ಸಂಪಾದಕೀಯ್:
ತುಜ್ಯಾ ಉಪ್ರಾಂತ್ ತುಜೆಂ ಆರಾಧನ್ ಚಲ್ಲ್ಯಾರ್ ಕೊಣ್ ಕಿತೆಂ ಕರುಂಕ್ ಸಕತ್?
ಆಪ್ಲಿಚ್ ವಾಟ್ ಚಲಲ್ಲ್ಯಾ, ಆಪ್ಲೆಂಚ್ ಗುಮಟ್ ವ್ಹಾಜಯಿಲ್ಲ್ಯಾ ಮನ್ಶಾಚಿ ಆಜ್ ಇಮಾಜ್ ಕರುನ್ ಧುಂಪಾರತಿ ಕರೀತ್ ಆಸಾತ್ ಸಗ್ಳೆ. ಹಿಂ ಅನಿತಿಚಿಂ ಕಾಮಾಂ ಪಳೆವ್ನ್ ರಾಗಾನ್ ಶಿಜೊನ್ ಆಸಲ್ಲ್ಯಾ ಹಾಕಾಯ್ ಕ್ರಮೇಣ್ ಹಾಚಿ ಸವಯ್ ಜಾಲ್ಯಾ. ತಾಕಾಯ್ ಅಸಲ್ಯಾ ಆರಾಧನಾಚಿ ಗಿರಾಂತ್ ಉಬ್ಜಾಲ್ಯಾ.
ಆತಾಂ ಹೊ ವೊಣ್ತಿರ್ ಚಿಟ್ಕಾಯಿಲ್ಲ್ಯಾ ಪೋಸ್ಟರಾಂತ್ ಸದಾಂ ಸೊಬ್ತಾ. ಲೊಕಾಚೆ ದೊಳೆ ತಾಚೆರ್ ಖಂಚ್ಲ್ಯಾತ್.
ಜೊ.ಸಿ. ಸಿದ್ದಕಟ್ಟೆ ಕೊಣಾವಿಶಿಂ ಉಲಯ್ತಾಗಾಯ್? ಯೆದೊಳ್ ಯೇವ್ನ್ ಗೆಲ್ಲ್ಯಾವಿಶಿಂ ಯಾ ಆಪ್ಣಾವಿಶಿಂ? ಯಾ ಅಸಲ್ಯಾ ಆರಾಧನಾಂಚಿ ಆಶಾ ದವರ್‍ಚ್ಯಾ ಮನ್ಶಾಂವಿಶಿಂ?
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ತಾಂಣಿ ಮ್ಹಜಿ ಇಮಾಜ್ ಕೆಲ್ಯಾ
ಹಾಂವ್ ಜಾಗೊ ಆಸ್ತಲೊಂ ಮಧ್ಯಾನೆರ್ ಸಯ್ತ್
ಪ್ರವಾದ್ಯಾಚೆ ಪಾಕಟೆ ಭಾಂದ್ಲ್ಯಾ ಉಪ್ರಾಂತ್
ಹಸ್ತಿಚೆಂ ಬಳ್ ನಾತ್ಲೆಂ ತರೀ ಕೊಬಾತೊಟಾಕ್‌ ಕಾಂಪ್
ಮಸ್ತುಂಚಿ ದೀಶ್ಟ್ ಭಿಲ್ಕುಲ್ ನಾತ್ಲಿ, ಇರಾದೊ ಸಾಫ್
ಹಾಂವ್ ನ್ಹಯ್ ವೊಣ್ತಿರ್ ಚಿಟ್ಕಾಯಿಲ್ಲ್ಯಾ ಪೋಸ್ಟರಾಂತ್ಲೊ
ತರೀ ಸಮೆಸ್ತ್ ದೊಳೆ ಮ್ಹಜೆರ್ ಖಿಳಾಯ್ತಾಲೆ
ಮ್ಹಾಕಾ ಮ್ಹಜಿಚ್ ವಾಟ್, ಮ್ಹಜೆಂಚ್‌ ಗುಮಟ್
ಕೋಣ್ ಮ್ಹಣಾ, ತೊ ಉಲಯ್ತಾ ಮಾರುನ್ ಸಾಟ್
ವಿಶೆವಾ ಖಾತಿರ್ ಹಾತ್ ಭಾಂದ್‌ಲ್ಲಿ ಘಡಿ ಮಾರೆಕಾರ್
ಸಾಂಗುಂ ಕಶೆಂ, ದಳ್ದೀರ್‌ಪಣ್ ಪಾವ್ಲೆಂ ಗುಪ್ತಿಂ ದಾರಾರ್
ಆತಾಂ ತಾಣಿಂ ಮ್ಹಜಿ ಇಮಾಜ್ ಕೆಲ್ಯಾ
ಅನಿತಿಚಿಂ ಅಲ್ಪುಲಿಂ ಅರ್ಪುಂಕ್ ಲಾಗ್ಲ್ಯಾಂತ್
ಇಮಾಜ್ ಉಭಾರ್‍ಲ್ಯಾ ಉಪ್ರಾಂತ್ ಹಾಂವ್ ಮೊರುನ್ ಆಸಾಂ
ತಾಂಚಿ ಧುಂಪಾರತಿ ಖಳನಾಸ್ತಾಂ ನಾಕಾಂತ್‌ ರಿಗ್ತಾ
ತ್ಯಾ ಅಮಾಲಾಕ್ ಹಾಂವ್ ಮ್ಹಾಕಾಚ್ ವಿಸ್ರಾತಾಂ
