ಸಂಪಾದಕೀಯ್:
ಸಪ್ಣೆತೆಲ್ಯಾಂಚಿ ಆಶಾ ಜಿವಿ ದವರ್‍ಚಿ ಕವಿತಾ
ಸಪ್ಣಾಂವಿಶಿಂ 'ಕವಿತಾ ಕುಳಾರಾಂತ್' ಜಾಯ್ತ್ಯಾ ಕವಿಂನಿ ಬರವ್ನ್ ಜಾಲ್ಯಾ ಉಪ್ರಾಂತ್ ಆತಾಂ ಆನ್ಯೇಕ್ ಕವಿತಾ ಸಪ್ಣಾಚಿ. ಸಕಾಳಿಂಚ್ಯಾ ಸಪ್ಣಾಚಿ! ಸಪ್ಣಾಂ ನೀಜ್ ಜಾಯ್ನಾಂತ್, ತರೀ ಸಕಾಳಿಂಚಿಂ ನೀಜ್ ಜಾತಾತ್ ಮ್ಹಣೊನ್ ಕೊಣೆಂಕಿ ಕಿತ್ಯಾಕ್‌ಕಿ ಸಾಂಗ್ಲಲೊ ಉಡಾಸ್. ಹೆ ಸಾಂಗ್ಣೆಚೆರ್ ಭರ್ವಸೊ ದವರ್‍ನ್ ಹಿ ಕವಿತಾ ಉದೆಲ್ಯಾ - ಸಪ್ಣೆತೆಲ್ಯಾಂಕ್ ನಿರಾಶಾ ಕರುಂಕ್ ನಜೊ ಮ್ಹಳ್ಳ್ಯಾ ಇರಾದ್ಯಾನ್.
ಆಲ್ವಿನ್ ಪಿಂಟೊ ಜಾಯ್ತ್ಯಾ ವರ್‍ಸಾಂಥಾವ್ನ್ ಗಲ್ಫಾಚ್ಯಾ ಕೊಂಕಣಿ ರಂಗ್‌ಮಾಂಚಿಯೆರ್ ನಾಂವ್ ಕೆಲ್ಲೊ ಕಲಾಕಾರ್. ಪಾಟಿಂ ಕಿತೇಂಯ್ ಆಶೆನಾಸ್ತಾಂ, ಸ್ವತಾಚ್ಯೊ ದುಕಿ ಬಗ್ಲೆಕ್ ದವರ್‍ನ್, ದುಕ್‌ಲ್ಲ್ಯಾ ಕಾಳ್ಜಾಂಕ್ ಆನಿ ದಣ್ಸಲ್ಲ್ಯಾ ಮನಾಂಕ್ ಹಾಸಂವ್ಚೆಂ ಕಾಮ್ ತಾಣೆ ತಾಚ್ಯಾ ಜಿವಿತಾಚೊ ವಾಂಟೊ ಮ್ಹಣ್ ಘೆತ್ಲಾಂ. ಆನಿ ಆತಾಂ ಪಯ್ಲೆಪಾವ್ಟಿಂ ಕವಿತಾ ಬರಂವ್ಚೆಂ ಏಕ್ ಪ್ರೇತನ್ ತಾಣೆ ಕೆಲಾಂ ಮ್ಹಣ್ತಾನಾ ಮ್ಹಾಕಾ ತರೀ ತಾಚೆ ಹುಮೆದಿಚೆರ್ ಮಯ್ಪಾಸ್ ಉಬ್ಜತಾ. ದುಬಾಯ್ ಶೆರಾಂತ್ ಆಮಿ ಚಲವ್ನ್ ವ್ಹರ್‍ಚ್ಯಾ ಜಾಯ್ತ್ಯಾ ಕಾಮಾಸಾಳೆಂನಿ ತೊ ಏಕ್ ಸಹೃದಯಿ ಜಾವ್ನ್ ವಾಂಟೊ ಘೆತಾ ಆನಿ ತಾಂಚೊ ತಾಚೆರ್ ಪ್ರಭಾವ್ ಪಡ್ಲಾ ಮ್ಹಣ್ಚ್ಯಾಕ್ ಹಿ ತಾಚಿ ಕವಿತಾಚ್ ಸಾಕ್ಸ್.
ಆಲ್ವಿನಾಚಿಂ ಸಪ್ಣಾಂ, ಸಕಾಳಿಂಚಿಂ ಮಾತ್ರ್ ನ್ಹಯ್, ಜಿವಿತಾಂತ್ಲಿಂ ಹೆರ್ ಸಗ್ಳಿಂ ಸಾಕಾರ್ ಜಾಂವ್ದಿಂತ್ ಮ್ಹಳ್ಳಿಚ್ ಆಮ್ಚಿ ಆಶಾ!
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಸಕಾಳಿಂಚೆಂ ಸಪಣ್
ಶೀತಳ್ ರಾತಿಂ ನಿದೆ ವೆಂಗೆಂತ್
ಸುಂದರ್ ಸಪಣ್ ದೆಖ್ಲೆಂ
ವೇದಿ ಸಾಮ್ಖಾರ್ ಪ್ರೇಮಿ ಮ್ಹಜೆಂ
ಲಗ್ನಾಕ್ ಉಬೆಂ ಆಸ್ಲೆಂ
ಧವ್ಯಾ ನ್ಹೆಸ್ಣಾರ್ ದಿಸ್ತಾ ಕಿತೆಂ
ಆಂಜ್ಯಾಳ್ ತಾಚೆಂ ರೂಪ್
ಲಗ್ನಾಘಡಿ ಚಿಂತುನ್ ಕಡ್ಲ್ಯಾಂವ್ ಜಶೆಂ
ಕಾಯ್ಲಿವಯ್ಲೆಂ ತೂಪ್
ಚಾಕ್ಲಿ ಹಾಂವೆಂ ಸಪ್ಣಾ ಭಿತರ್
ರಾವ್ಳೆರಾಚಿ ಸೊಭಾಯ್
ಪ್ರೇಮಿ ರಾಣಿ ಹಾಂವ್ ರಾಯ್
ಭೊಂವ್ತಿಂ ಸಬಾರ್ ಶಿಪಾಯ್
ಎಕಾಚ್‌ಫಾರಾ ನಿದ್ರಾದೇವಿನ್
ವೇಂಗ್ ತಿಚಿ ಸೊಡ್ಲಿ
ಕಿತೆಂ ಜಾಲೆಂ ಚಿಂತ್ಚ್ಯಾಭಿತರ್
ಜಾಗ್ ಮ್ಹಾಕಾ ಜಾಲಿ
ಸಪ್ಣಾಚೊ ತೊ ಮಧುರ್ ಭಾವ್
ಕಾಳ್ಜಾಂತ್ ಜಿವೊಚ್ ಆಸ್ಲೊ
ಸಪಣ್ ಮ್ಹಜೆಂ ಜ್ಯಾರಿ ಜಾಂವ್ಚೊ
ಭರ್ವಸೊ ಖೂಬ್ ದಿಸ್ಲೊ
ಸಕಾಳಿಂಚಿಂ ಸಪ್ಣಾಂ ಸಬಾರ್
ನೀಜ್ ಜಾತಾತ್ ಮ್ಹಣ್ತಾತ್
ಹೇಂಯ್ ಕಿತ್ಯಾಕ್ ಜಾಂವ್ಕ್ ನಜೊ?
ಗುಪೀತ್ ಕಿತೆಂ ಹಾಸ್ತಾತ್?
-ಆಲ್ವಿನ್ ಪಿಂಟೊ, ದುಬಾಯ್