ಸಂಪಾದಕೀಯ್:
ಕವಿತಾ ಶೆತಾಂತ್ ಶಿಂಪ್ಡಲ್ಲೆ ಫಾತರ್ ಆನಿ ರೆವ್ಡಲ್ಲಿಂ ಝಾಂಟಾಂ!
ತಾಂದ್ಳಾಂತ್ ಫಾತರ್ ಆಸ್ತಾತ್. ಫಾತರ್ ಆಸ್ತಾತ್ ಮ್ಹಣೊನ್ ತಾಂದೂಳ್ ಉಡಯ್ನಾಂತ್; ಬದ್ಲಾ ನೆರಾಯ್ತಾತ್. ಕೆಸಾಂಕ್ ಝಾಂಟಾಂ ಆಸ್ತಾತ್. ಝಾಂಟಾಂ ಆಸ್ತಾತ್ ಮ್ಹಣೊನ್ ಕೇಸ್ ಕಾತರ್‍ನಾಂತ್; ಬದ್ಲಾ ಉಗಯ್ತಾತ್. ಕವಿತಾ ಶೆತಾಂತ್‌ಯ್ ಕಾಂಯ್ ಅವ್ಗುಣಾಂಚೆ ಫಾತರ್ ತಶೆಂ ಝಾಂಟಾಂ ಆಸುಂಯೆತಾತ್. ತಾಚಿಂ ಸೊಧ್ನಾಂ ಕೆಲ್ಲ್ಯಾಂಕ್ ಮಾತ್ರ್ ತಾಂಚೆ ದಿಷ್ಟಿಂಕ್ ಹಿಂ ಕಾಳಿಂ ಖತಾಂ ಝಳ್ಕತಾತ್. ಜಶೆಂ ಜಾಲಾಂ ಹೆ ಕವಿತೆಚ್ಯಾ ನಾಯಕಾಕ್!
ಹಿಂ ಖೆಳ್ಕುಳಾಂ ಮ್ಹಣೊಂ? ಹಣೆಬರಪ್ ಸಾಂಗೊಂ? ಯಾ ನೆರಾವ್ಣಿ, ಉಗವ್ಣಿ ಮ್ಹಳ್ಳೆಂ ಲೆಕೊಂ? ಏಕ್ ಉತರ್ ಮಾತ್ರ್ ಧೈರಾನ್ ಉಚಾರ್‍ತಾಂ - ಹ್ಯಾ ಫಾತ್ರಾಂವರ್‍ವಿಂ, ಹ್ಯಾ ಝಾಂಟಾಂ ವರ್‍ವಿಂ ಕವಿತಾ ಶೆತ್‌ಚ್ ಕೊಣೇಂಯ್ ನೆಗಾರುಂಕ್ ಸಾಧ್ಯ್ ನಾ.
ಹೆ ಕವಿತೆಂತ್ಲೆಂ ಸತ್, ಆಡೂಕ್ ಜಾಂವ್ಕ್ ಪುರೊ. ಗಳ್ಯಾಲಾಗಿಂ ಲಾಸ್ತಾ ಜಾಂವ್ಕ್ ಪುರೊ. ಪುಣ್ ತೆಂ ಬರಂವ್ಚೆಂ ಧೈರ್ ಸಕ್ಡಾಂಕ್ ಆಸನಾ. ವಿತೊರಿ ಕಾರ್ಕಳಾಕ್ ತೆಂ ಧೈರ್ ಆಸಾ. ಹಾಸವ್ನ್ ಹಾಸವ್ನ್ ಧಾಗ್ ದಿಂವ್ಚಿ ತಾಕತ್ ತಾಕಾ ಆಸಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಕವಿ ಜಾಂವ್ಚಿ 'ಶೊರ್ಟ್‌ಕಟ್' ವಾಟ್
ಜಾಣ್ತೆ ಸಾಂಗ್ತಾತ್ ಕವಿ ಜಾಂವ್ಕ್ ಭಾರೀ ಕಷ್ಟ್
ಆಸಾ ಏಕ್ ಕವಿ ಜಾಂವ್ಚಿ ಶೊರ್ಟ್‌ಕಟ್ ವಾಟ್
ಹಾಂವ್ ಸಾಂಗ್ತಾಂ ತಶೆಂ ಕೆಲ್ಯಾರ್