ಪರತ್ ಪರತ್ ಆರಾಧಾನಾಕ್‌ ರಾಕುನ್‌ ರಾವ್ತಾಂ
-ಜೊ. ಸಿ. ಸಿದ್ದಕಟ್ಟೆ, ಕಾರ್ಮೆಲಿತ್
संपादकीय:
तुज्या उपरांत तुजें आराधन चल्ल्यार कोण कितें करुंक सकत?
आपलीच वाट चलल्ल्या, आपलेंच गुमट व्हाजयिल्ल्या मनशाची आज इमाज करून धुंपारती करीत आसात सगळे. हीं अनितिचीं कामां पळेवन रागान शिजोन आसल्ल्या हाकाय क्रमेण हाची सवय जाल्या. ताकाय असल्या आराधनाची गिरांत उबजाल्या.
आतां हो वोणतीर चिटकायिल्ल्या पोसटरांत सदां सोबता. लोकाचे दोळे ताचेर खंचल्यात.
जो.सी. सिद्दकट्टे कोणाविशीं उलयतागाय? येदोळ येवन गेल्ल्याविशीं या आपणाविशीं? या असल्या आराधनांची आशा दवरच्या मनशांविशीं?
-मेलवीन रोड्रिगस
कविता:
तांणी म्हजी इमाज केल्या
हांव जागो आसतलों मध्यानेर सयत
प्रवाद्याचे पाकटे भांदल्या उपरांत
हसतिचें बळ नातलें तरी कोबातोटाक कांप
मसतुंची दीश्ट भिल्कूल नातली, इरादो साफ
हांव न्हय वोणतीर चिटकायिल्ल्या पोसटरांतलो
तरी समेसत दोळे म्हजेर खिळायताले
म्हाका म्हजीच वाट, म्हजेंच गुमट
कोण म्हणा, तो उलयता मारून साट
विशेवा खातीर हात भांदल्ली घडी मारेकार
सांगूं कशें, दळदीरपण पावलें गुप्तीं दारार
आतां ताणीं म्हजी इमाज केल्या
अनितिचीं अल्पुलीं अर्पुंक लागल्यांत
इमाज उभारल्या उपरांत हांव मोरून आसां
तांची धुंपारती खळनासतां नाकांत रिग्ता
त्या अमालाक हांव म्हाकाच विस्रातां
परत परत आराधानाक राकून रावतां
-जो. सी. सिद्दकट्टे, कार्मेलीत