ಸಂಪಾದಕೀಯ್:
ಕಾಳ್ಜಾಂ ಶಿರಾಂಚ್ಯಾ ರುದಾನಾಚಿ ಕವಿತಾ
ಕಾಳ್ಜಾ ಶಿರಾಂಚೆಂ ರುದಾನ್ ಕಶೆಂ ಹಿ ಕವಿತಾ ಆಮ್ಚೆ ಮುಕಾರ್ ಸಾದರ್ ಜಾಲ್ಯಾ. ಕಾಂಯ್ ಥೊಡ್ಯಾಂಕ್ ವೆಕ್ತಿಗತ್ ಕವಿತಾ ಮ್ಹಣೊನ್ ಭೊಗುಂಕ್ ಪುರೊ. ಪುಣ್ ವಾಚ್‌ಲ್ಲ್ಯಾ ಆರ್‍ವಾಸ್ ಜಣಾಂಕ್ ತಾಂಚ್ಯಾ ಜಿವಿತಾಂತ್ಲಿಂ ಪಾಶಾರ್ ಜಾಲ್ಲಿಂ ಖಿಣಾಂ ಹಿ ಕವಿತಾ ಉಗ್ತಿ ಕರ್‍ತಾನಾ, ಹಿ ಕವಿತಾ 'ಕವಿಚಿ' ಮಾತ್ರ್ ನ್ಹಯ್, 'ಮ್ಹಜೀಯ್' ಮ್ಹಣ್ ತುಮ್ಕಾಂ ಸುಸ್ತತಲೆಂ ಆನಿ ಖಿಣಾಕ್ ತರೀ ಹೆ ಕವಿತೆಕ್ ತುಮಿ ತುಮ್ಚ್ಯಾ ಗೊಪಾಂತ್ ಆರಾಯ್ತಲ್ಯಾತ್ ಮ್ಹಳ್ಳೆಂ ಖಂಡಿತ್.
ಹರ್‍ಯೆಕ್ಲೊ ಮನೀಸ್ ಜಲ್ಮಾನ್ ಕವಿ ಕೊಣ್ಣಾ. ಕವಿತಾ ಎಕ್ಲ್ಯಾಚ್ಯಾ ಅಂತರ್‌ಮಳಾಂತ್ಲೆ ಧಾಂಪುನ್ ದವರ್‌ಲ್ಲೆ ಉಬೆಕ್ ಸಲಿಸಾಯೆನ್ ಭಾಯ್ರ್ ಪಾಶಾರ್ ಕರವ್ನ್, ಫುಗಾಸಾಂವಾ ಥಾವ್ನ್ ಮುಕ್ತಿ ಜೊಡುನ್ ದಿಂವ್ಚೆಂ ಸಾಧನ್ ಕೊಣ್ಣಾ. ತ್ಯಾದೆಕುನ್‌ಚ್ ಕಥಾಕಾರ್ ಜಾವ್ನಾಸ್‌ಲ್ಲ್ಯಾ ಕ್ಲೆರೆನ್ಸ್ ಕೈಕಂಬಾನ್ ಹೆಂ ಏಕ್ ಮಾಧ್ಯಮ್ ವಿಂಚ್ಲಾಂ. ಆನಿ ಅಸಲ್ಯಾ ಎಕಾ ಪ್ರಯತ್ನಾಂತ್ ಯೆಶ್ ಸೈತ್ ಜೊಡ್ಲಾಂ.
ಆಮ್ಚೆಲಾಗಿಂ ಕವಿತೆಂಚೊ ದಾಳೊಚ್ ಪಡ್ಲಾ. ಕೊಣಾಕ್ ಕೆದಳಾ ಕವಿತಾಕುಳಾರಾಕ್ ಆಪವ್ನ್ ಹಾಡ್ಚೆಂ ಮ್ಹಳ್ಳೆವಿಶಿಂ ಆಮ್ಕಾಂ ಖಂತ್ ಸುರು ಜಾಲ್ಯಾ. ಹಿ ಖಂತ್ ಥೊಡಿ ತರೀ ಹಳು ಕರಿಜಾಯ್ ಮ್ಹಳ್ಳ್ಯಾ ಇರಾದ್ಯಾನ್ ಹಫ್ತ್ಯಾಕ್ ದೋನ್ ಕವಿತಾ ದಿಂವ್ಚೆಂ ಪ್ರಯತನ್ ಆಮಿ ಸುರು ಕೆಲಾಂ. ಹರ್‍ಶೆಂಚೆಬರಿ ಆತಾಂಯ್ ತುಮ್ಚ್ಯಾ ಮಾಯಾಮೊಗಾಚೊ ಪಾವ್ಸ್ ಆಮ್ಚೆರ್ ವೊತಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಜಲ್ಮಾ ದಿಸಾಚೆಂ ರುದಾನ್
ರಚ್ಲೊಯ್ ಮ್ಹಾಕಾ ಕಿತ್ಯಾಕ್ ದೆವಾ
ಹೆ ಧರ್‍ತೆರ್ ಹ್ಯಾ ಮನ್ಶಾ ಕುಳಾಂತ್
ಹ್ಯಾ ಕಷ್ಟಾಂ-ದಗ್ದೊಣೆಚ್ಯಾ ಮೊಳ್ಯಾಂತ್
ಕಿತ್ಯಾಕ್ ಮ್ಹಾಕಾ ಹಾಡ್ಲೊಯ್ ತುಂವೆಂ?
ಲಾಖೊಂ ಜೀವಿಂ ಬದ್ಲಾ "ಮ್ಹಾಕಾ" ವಿಂಚ್ಲೊಯ್?
