ಸಂಪಾದಕೀಯ್:
ಫೋರೆನ್ ಖಾಣಾಮುಕಾರ್ ಆವಯ್ಚೆಂ ರಾಂದಪ್ ಖಂಯ್ ಉರ್‍ತಾ?
ಭೊಂವಾರ್ ಬದಲ್ಲಾ. ಸಂಸಾರ್ ಬದಲ್ಲಾ. ತ್ಯಾತೆಕಿದ್ ಆಮ್ಚ್ಯೊ ರುಚಿ ಬದಲ್ಲ್ಯಾತ್. ಶಿತ್ ಕಡಿ ಹುಮಣ್ ಕೊಣಾಕ್ ಜಾಯ್ ಆತಾಂ? ಕೆಂಟಕಿ, ಪಿಝ್ಝಾ, ಬರ್ಗರ್ ಸದಾಂಚ್ ಜಾಯ್ ಆಮ್ಚ್ಯಾ ಭುರ್ಗ್ಯಾಂಕ್! ಹ್ಯೊ ರುಚಿ ಬದಲ್ಲ್ಯಾನ್, ಶಿತ್ ಕಡಿ ಕರ್‍ಚೆ ಆವಯ್ಚೊ ಸಯ್ತ್ ಆಮ್ಕಾಂ ಭುರ್ಗ್ಯಾಂಕ್ ರಾಗ್ ಯೆತಾ.
ಶಿತ್ ಕಡಿ ಸವಾಯೆಚಿ ವಸ್ತ್. ತಾಂತುಂ ಮಝಾ ನಾ. ಕಾಂಯ್ ಜೇಂವ್ಕ್ ನಾ ಮೆಳ್ಳೆಂ ಜಾಲ್ಯಾರ್ ಆನಿ ಪೊಟ್ ಪಾಟಿಕ್ ಲಾಗ್ಲೆಂ ಜಾಲ್ಯಾರ್, ಸವಾಯೆಚಿ ಆವಯ್ ಆಸಾ, ತಿ ಶಿತ್ ಕಡಿ ಕರ್‍ತಲಿಚ್! ಪುಣ್ ಆಯ್ಚ್ಯಾ ದಿಸಾ ಆಮ್ಚ್ಯೊ ರುಚಿ ಆಮಿ ಭಾಗಂವ್ಕ್ ಜಾಯ್. ಹ್ಯಾ ಖಾತೀರ್ ಆವಯ್ಕ್ ದುರ್‍ಸಲ್ಯಾರ್ ಪರ್‍ವಾನಾ. ಹ್ಯಾ ಫೋರೇನ್ ಖಾಣಾ ಮುಕಾರ್ ಆವಯ್ಚೆಂ ರಾಂದಪ್ ಖಂಯ್?
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ರುಚೀಕ್ ಜೆವಣ್
ಸದಾಂಚ್ ಕಟ್ಕಟ್ ಭುರ್ಗ್ಯಾಂಚಿ
ಜೆವ್ಣಾ ಮೆಜಾರ್ ವಾಂಕ್ಡಿಂ ತೊಂಡಾಂ
"ಶೀತ್ ಕಡಿ ಹುಮಣ್ ಸದಾಂಚ್?
ಜೆವ್ಣಾಂತ್ ಹಾಡ್‌ಗೆ ವೆಗ್ಳೆಪಣಾಂ.."
"ನಾಕಾ ದಿಸ್ತಾ ಕಸ್ಲೀಚ್ ಭಾಜಿ
ನಾಕಾತ್ ತಿ ತೊಂಡಾಕಾಂ
ಸದಾಂ ಸದಾಂ ತೆಂಚ್ ಜೆವಪ್?
ವೆಗ್ಳೆಪಣ್ ಕಾಂಯಿಂಚ್ ನಾಕಾ?
ಬರ್ಗರ್, ಪಿಝ್ಝಾ, ನೂಡಲ್ಸ್, ಫ್ರಾಯ್ಜ್
ಲಾಗ್ತಾತ್ ಕಿತ್ಲೆ ಸುವಾದೀಕ್
ತುಂ ಮಾತ್ ಮ್ಹಣ್ಟಾಂ ಸದಾಂಚ್
ಜೆವಣ್ ಘರ್‍ಚೆಂಚ್ ಮೊಲಾದೀಕ್
ಸಗ್ಳೆಂಚ್ ಬದ್ಲತ್ ಆಸಾ ಭೊಂವ್ತಿಂ
ಆಮೀಯ್ ಮಾತ್ಶಿಂ ಬದ್ಲುಯಾಂ
ಚಿಕನ್, ಮಟನ್, ಶಾವರ್ಮಾ
ಪಿಝ್ಝಾ, ಬರ್ಗರ್ ಖಾವ್ಯಾ
ಆಜ್ ಹೆಂ ಜಾಲ್ಯಾರ್ ಫಾಲ್ಯಾಂ ತೆಂ
ಜೀಬೆಕಚ್ ಲಾವ್ಯಾ ವಳಣ್
ರೂಚ್ ಆಯ್ಲ್ಯಾರ್ ಆಸಾಚ್ ನ್ಹಿ
ಶೀತ್, ಕಡಿ, ಹುಮಣ್... "
- ರೂಪಾಲಿ ಕೀರ್ತನಿ
संपादकीय:
फोरेन खाणामुकार आवयचें रांदप खंय ऊरता?
भोंवार बदल्ला. संसार बदल्ला. त्यातेकीद आमच्यो रुची बदल्ल्यात. शीत कडी हुमण कोणाक जाय आतां? केंटकी, पिझ्झा, बर्गर सदांच जाय आमच्या भुरग्यांक! ह्यो रुची बदल्ल्यान, शीत कडी करचे आवयचो सयत आमकां भुरग्यांक राग येता.
शीत कडी सवायेची वस्त. तांतूं मझा ना. कांय जेवंक ना मेळ्ळें जाल्यार आनी पोट पाटीक लागलें जाल्यार, सवायेची आवय आसा, ती शीत कडी करतलीच! पूण आयच्या दिसा आमच्यो रुची आमी भागवंक जाय. ह्या खातीर आवयक दूर्सल्यार परवाना. ह्या फोरेन खाणा मुकार आवयचें रांदप खंय?
-मेल्विन रोड्रीगस
कविता
रुचीक जेवण
सदांच कटकट भुरग्यांची
जेवणा मेजार वांकडी तॊंडा
"शीत कडी हुमण सदांच?
जेवणांत हाड गे वेगळेपणां.."
"नाका दिसता कसलीच भाजी
नाकात ती तोंडाकां
सदां सदां तेंच जेवप?
वेगळेपण कांयच नाका?
बर्गर, पिझ्झा, नुडल्स, फ्राय्ज
लागतात कितले सुवादीक
तूं मात म्हणटां सदांच
जेवण घरचेंच मोलादीक
सगळेंच बदलत आसा भो्वती
आमीय मात्शीं बदलया
चीकन, मटण, शावर्मा
पिझ्झा, बर्गर खावया
आज हे्ं,जाल्यार फाल्यां तें
जीबेकच लावया वळण
रुच आयल्यार आसाच न्ही
शीत, कडी, हुमण... "
- रुपाली किर्तनी