ತುಮಿ ಖಂಡಿತ್ ಕವಿ ಜಾವ್ಯೆತ್
ತುಮ್ಕಾಂ ಚೊರ್‍ಚಿ ಸವಯ್ ಆಸಾ
ತರ್ ತುಮಿ ಕವಿ ಜಾವ್ಯೆತ್
ಇಲ್ಲೆಂ ಥಂಯ್ಚೆಂ, ಇಲ್ಲೆಂ ಹಾಂಗಾಚೆಂ
ಇಲ್ಲೆಂ ಇಲ್ಲೆಂ ಪುಸ್ತಕಾಂತ್ಲೆಂ
ಗರ್ಜ್ ಪಡ್ಲ್ಯಾರ್,
ಆಸ್ಲ್ಯಾರ್
ಮಸ್ತಕಾಂತ್ಲೆಂ
ಇಲ್ಲೆಂ ಇಲ್ಲೆಂ ಚೊರಿ ಕರಾ
ತಾಂಕಾಂ-
ತೀನ್, ಸ ವಾ ನೋವ್ ಅಕ್ಷರಾಂಚೊ
ಪಂಗಡ್ ಕರಾ
ಸಕಯ್ಲ್
ಸಕಯ್ಲ್
ದವರಾ
ಸಾಧಿ ಕವಿತಾ ಕರಿಜೆ
ಪಾನಾಚ್ಯಾ ದಾವ್ಯಾಕ್ ಆಸುಂ
ನವ್ಯ್ ತರ್ ಮಧೆಂ
ನವ್ಯೋತ್ತರ್ ತರ್ ಉಜ್ವ್ಯಾಕ್
ತಲ್ವಾರ್ ಪಿಸ್ತುಲ್ ಆಸ್ಲ್ಯಾರ್ ಬಂಡಾಯ್
ಮೀಸಲಾತಿ ಆಸ್ಲ್ಯಾರ್ ದಲಿತ್
ತುಮ್ಕಾಂಚ್ ಅರ್ಥ್ ಜಾಯ್ನಾ ತರ್ ಅಮೂರ್‍ತ್
ತುಮ್ಕಾಂ ಜಾಲ್ಯಾರಿ ತ್ರಾಸ್
ಆಸುಂ ಇಲ್ಲೆಲ್ಲೆ ಪ್ರಾಸ್
ಅಶೆಂ-
ಕಶೀಯ್ ಏಕ್ ಕವಿತಾ ತಯಾರ್ ಕರಾ
ಪತ್ರಾಕ್ ಪೋಸ್ಟ್ ಕರಾ
ಸಂಪಾದಕಾಕ್ ಅರ್ಥ್ ಜಾಲ್ಯಾರ್
ಜಾಗೊ ಆಸ್ಲ್ಯಾರ್
ಖಂಡಿತ್ ಪರ್ಗಟ್ತಾ
ನಾ ತರ್ ಖಂತ್ ನಾಕಾ
ಕವಿಗೋಷ್ಟಿಂನಿ ಪ್ರಯತ್ನ್ ಕರಾ
ಜಾಗೊ ಮೆಳ್ಳೊ ತರ್ ಕವಿತಾ ವಾಚಾ
ಆಯ್ಕೊವ್ಪ್ಯಾಂಕ್ ಸಮ್ಜನಾ ಮ್ಹಣೊನ್
ಥೊಡ್ಯೊ ಪಂಗ್ತಿ ದೊದೋನ್ ಪಾವ್ಟಿಂ ವಾಚಾ
ವ್ಹಾ ವ್ಹಾ ಮ್ಹಳ್ಯಾರ್ ಪರ್‍ತೆಂ ವಾಚಾ
ವೊಗೊಚ್ ಆಸ್ಲ್ಯಾರ್ ಮುಕಾರ್ ವಚಾ
ಅಶೆಂ ಥೊಡ್ಯೊ ಕವಿತಾ ವಾಚ್ಲ್ಯಾ ಉಪ್ರಾಂತ್
ಮಾಗೀರ್
ಕೊಣಿ ಖಂಯ್ ತರೀ ಆಪವ್ನ್ ಸನ್ಮಾನ್ ಕರ್‍ತಾತ್
ಕವಿತಾ ಸೊಡಾ
ಸನ್ಮಾನಾ ಪಾಟ್ಲ್ಯಾನ್ ಪಡಾ
ಸಮ್ಜಲೆಂ ಕವಿ ಜಾಂವ್ಚೆಂ
ಕಿತ್ಲೆಂ ಸುಲಭ್ ಮ್ಹಳ್ಳೆಂ?
-ವಿತೊರಿ ಕಾರ್ಕಳ್