ಹಜಾರ್ ಹೆರಾ ಬದ್ಲಾ 'ಮ್ಹಾಕಾಚ್" ಕೆಲೊಯ್?
ಸಾತ್ ಜಲ್ಮಾ ಬದ್ಲಾ ಏಕ್‌ಚ್ ದಿಲೊಯ್?
ಅಚಲ್ ಮನ್ಶಾ ಜೀವನ್ ತುಂವೆಂ ವಿಣ್ಲೆಂಯ್?
ಹಾತಾಂತ್ ತುಂವೆಂ ಖಂಯ್ಚಿ ಮಾತಿ ಘೆತ್ಲಿಯ್?
ಕಡ್ಶಾ ಕೊನ್ಶಾಂತ್ಲಿ ಧುಳ್ ವಿಂಚ್ಲಿಯ್?
ದರ್‍ಯಾ ವೆಳೆಚಿ ರೇಂವ್ ಆರಾಯ್ಲಿಯ್?
ಮಾತ್ಯೆ ಬದ್ಲಾ ಫಾತರ್ ಪುಂಕ್ಲೊಯ್?
ಕುಸ್ಡ್ಯಾ ಸಾರ್‍ಯಾಂತ್ಲೊ ನಶ್ಟಿ ಕಿಡೊ ತಶೆಂ
ತುಜ್ಯಾ ರಾಗಾಚೊ ಕಾಳೊ ತಿಬೊ ಜಶೆಂ
ಗಲೀಜ್ ಉಬಿರ್ ಮುಟಿಂತ್ ಆರಾವ್ನ್
ತಾಂತುಂಚ್ ತುಂವೆಂ ಉಸ್ವಾಸ್ ಪುಂಕ್ಲೊಯ್
ಮನ್ಶಾಂನಿ ಹ್ಯಾ ಖೆಬ್ದಾಯೊ ಕರುಂಕ್
ಖೊಟ್ಯಾ ನಶಿಬಾಚೊ ಆಸ್ರೊ ಜಾಂವ್ಕ್
ನಷ್ಟಿ ಮನ್ಶಾಂಚೊ ಗ್ರಾಸ್ ಜಾಂವ್ಕ್
ದಳ್ದಿರ್‌ಪಣಾಚೊ ಆರ್‍ಸೊ ಜಾಂವ್ಕ್
ಖರೆಂಚ್ ರಡ್ತಾ ಹೆಂ ಕಾಳಿಜ್ ಮ್ಹಜೆಂ
ಕಠಿಣ್ ಕರ್‍ಗತಾ ಹೆಂ ಮನ್ ಅಧುರೆಂ
ರಡ್ಣೆಂ ವಿಳಾಪ್ ಸೊಡುನ್ ಕಾಂಯಿಂಚ್
ಆಸ್‌ಲ್ಲೆಂ ತರ್ ಕಿತ್ಲೆಂ ಬರೆಂ ಜಾತೆಂ
ಮ್ಹಜ್ಯಾ ಬದ್ಲಾ ರುಕಾಕ್ ರಚ್‌ಲ್ಲೊಯ್ ತರ್
ಹಜಾರ್ ಜಣಾಂಕ್ ಸಾವ್ಳೆಚೊ ಆಸ್ರೊ ಜಾತೊಂ
ಸುಕ್ಣಿಂ ಸಾವ್ಜಾಂಕ್ ಸಾವಟಾಚೊ ದಾತಾರ್ ಜಾತೊಂ
ಮೆಲ್ಲ್ಯಾ ಮನ್ಶಾಂಕ್ ಹುಲ್ಪಾಂವ್ಕ್ ಉಜೊ ಮೆಳ್ತೊ
ಹೆ ಕುಡಿ ಬದ್ಲಾ ಫಾತ್ರಾ ಕುಡ್ಕೊ ಜಾಲ್ಲೊಂ ತರ್
ಘರಾಂಕ್ ದಿವ್ಳಾ ತೆಂಪ್ಲಾಂಕ್ ಆಧಾರ್ ಜಾತೊ
ಮನ್ಶಾ ಜಿಣಿಯೆಚಿಂ ರುಪಾಂ ಸೊಭ್ತೊಂ
ಮೆಲ್ಲ್ಯಾ ಮನ್ಶಾ ಪೊಂಡಾಕ್ ಧಾಂಪ್ಣೆಂ ಜಾತೊಂ
ಜಲ್ಮಾ ದಿಸಾ ಖರೆಂಚ್ ರಡ್ತಾಂ ರಚ್ನಾರಾ
ಕಾಳೀಜ್ ಕಡೊನ್ ಸಾಂಗ್ತಾಂ ತುಕಾ
ರುದಾನ್ ಮ್ಹಜೆಂ ಹೆಂ ಜಲ್ಮಾ ದಿಸಾಚೆಂ
ಮಾಗ್ಣೆಂ ಖರೆಂಚ್ ಹೆಂ ಕಾಳ್ಜಾ ಗೊಪಾಂತ್ಲೆಂ
ಪರತ್ ಮ್ಹಾಕಾ ರಚ್ತಾಯ್ ತರ್
ಅಸಲೊ ಮನಿಸ್ ಜಾವ್ನ್ ರಚಿನಾಕಾ
ಬುಧ್ವಂತ್ಕಾಯ್ ಉಣಿ ದಿ ತರೀ
ಬರೆಂ ನಶೀಬ್ ಇಲ್ಲೆಂ ದಿ ಮ್ಹಾಕಾ
-ಕ್ಲೆರೆನ್ಸ್ ಕೈಕಂಬ