್‍ನೆ ಪ್ರಾಯೆರ್‌ಚ್ ಕೊಂಕಣಿಚ್ಯಾ ಧ್ಯಾಸಾಂತ್ ಬುಡ್ಲಲಿ ಚಲಿ. ಕೊಲೆಜ್ ಶಿಕಪ್ ಶಿಕೊನ್ ಆಸ್ತಾನಾ ಸೈತ್ ಕೊಂಕಣಿಕ್ ವೆಂಗೊನ್ ಧರ್‌ಲ್ಲ್ಯಾಂತ್ ಲುಕ್ಸಾಣಾಚ್ಯಾಕ್‌ಯ್ ಫಾಯ್ದೊ ಚಡಿತ್ ಆಸಾ ಮ್ಹಣ್ ಗೊವಾಯ್ ದಿಂವ್ಚಿ ಚಲಿ. ತಿಚಿ ಆಸಕ್ತ್ ಆಮ್ಚ್ಯಾ ತರ್‍ನ್ಯಾ ಯವಕ್-ಯುವತಿಂಕ್ ಏಕ್ ಮೇಲ್‌ಫಾಂಕ್ತ್ ಮ್ಹಣ್ ಸಾಂಗೊಂಕ್ ಆಮ್ಕಾಂ ಗರ್ವ್ ಭೊಗ್ತಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಹಾಸೊ
ತ್ಯೊ ಆಮುರ್ಕ್ಯೊ ಹಾಸೊ
ಮತಿಕ್ ಪಿಶ್ಯಾರ್ ಘಾಲ್ಚ್ಯೊ
ಕಾಳ್ಜಾ ದರ್ಯಾಂತ್
ಭೊಗ್ಣಾಂ ರುಪಿಂ
ತ್ಯಾ ಸಾಗೊರಾಂತ್ ಜರಿ
ವಾದಾಳ್ ಉಟ್ಲೆಂ ತರಿ
ಪ್ರಶಾಂತ್ ವಾರ್‍ಯಾಬರಿ ಧಲ್ಚ್ಯೊ
ಹ್ಯೊ ಮುಗ್ಧ್ ಹಾಸೊ
ಅತ್ಮ್ಯಾಕ್ ವೇಂಗ್ ಮಾರ್‍ಚ್ಯೊ
ಕಾಳ್ಜಾ ಶೆತಾಂತ್
ಭಾಂಗ್ರಾ ಭಾತಾಕ್ ಸರಿ
ಸುಗ್ಗಿ ಗಾಣಾಂಕ್ ಗಾಂವ್ಚ್ಯೊ
ಹೆ ಸುವಾತೆರ್ ಜರಿ
ಮೊಗಾ ಭಿಂ ಕಿರ್‍ಲಲೆಂ ತರಿ
ಇಟಾನ್ ಭರೊನ್ ಪೋಸ್ ದಿಂವ್ಚ್ಯೊ
ಮೊಗಾ ವೊಂಟಾಂಕ್ ರುಂದಾಂವ್ಚ್ಯೊ
-ಆಸ್ಮಾ ಮೂಡಬಿದ್ರಿ